اول ايام الدخول الجامعي كيف ستكون

[إسلام الجزائري]

السلام عليكم ورحمة الله وبركاته
اختي راني نشوف فيك حايرة بزاف بصح نعطيك نصيحة وهذا العام الثاني نتعي في الجامعة
اليوم الأول ننصحك تعرفي بطريقة حسنة لبعض اللي يقراو معك ومكان حتى خوف تصرفي عادي ،ولا تليني كثيرا من ناحية الضحك والابتسام،واعرفي مع من تتعرفي اللي تعينك في دراستك و اللي توقف معاك عند الشدة واعرفي أن الناس نتع الجامعة راهم عقليات متفرقة ،وراح تشوفي اشياء تدهشك صراحة ،اختي مش باش نخلعك تلقاي بنت بمعنى الكلمة بنت، تلقاي بنت طالقة روحها ،لخرا مهبولة، وحدة طايرة حاسبة روحها مكاش كيما هي،وحدة بنت باباها وماماها. والناس أصناف ولكن أغلبهم 3 صنف يتبع المال،صنف يتبع العصا،وصنف يتبع الكلمة الحسنة،انصحك بالثالثة واقولك لا تكوني من الزوج اللولين،وحافظي الأقسام اللي تقراي فيها باش ما تتلفلكش وحاولي تعرفي نواحي الجامعة جيدا وابحثي عن المصلى والمستشفى خصيصا،أمبعد الإقامة،نظمي نفسك جيدا في الاقامة وصراحة انا ما درتش اقامة لاني قريب من الجامعة ،المهم اتعرفي على لونتوراج نتعك أعرفي متى تفتح المحلات متى تغلق شوفي المطعم وكيفاش العقلية فيه،شوفي بيتك وابحثي عن مكان مخفي،ولوكان كانت معك وحدة تلعب في الغرفة زيرليها خيوطها،المكان المخفي باش تخبي ربما مال ربما امر سري الله أعلم،مثل لدي أصحاب يجيبو معهم حواسيب نقالة يخبوها مور المدفئة ،على فكرة المدفئة ربما ما تشتغلش لذا ما تنسايش غطاء والمطرح جيبي من الدار،ايه نسيت رح تريزيدي أحفظي الكوس ويكتاش يجي ويكتاش يروح ويكتاش يطلع والمحطات واحفظي اتجاهات الكوس،المهم هذا وش نقولط الاساتذة ما نخلعكش ولكن شوفي أخية الاخوة والاخوات عائلتي سواء عرفوني أم لا وش ننصحك بيه انت اخدمي واخطيك من الكلام اقراي واتهناي من الجامعة،وهناك من الاساتذة اللي يحقرك في وجهك وعنده عادي أنصحك وما تخافيش تلقاي عندك اختيار اسمه الطعن يعني واحد آخر يصححلك الورقة وفق شروط ان كانت النقطة اكثر يحسبولك النقطة العالية ان كانت اقل وما كنتيش متأكدة من النتيجة ننصحك اخطيك لانها ان كانت أقل رح العلامة تتقسم على 2 شوفي اختي ونزيدلك حاجة اخطيك من هذوك اللاعبين سواء الذكر أم الاناث تلثاي ناس ضاربينها بكوتبي ما يقراو ما يندبو ويجيبو العام عادي كاين سببين يقرا/تقرا ما توريش،الثاني باباه(ا)/ماماه(ا)السي ولا مدام فلان(ة) ولا علان(ة)الرشوة،وزيدي ما ننساش انوصيك تروحي انت والوالد نتعك او واحد يرافقك دوري في لونتوراج وشوفي المحلات وخاصة أماكن الأكل المكتبات وغيرها،وأنصحك احسبي مصروفك جيدا وبعناية لان لونتوراج نتع الجامعة غالي،ثم تتوالى الايام يوم بعد يوم وتعتادي،ونقولك شيء حاولي ما تديريش بزاف ناس قراب ليك صاحبة وحدة تكفيك،وعليك بقرايتك واخطيك من اللعب وحاولي ما تقعديش في الامعة بزاف خاصة ان كنتي ما تقرايش افري شغالك والسلام عليكم واذا كنتي اختي في العاصمة اخوك إسلام موجود ان احتجت أي شيء إطلاقا وربي ييسرلك اختي وهذا ماشي ليك فقط لكل اخ ولا اخت تخصو (ها) حاجة في العاصمة المعرف لديكم راسلوني وان شاء الله ما يخصكم شيء،------وهذا ان أخطأت فمن نفسي ومن الشيطان وان اصبت من الله وحده---ان نسيت شيء ذكريني اختي،،ايه نسيت الامتحانات ان شاء الله تكون عندك عطلة قبل كل امتحانات ولكن نقولك حاولي تشدي وش قريتي في نهاية اليوم لأنه خاصة ان كنت شعبة فيها الحفظ احفظي في نهارك ما تفرطيش.


وكوني مهنية النهار الأول يجوز بلخف كيما جاز نهاري ونهار كل اخ واخت في الجامعة،والله الكلام في النهار اللول طويل لانه صراحة تلقاي ناس يجو بالزوج يعني زوج صحابات يديرو شعبة واحدة متفاهمين عليه ويجو من منطقة بعيدة ويتشاركو في نفس الغرفة المهم والله انا افدتك بالقليل مما استخلصته من الجامعة
وهذي تجربة تستفيدي منها الكثير الكثير وصح رح تشتاقي لأهلك ولكن أعرف انك رح تعوضيها بطريقة سواء تتصلي بالهاتف أو ببرامج الشات وغيرها مثل ما يفعل الآخرون ،والوصية الذهبية
يا اختي اخطيك من الناس العيانين
ونورمالمو الأمر راهو مفهوم
وربي ييسرلك والسلام عليكم