الله يرحم والديكم

[مشكلتي]

السلام عليكم
مشكلتي هي جار السوء تسكن بحذانا جارة وهي من أقربائي ملي كبرنا وهي دايمن تكيدنا المكائد ودائما نقابلو إسائتها بإحسان بحكم الجورة وبحكم القرابة
هاذ الصيف وتحديدا بعد رمضان كانوا يجوا ناس خدامة حذانا ولينا يوميا نخرجولهم الماء البارد لوجه الله وتديه بنت خوي صغيرة هاذ الخدامة دايمن يكرمو بنت خوي إما بالمال وإما بأموركحلويات أو فاكهة أو ماشابه من أكلهم اللي يحملوه تطييبا لخاطر لبنت خوي مع أننا حاولنا نخلوها ترفض باش ما يوليس الماء لي يدوه بمقابل علما أنو بنت خوي عندها أربع سنين فقط
وهنا بدات المشاكل هاذ الجارة وبنتها وجارة أخرى كل يوم يعسو فينا ووصل بهم الأمر أنهم يعايرونا بلي حنا طماعين ووو وكل هذا وحنا صابرين لخاطرش الماء كنا قاصدين بيه وجه ربي
لمدة شهر ونص وحنا هكا في يوم ما صبرتش الجارة وولت تخرج حتى هي بنت بنتها المطلقة وترسل حتى هي الماء الأمر هاذا عادي وكل واحد ونيتو ____ لكنهم طلبوا من بنتهم تضرب بنت خوي وما تخليهاش تدي الماء ولما الخدامة يعطوهم شيئ يتقاسموه تديه وحدها حنا قلنا ما عليش ما يهمش لكن أذاهم زاد ورفعوا صواتهم علينا وخلاونا نغلقو باب دارنا وما نزيدوش نمدو الماء تفاديا للمشاكل
وجات الجارة لبيتنا وتهدت عليا وعايرتني بكلمات هابطة قتلها إلى على الماء ما رايحينش نمدو رانا خلينالكم الطريق وحدكم قاتلي تحبي ولا تكرهي انا نمد نمد وزاد وين بنتها المطلقة عيطتلي في التليفون وقالت كلام قاسي وصلت وين سبتني ووالله ما رديت لا عليها ولا على أمها وخليت كلش لربي
مع العلم أنو هاذ الخدامة عمرهم ما شافونا وهما من كثر إصرارهم وصل وين خرجت بنتها بشعرها الأصفر للخدامة __ وصل وين الجارة لوخرا خرجتلهم هي بنفسها
يا خاوتي أنا قررت نبتعد عنهم نهائيا السلام وما نقوللهمش نهائيا لأنو وين يوصل الحسد حتى في الصدقة ما بقاتش الدنيا
الله يرحم ليكم والديكم كون جيتو في بلاصتي واش رايحين تديرو ؟؟؟
جوارين دايمن يعاملونا بالسوء وقصة ليوم غيض من فيض ولي مخبي أكثر وأكثر وتخيلو تأذي فينا وحنا مسلفينلها دراهم
شورو علي هل قراري صائب ؟