وبش أداني لزوج نسا

[آدم نجيم]

قولو لي يا إخوان.... شبان رجال ونسوان

راني عايش في لمحان....وضياق علي لمكان

عيب تخلوني في حيرة....ماهيش ساهلة خطيرة

أنا خوكم يا اهل الغيرة....قبل ما نلبس الأكفان

نشرح عيب علي نخبي....على شيبي عماني ربي

في الغرام اصبحت مدربي....وهاهي اخباري بما كان

عندي ثلاث اولاد ومرتي....ثلاثين عام قلتلها كبرت

وخذيت وحدة نتيجة بنتي....واحسبت روحي مالشبان

الزوجة الأولى قالتلي....باولادي ما تفرط في

ما نخليك تروح علي....للضرة ويخلى لمكان

أنايا مولات الدار....وأم لثلاث ولاد صغار

تهرب عنا عيب وعار....واش يقولولي النسوان

نغلق بابي ونخرج عنها....ونزور الثانية نطمنها

نفهمها ونتبرى منها....من الغيرة والعصيان

قاتلي أنا طفلة صغيرة....لازم تحكمني الغيرة

تخليني وحدي في حيرة ....ما نقبل يوم أو يومان

قلتلها أنا موظف....باولادي وداري متكلف

انزورك لازم واخفف....وانولي هاذا ما كان

بدرت للأهالي تشكي....واللي تشوفوعني تحكي

تندب تعيط وتبكي....ودموعها تسقي فدان

خليتها جيت للجزائر....متنكد متعذب حاير

ولعنت اللي دار ضراير....مثلي في هاذ الزمان

ادخلت لداري في حالة....مرتي دارتلي شقلالة

قالت يا عرة الرجالة....تخليني مع الصبيان

يلعن الضرة عجباتك....هاهي فالمحنة خلاتك

على آخر عمرك جاتك....زهواني وبيها فرحان

المرا اللولة تشقلل عني....والثانية زقاها هبلني

عقلي طار وسافر عني....ليل ونهار في لمحان

هارب ليكم يا لحباب....راني مخلخل راسي شاب

راني مشتت عقلي غاب....ما الضراير يا إخوان

شوفولي كاش حل....قبل ما نهبل ونختل

أو للحراش نسهل....نقضي حياتي في لسجان