بلوة العصر (النقال)

[ali herzallah]

[بلوة العصر (النقال)
مَرْضْ الْعَصرْ افْحَالْ عنّا وَسَّحْوَجْ
..........يَا وَيحْ اللّي رَاحْ تَبَّعْ ذَالْمَوجَة
مَالُو عَقْلِي فَزْ مَنّي وَالدَرَّجْ
........مَنْ بَعدْ الْخَمْسِينْ وَدَّرتْ الزّوجَة
اسْبَابِي نَقَّالْ قَرَبْنِي لَلْهَجْ
........كَاثَرْ فِي لَسْوَاقْ سَلْعَة مَنْتُوجَة
ذِي انْوَاعْ امْسَتْفَة مَانَتْحَوَجْ
........حَسبْ افْلُوسِي جَايْبُو ذَالْقَجْقُوجَة
يَتْـنَقَّلْ لَبْرُورْ فَجْ امْقَابَلْ فَجْ
........ويدَهَّمْ لَغْيُومْ حَرْ وْ مَثْلُوجَة
بَايُوعِي بَالْكَارْطَة مَنْ صِيلْ النَّجْ
........وِيحَشَّمْـنِي دَايْمًا ذَاللَّجْلُوجَة
مَانِيشِي بُو مَالْ بَامْوَالْ النَتَّجْ
........وْمَانِي مَنْ رِجَالْ لَعْمَالْ وْ رَوجَة
أنَا عَبدْ اضْعِيفْ مَا عنْدِي مَخْرَجْ
........لاَ مَدْخَلْ لاَ جَاهْ رَقْبَة مَعْرُوجَة
ادْخَلتْ الْمَيدَانْ غَبَّارِي عَجَّجْ
........وَاشْرَيتْ الْمُوبِيلْ وَانَا فِي حَوْجَة
فِي لُوَّلْ مَبْهَاهْ دِيمَة نَتْفَرَّجْ
........بالصّورَة وَالْوَانْ زَيْنَة مَدْرُوجَة
يَهْتَفْ بالْفِيبْرُورْ بَالرَّعشْ إزَعَّجْ
........وْصَادِي بالنَغْمَاتْ وَامْعَاهُمْ رَوْجَة
مَا فَرَّقتْ امْصَارْنِي كِي تَتْوَلَّجْ
........والاّ نَقْرْ اعْرُوقْ فِي ذالدَّحْرُوجَة
زغْدْ اتْخَلَّطْ فِي احْزَامِي دَايَرْ رَجْ
........دَغْدَغْ قَلْبِي وَالْقِوَايَمْ مَخْلُوجَة
دِيمَة انْفرْفَدْ فِي اعْضَايَا وَانْمَلْوَجْ
........خَلْعَة وْ فَرْحَة قَاعْ فِيَا مَمْزُوجَة
إقَـدَّحْ بالنُّورْ بَالْوَانْ اتْهَجْهَجْ
........نَجْمْ افْجَارْ اتْلاَعْبَتْ فُوقْ ابْرُوجَة
خَارَجْ صَوتْ الزَّايْخَة مَنُّو يَبْهَجْ
........فِي عَقْلِي ضَنَّيتْ مُهْرَة مَسْرُوجَة
دَرتْ اخْلِيلَة مَا اتْفَارَقْنِي بَالزَّجْ
........وِيذَا مَا نَفْلِيكْسِي تَرْجَعْ جُوجَة
مَا نَعْرَفْ خِيّالْهَا غَيْ صَوتْ إعَجْ
........وَاحْنَيَّنْ مَخْدُومْ يَذْبَحْ فَالسَّوجَة
وْ كَثْرَتْلِي لَسْمَايْ مَدْرُوجَة تَهْدَجْ
........اسْمَا وْ لَيلى زِيدْ لَحَّقْ خَدُّوجَة
فِي وَذْنِي حَطّيتْ بَلْوَة وَ انْمَوَّجْ
........نَتْكَلََّمْ وَالنَّاسْ مَنِّي مَزْعُوجة
نَشْبَهْ لَبْرَازِيلْ بَافْلاَمْ انْدَبْلَجْ
........وْ لَكْلاَمْ الْمَعْسُولْ دَايَرْ قَجْقُوجَة
هَاذَايَا مِيسَاجْ مَكْتُوبْ امْرَهَّجْ
........خَطَّاطُو بَاحْرُوفْ لُوغَة مَعْفُوجَة
كَثْرَتْ فِيهْ امْكَارْ للْقَلبْ اتْخَرَّجْ
.......لاَمَامَاسْ ابْصُورتْ الْعَارْ ابْرُوجَة
هَذَا ابْـلاَفْرَارُوجْ وَاكْلِيبْ إرَوَّجْ
