الى متى الاتكال يا شبابنا

[jiji la belle]

السلام عليكم

هذا اول مواضيعي و انشاء الله مانكونش اخطات القسم و يكون موضوعي مفيد
موضوعي هاذا لا اقصد به اشهار لاحد..او اي شيء من هذا القبيل..لكن هو عبارة عن خبر و نقاش حابة ننقلو للشباب اللي يعانو من البطالة و اللي دايرين في بالهم بللي ماكانش فرص عمل

بما انني من ولاية الجلفة فشيء طبيعي اني اسلط الضوء على الاحداث اللي جارية في الولاية
شخصيا عانيت من البطالة ..............

قبل اسبوع اقيم معرض في دار الصناعات التقليدية في الجلفة للمشاريع اللي دعمتهم الensej..و فتحو هاذا المعرض و قدمو فيهم الشباب اللي استفادو من الدعم المالي و المحلات التجارية مختلف منتجاتهم....عرفت بهاذا الشيء صدفة لما كنت مارة بجنب دار الصناعة التقليدية
و كانت المفاجاة كبيرة ليا كي شفت هاذيك المشاريع...حقيقة تقدرو تقولو صدمت ..لاني عايشة في ولاية و مانيش عارفة واش راه صاير فيها

شفت مشاريع رائعة جدا و شباب تحدو البطالة و تحدو الواقع و اسسو مشاريع شخصيا كنت جاهلة بيها..
درت في المعرض و درت و زدت سقسيت و تمتعت حقيقة...و انبهرت من اجابات العارضين البسيطة........
و تناقشت مع احدهم و قتلو احنا عندنا فكرة انو الشباب يعاني من البطالة و انو المشاريع ماتنجحش..فكان رد العارض انو هاذي فكرة احنا مقنعين بيها انفسنا لهذا مانتحركوش و قاللي انو كل هاذي العروض ناجحة و فيها اللي تعدات التجارة نتاعو حدود الولاية
رجعت في اليوم الثاني و انا حاملة الكاميرا نتاعي باش نصور بعض العروض اللي عجبتني ...(حقيقة باش نبعتها لاختى في الغربة تشوف الشباب الجلفاوي واش دار) لاني ضد انو احنا مانتمتعوش بالامكانيات
مؤمنة بللي ولايتنا عندها امكانيات خيالية و قادرة تكون رقم 1 في الجزائر
برك لو كان نبدلو عقليتنا...
من بين الاشياء الغريبة اللي شفتها انو في وحدة فتحت مدرسة للتكوين بقرض مديرية التشغيل....و الله نستعرف بيها
مشروع فريد من نوعو بالنسبة لي انو يفكر واحد يستلف قرض باش يفتح مدرسة للتكوين و يضمن استمراريتها

المهم يا جماعة اذا عجبكم الموضوع راني باذن الله نحط الصور اللي عندي في الكاميرا و ماذا بيا تشاركوني رايكم في هذي القضية

و نقول لشباب ولايتي و لشباب الجزائر..راك قادر تصنع المعجزات ..فمتتهاونش