فصل الربيع بعيون الفلاح الفلسطيني

[ابن العروب]

الربيع في عيون الفلاح الفلسطيني

غني يا زهر الدحنون
وارقص يا خبز الطابون
طاح الشومر والزعتر
وودعنا سقعة كانون


فرحت عنزة جارتنا
لبست لاخضر قريتنا
من الخبيزة مونتنا
والبزيلا ام قرون


الفلاح اللي مكيِّف
مع انه الجو مصيِّف
بدو شهرين ونيِّف
وهو يوكل بقلة بليمون


من الصبح بدري يقوم
يحضَّر لقنابة لكروم ( قنابة : تقليم)
بحمل ع ظهره القدُّوم
ويكشكش نتش وطيون ( يكشكش : يزيل )


بتطربني هالعصافير
تغرد قبل الشمس تنير
ع التوتة تهدِّي وتطير
بلبل قبَّر وحسون


والا مقيقات الشنار
في نيسان وفي آذار
والمداحي بالقنطار

( المداحي : الاعشاش)
باضت هون وقاقت هون



ميِّل بزِّر فول اخضر
وشوف الحنُّون الاصفر
ولقِّط خُرفيش وزعتر
لملم واشوي حلزون


وان عْطِشِت في ميِّة
ميِّة مُكُر شتويِّة

( مُكُر : حفرة في الصخر تتجمع فيها مياه الأمطار )
وريحة الميرمية
اطيب ريحة بكل الكون


حضر لزراعة الصيف
خلي تراب الأرض خفيف
الكوسا والفكُّوس نظيف ( الفقّوس : قثاء يشبه الخيار)
وشمِّر رجل البنطلون


شو بدِّي احكي تاحكي
قريتنا خير وبرَكِة
الله يديملنا الضحكة
بارض الزعتر والزيتون