........يَسْقِي مَنّو ذَاكْ كُلَّشْ مَنْسُوجَة
وْ هَذا بَبْلِيتُوثْ فَارَسْ وَامْسَرَّجْ
........يَجْبَدْ مَنْ لَبْعَادْ قَلبْ الْمَخْرُوجَة
كَثْرَتْلُو السُرَّاقْ وَاكْلاَبْ اتْنَجْنَجْ
.......بالْخَطْفَة وَافْكَارْ عَادَتْ مَنْهُوجَة
كَايَنْ فِيهْ اصْوَاتْ بَجْيَاحْ اتْمَرَّجْ
........يَسْغَلّوهَا غَيْ النَّاسْ الْمَفْلُوجَة
هَذَا إيْبِيبِي ذَاكْ سَاهَرْ وِيهَرَّجْ
........وِيقَزَّنْ بَارْقَامْ حَوَّسْ لَفْجُوجَة
الدِّيلِي مِيسَاجْ مَكْتُوبْ امْخَرَّجْ
........ازْرَبْ يَامَخْتُولْ عَمَّرْ لَجْلُوجَة
نَقْرَاطِي فَالْكَارْطَة لَرْقَامْ ادَّجْ
........ارْبَعْطَاعَشْ قَاعْ لَيَّا مَرْهُوجَة
لاَلِي طَالَبْ شَافْ حَالِي وِِيبَرَّجْ
......رَزقْ وْلاَدِي رْقَامْ طَارَتْ مَبْعُوجَة
الْهَدْرَة بَفْلُوسْ مَانَاشْ انْهَرَّجْ
.......وَالّلي مَا عَنْدُوشْ وَدَّرْ حَجْحُوجَة
والّلِي عَقْلُو طَارْ مَهْبُولْ إقََجْقَجْ
........اتْسَاوَينَا قَاعْ للنَّاسْ افْرُوجَة
خَلِّينِي يَا زَايْخَة لاَ نَدَّحْرَجْ
.....الْعَومْ النَّاشَفْ فِيهْ خَطْوَة مَزْلُوجَة
وَالعُمرْ إِِذَا رَاحْ للدَنْيَا عَفَّجْ
........مَا يَنْفَعْ تَسْقَامْ عُودْ الزَبُّوجَة
عَنْ مَرْتِي يَا جَايْحَة مَا نَزَوَّجْ
........وَاُمْ اولاَدِي مَا اتْقَارَنْ بَالْعَوجَة
خَلِّينِي فِي حَالْ حَالِي نَتْبَهَّجْ
........أُمْ اعْيَالِي صَايْنَة نَعمْ الزَوجَة
فَهْمَتْنِي وَاسْنِينِْهَا فَاتَتْ تَبْهَجْ
......مَثْلْ الْوَرْدَة الزَّاهْيَة نَبتْ امْرُوجَة
بَنتْ الصِيلْ الزَايْخَة غَيْ تَسَّحْوَجْ
.....بَينْ اوْلاَدي مَا اتْصِيبْ الْمَمْرُوجَة
رَبَّايَة بَالدِّينْ وَ اخْلاَقْ وْ مَنْهَجْ
.....فِي دَارِي حَطَّيتْ عَدْلِي وَ الجُوجَة
عَنْ مَرْضِي بَدْمُوعْهَا تَبْكِي وَ اتْلَجْ
......طُولْ الليلْ اتْبَاتْ عَنِّي مَقْبُوجَة
مَا انْفَرَّطْ فِي زَينتْ الْوَردْ امْعَسْلَجْ
.......وَالنُوَّارْ انْوَاعْ فِيهْ الْمَرْهُوجَة
تَفْرَحْ فَرْحِي بِيهْ تَعْمَلُو هَوْدَجْ
.....بَالصَدقْ وْ لَخْلاَقْ هَاكَذْ مَنْسُوجَة
يـَا رَبّي يَا خَالْقِي عَنَّا فَرَّجْ
......مَنْ ذَالدَنْيَا الْفَانْيَة فِي ذَالْهَوجَة
احْفَظْنَا مْنَ الْعَارْ وَالِّي مَسَّوْفَجْ
......وْ حَيَدْنَا عَنْ كُلْ عَذْفَة مَخْمُوجَة
عَبدَالوَاحدْ قَالْ رَايُو وَ اسوْحَجْ
........مَاهُو قَاضِي مَا إشَبَّهْ لَلْخُوجَة
سَالْ امْجَرَّبْ عَامْ في الْبَحرْ وْمَوَّجْ
.......وَسْنِينُو عَدََّاتْ ضَاقْ الْمَعْفُوجَة
مَانِي ضِدْ اعْلُـومْ للْخَلفْ انْرَوَّجْ
......وَالتِكْنُو فِي لُوغتْ الْعِلمْ ابْهُوجَة



الشاعر : علي عبدالواحد حرزالله