قاطو بكري بحلة جديدة سهل واقتصادي

[أم محمد تاج]

صباح النور عليكم يالحراير البارح درت قاطو بساط الريح تاع بكري بصح أضفت عليه بعض التعديلات نخليكم مع الصور ومبعد الوصفة انشاء الله:

الوصفة: 5 بيضات+كأس سكر+كأس زيت+3مغارف كبار عسل+فاني+2مغرف صغار معبيين بيكاربونات الصودا+فرينة تلمي بيها, أعملي عجينة عادي مثل تاع الكروكي راهي تجيك تلصق بفعل البيكاربونات بصح أستعملي معاها الزيت وقت العمل نحي تقريبا قيمة 4جوزات من العجين وشيحيه بالفرينة باه ترابيه مبعد على الوجه أقسمي العجينة الى قسمين قسم لونيه بالكاكاو حوالي مغرف كبيرة كاكاو أسود ومبعد عاودي قسمي اللونين الى قسمين أي تتحصلي على 2 بالكاكاو و2 لونهم أبيض حلي أي طبقة تحبي تبداي بيها انا بديت باللون الأبيض بسطته في البلاطو ومبعد زدت حليت الطبقة الثانية على نيلو باه تسهل عليك حملها ووضعها على الطبقة الثانية ومبعد طبقة معجون مشماش ومبعد الطبقة البيضاء ومبعد الطبقة السوداء كي تكملي لوحي عليها معجون المشماش ورابي الطرف الي خليتيه ويبستيه بالفرينة على الوجه وذرذري النواد كوكو وأثقبيها مليح وحطيها طيب على درجة حرارة 180 أي كيما نطيبو المسكوتة والفرن حامي من قبل وساعة ساعة طلي عليها كي يحمارو الجوانب خلاص طابت وراهي تعمل نبولات ماتخافيش أنت أثقبيهم بالكيردون, ضرك يتحمص النواد كوكو مع المعجون والعجينة يعطي بنة هايلة ومبعد كي تبرد خلاص قصيها وذرذري عليها السكر قلاصي بالصفاية وشهية طيبة