إلى كل من يقول بلّي خانو الزّهر...

[akram95]

السلام عليكم و رحمة الله،
الحمد لله كمّل الباك و ظهرت النتائج، و الآن ظهرت التوجيهات و كل واحد بعثوه وين كتبلو ربّي
لكن البعض مازال مقلّق و ميش عاجبو التخصص تاعو، و الكثير من الناس في عوض ما يشجعو الطلبة الجدد يطيحولهم المورال و يقولو بلّي بعض التخصصات ماشي مليحة و أخطيك و يا لطييف... إلخ
يا خاوتي أحمدو ربّي شوي، بعض من الناس و خاصة الوالدين يتمنّاو أنو ولادهم يقراو في هاذ التخصصات لكن ما يقدروش... البعض صابهم المرض، البعض ما تكفيهمش الشهرية، البعض عندو مصايب كثر منّي و منكم بألف مرة و مازالو يحمدو ربّي...
الكل واش مقدّرلو يدير في حياتو، لأنو نحتاجو متخرجين في كل التخصصات، و كل واحد يكمّل الآخر... لأنو إذا خرجنا الكل أطباء شكون اللي يبني الديار؟؟ و إذا خرجنا الكل مهندسين شكون اللي يقرّي الأجيال القادمة؟؟
و لكل اللي ما عجبوش خلاص، ما عليش، كاين ديما العام الجاي، و اللي بعدو، و اللي فيه الخير يجي بإذن الله...
أهم شيء الآن أنو كل واحد يجتهد في التخصص تاعو، و يحاول يتميز، لأنو المستقبل و التوفيق من عند الله فقط.

اللهم اغفر لنا و ارحمنا و ارض عنا , و تقبل منا و أدخانا الجنة و نجنا من النار و أصلح لنا شأننا كله
الله إني أسألك الثبات في الأمر , و أسألك عزيمة الرشد , و أسألك شكر نعمتك و حسن عبادتك, و أسألك لسانًا صادقًا,و قلبًا سليمًا , وأعوذ بك من شر ما تعلم, و أسألك من خير ما تعلم, و أستغفرك مما تعلم , إنك أنت علام الغيوب
و الحمد لله رب العالمين