انضرو إلى حال صديقاتي؟؟؟؟

[ROU7 EL-WARD]

السلام عليكم





علبالي كي تقراو الموضوع راح تقولولي كيفاش تصاحبي بنات كيما هاذوك

بصح هوما متخلقات و متحجبات واشنو مراض بواحد المرض لي هو المشية

مانطولش عليكم و راح نحكيلكم حكايتهم



وحدة تقعد معايا عندها شحال و هي تمشي مع واحد

وكي نقوللها علاش تمشي معاه تقولي نحبو

و تحبيه تمشي معاه؟؟؟ يا سيدي حبيه شكون قالك ما تحبيهش بصح ما تمشيش معاه

واش راح تستفادي

دوك راهي في دارهم خاوتها فاقولها و خرجوها مالقراية

ضيعت مستقبلها على جال حاجة تافهة ما عندهاش معنى



واحد النهار كنا أنا و صحاباتي نحكو

وحدة قالتنا أنا حتى كي نطلع للجامعة و نمشي

وعلاش حتى تطلعي للجامعة باش تمشي؟

قالتنا مازالني صغيرة نخاف يكلخولي

قلتلها ما تمشي لاضوك لا منبعد

قاتلي راني حابة نعيش حياتي

قولولي يرحم باباكم ربي خلقنا باش نعبدوه ولا باش نعيشو حياتنا

و عيشي حياتك كيما تحبي بصح ما تعصيش ربي

شابة هاذي: نعيش حياتي



وحدة اخرى الاستاذ يشرح فالدرس و هي تهدر مع صاحبها فالتيليفون

قال شو

راح يخطبني

و يجي يخطبك علاش ما جاش واش راه يستنى و واش زربكم كي يخطبك و هدري معاه حتى تشبعي





وحدة اخرى هاذي قالتلهم ارقدو

إذا لخرين عندهم واحد هاذي عندها خمسة

وتظل نهار كامل و هي تهدر معاهم فالبورطابل

قلتلها يا سارة واحد يكفيك

قاتلي نجوز الوقت

جوزي وقتك فالقراية الواحد ملي يجي للدار و هو يقرى و ما يلحقش

جوزي وقتك في قراءة القرآن

عاوني يماك فالدار

وماتنسايش بلي الوقت نتحاسبو عليه يوم القيامة

و الادهى من ذلك تهدر معاهم قدام يماها

قولولي الام لي تسمح لبنتها تدير حاجة كيما هاذيك أم

الله يهدي ما خلق



هاذو عينة من بعض البنات يقراو معايا

هاذو بنات همال لوكان نروحو للشباب يادرى

البنات تصيبو تصيبو وحدة ما تمشيش

بصح الشباب مستحيل تصيبو واحد ما يمشيش إلا نااااااادرا



قولولي وين راه دور الوالدين؟

علاش ما يراقبوش ولادهم؟

علاش المشية عندنا ولات حاجة عادية؟



واش نقولو ربي يهدينا و يصلح بالنا ويرشدنا إلى الطريق المستقيم