لماذا ياا آدم؟؟؟ >_<

[سطايفية بكل فخر]

السلام عليكم
عدنا من جديد

المشاركة الأصلية كتبت بواسطة راية الاسلام1

اهلا بجاارتي السطاايفية
لا يا اختي حاليا رانا عقدنا صلح ان شاااء الله ماينقضوا حتى واحد
انتظر عودتك بفاارغ الصبر
باش نطلع بيك شوية المورااال
العفو

هههه مليح كي عقدتو صلح ديرو هدنة بمناسبة شهر رمضان وكي تشربوا الما ارجعو
+
من ناحية تطلاع المورال رايح يطلعلك ما شاء الله
منين نبدا ولا نقلك من الدخلة تاع الباب ونجي
اولا خزان الاحذية الله يبارك تهز عباد لكن ولا حذاء في مكانو وديما باباها مشرع تقول عليها وكالة من غير بواب
ثانيا كلاكات الوضوء نورمالمون في باب الدوش مي عدنا الله يبارك تلقايها بارتو كابابل تجي ترقدي تلقايها تحت مخدتك
ثالثا بيان الديار والتواقي والبالكون كامل مشرعين والغبار منحكيلكش تهبطلك لاطونسيون نورماليضربك السكر وتنقص الكونيكسيون من راسك
رابعا زعما كي تسيقي في دارنا وتبغاي ترجعي الفرونطوار والبالية لبلايصهم بلاكي تخمي تقلبيهم
لانو يدخلو عليك كي الجيش الماريكاني ويديرو زيارة خاطفة للبيت وهنا ييتحول سيد فرونطوار وانسة بالية لسلاح دمار شامل باش تخرجي العدوان الغاشم من البيت

خامسا كي تكملي ماره وتريحي ساعة عاودي طلي تلقاي الدار باركيكنغ للسيارات
لجوي في كل شوكة وكي تقوليلهم لموهم اونديري با هدرتي وهنا لازم تستخدمي العنف للرد
سادسا النشافة تاع التسياق لي يعقب يمسح بيها سباطو تقول معدناش ليسارفيات الخاصين بيهم
معلاباليش علاش يشتيو النشافة
وياعيني كيفاش يرجعوها قرعة جافيل متنحيلهاش لمر لي في قلبها
خلصنا من التسياق والحذاء نروحو للللباس
لي ينحي حاجتو يعلقها في البروت مونتو مسكين تعوج من كثرة ما هز
الخزانة طلي عليها دزخي يجبدو التريكو من تحت ويقلب وشا كاين الفوق طبقي ولا اقعدي
وحدي ولا اقعي كلش يقلبوهم
ونكيلك حاجة مع صديقتي انا الحمد لله ملحقتنيش
صديقتي ليها اخ كي نحي سروالو يخليه في الارض كيما نحاه يشكل رقم 8 في الارض ههه وكي تجي تهزو يهاوشها يقولها خليه كيما حطيتو ومتبدلي والو في الدجار
ياو كي تجي تمسح الغبرة مثلا تلقا مفتاح تهز تمسح تحتو وترجعو كيما لقاتو سينو يلقب عليها الدار
الحمد لله راني احسن منها باشواط ههه
+
نروحو للكوزينة
ميتجمعوش على الكل ولي تنفحلو يوكل في الدار او توال الميكرو او حتى يدي كاسكروط ويطيع الدقداق تاع الخبز
وطبعا حاجة مترجع لبلاصتها ولازم عليك تكوني تاكسي سارفيس يجيب لحوايج من عندهم
ولما تعسلي المواعن وتخبيهم وتقولي نروح نرقد باش نوض نحارب في الغد
تنوضي الصبح تلقاي المواعن كلي مغسلتيش في الليل بسلامتهم يعاودو يوكلو كي يجيو من السهرة

هذا الاشياء تطلبت رفع شكوى مستعجلة الى السيد بابا لكن للساف مقدرش يسيطر على الوضع وكان فيه تحيز واضح للجنس الذكوري
لذا قررت انا السيدة ماما بفرض حصار للحد من المشكل
واصدرنا فرمنات مفادها الاتي
اولا اي حذاء مش في بلاصتو او حاجة مرمية في الارض للقمامة مباشرة مكانش اعتراض
ثانيا الملابس لا تغسل ويدبرو روسهم يلبسوها هكاك
ثالثا النشافة لي يروح ليها يغسلها وحدوا ويخرجها تشعل
رابعا اي باب محلول ينوض يسكرو
لكن للساف المحاولات تنجح يومين وتفشل شهرين
ويعودون كما كانوا اشرار ومدايرين راياتهم وانا التنفس يروحلي انا وامي من كثرة توجيه الكلام ليهم
والوالد مش مديها فيهم
حتى الضرب لا ينفع فيهم
وهكذا عاشت العائلة بسعادة تامة وربي يعيشهم ويهنيهم ويمد العقل لامهم واختهم
هههه