بسم الله الرحمان الرحيم
السلام عليكم ورحمة الله وبركاته
أنا رح نطرح هذا الموضوع علبالي رح نلقا بزاف النقد و نقد كبير
مي واحد مراح يغطي الشمس بالغربال
الغاشي ازعما تنتاقد المرا و يقلك النساء حكمو البلايص كامل
بصح نقلكم المرا تستاهل و هي فور على الراجل
أنا راني نحكي عن تجربة شخصية و حوايج شفتها في حياتي ميش من الفراغ
نبداو من الأب و الأم
كاين أسر قدر ربي يفترق الزوج والزوجة
الراجل يتزوج ويدا حياة جديدة
بصح المرا تقلك ما نطيش ولادي تبيع الذهب ديالها تخدم عند الناس دير المستحيل باش تكبر ولادها وتقريهم و الأب و الله ما علبالو بيهم
نروحو للسبيطار الله لا يوصلنا ليه
واحد الخطرة جدي مسكين مريض نيفو مجروح الراجل يقلك الحوايج راهم يطيبو مكانش الدوا مكانش الفاسما ...... ما شفو شايب كبير مسكين يتمسخر بيه
تجي الفرملية مرا تجيب المقص تجيب الدوا تجيب الفاسما داويه وحلاوة اللسان تقولو متخافش بويا رح نداويك الله يكثر خيرها
رحت مع بابا لقسنطينة عند واحد الشريكة خدم فيها عام باش يزيدوهالو فلا روترات
بيرو كاين راجل وكاين مرا الراجل قالو راني كتبتك زيد شهر و ولي ممبعد هدر بابا مع الطفلة لي لتما قالها بنتي حالي بعيد وديري فيا مزية خدمتها وداتها عند المدير مضاها وجابتهالنا الله يكثر خيرها
الليسي رحت البارح عند المراقب قتلو شهادة مدرسية قالي غدوا ارواح
رحت عندو اليوم قالي المدير مكانش يا ربي يكفاش ندير أنا غدوا رح نروح للولاية عندي خدمة
رحت عند المراقبة هدرت معاها راحت دقيقة جابتلي زوج وجات يكثر خيرها
هنا برك فالانترنت تحط موضوع تلقا الجنس اللطيف يرد عليك ويشجعك
الذكر يدخل خير يهبطلك المورال ولا يقولك هدرة خاطية يردك هاك الا من رحم ربي
يقولك المرا ما تصلحلها المسؤولية عاطفية
المسؤولية للراجل خير
مالا نقلكم المرا تخدم بالعاطفية والقلب الحنين
مي الراجل يخدم بالتايهوديت و القلب لكحل
هذي هي الوقت عيشة خير من عياش
درك كاين لي رح يقول هذا حلاب باسكو في وقتنا لي يهدر الصح يولي حلاب وووو أنا قلت لي في بالي لي معجبو الحال يقنعني هذا مكان
وش رايكم في كلامي صح ولا لا ؟؟
ولي يقول لا يقولنا علاه ميش تنقد هكذاك برك
الموضوع منقول اتمنى ان القى تفاعلا منكم
دمتم بحفظ المولى
( تقرير عن مشاركة سيئة )، و الموجودة أسفل كل مشاركة .
2013-01-10, 20:00
المــــرا خيــر من الراجــــل في كلش
العرض الشجري