منتدى اللّهجة الجزائريّة أو منتدى واش تسمّوها عندكم ؟!

[⋟صقر☬الأندلس⋞]

السّلام عليكم و رحمة الله تعالى و بركاته

اخواني روّاد منتدى اللّهجة الجزائريّة ، أرجو أن تتقبّلوا منّي هذا النّقد البنّاء ، الذي لا ينقص من قدركم و لا من مجهوداتكم التي تبذلونها ، بل بالعكس سيعطيكم و يمنحكم دفعة قويّة لتنشيط هذا المنتدى و تغيير النّمط و الأسلوب الذي يسير عليه منذ أكثر من سنة أو يزيد .

هاذ المنتدى صح هو خاص بمنتدى اللّهجة الجزائريّة ، و لاكين واش هو الهدف منّو ، رني معاكم كي تقولولي هي لهجة كبيرة و متعدّدة سي بوغ صا نحبّوا نتعرفوا على كامل اللّهجات ، وي عندكم الحق ، بصّح تتعرفوا عليها ماشي برك بهاذ الشي واش اسمو عندكم و هاذيك واش تقولولها ........الخ ، لازم تكون مواضيعنا تخدم اللّهجة في حد ذاتها ، مثل ما لمسناه في بعض المواضيع الحصريّة و الرّائعة ، ايه ما ننكروش هاذ الشي و نطالبوا بالمزيد ، و حكاية واش تسموّها و واش تقولولها هاذيك كامل تجمع في موضوع واحد .

ألوغ هاذ الموضوع راح يكون منكم و اليكم هكذا باش تقترحوا أفكار مواضيع هادفة ، باغ ايكزومبل قضيّة لي مو فغونساز كاسي ( الكلمات الفرنسيّة المكسّرة ) لي صارت مكوّن كبير من مكوّنات لهجتنا للأسف ، و كيما راكم تقراو ، راني كثّرت من هاذ الكلمات باش تلاحظوا مدى تاثّرنا بها ، و سي فغي تغي ديفيسيل نستغناو عليها ، شكون يدير موضوع على هاذ القضيّة بحيث نجمعوا الكلمات الفرنسيّة المكسّرة و نطرح لها بدائل في شكل ردود .

نتمنى تشاركونا بآرائكم و مسودّات مواضيعكم ، أو حتّى أفكار عناوين ، و لي عندو الوقت باه يدير موضوع يأخذ الفكرة من هنا و يحرّر بها الموضوع ، و يعلم اخوانه أنّو تم حجزها ، بالتّوفيق و السّلام عليكم و رحمة الله تعالى و بركاته .