طريقة سهلة لصنع الديول

[*أنسام*الجنة*]

السلام عليكم


راح نكتبلك الطريقة الي نستعملها في تحضير الديول وتجي أوراقها هايلين

ومايلصقو

أول حاجه كيما قالت بنت سكيكدة لازم مقلاة طيفال من النوع الجيد

ولازم تبقى غير للديول وتاني حاجه ماتغسليها ب la vetteأنتاع لماعن

لاخاطر تتجرح ,يعنى اغسلوها بإسفنجه باش ما تتجرح وتولي تتلصق

المقادير


500غ سميد+2مغارف فرينة+ملح+ماء دافئ حتان تتلم لعجينة

لكن تبقى شادة روحها كيما عجينة الرخساس

ومن بعد نخلوها ساعه وهي ترتاح

ومن بعد نبدوا نعجنوا فيها على لقسى ونزيدوا الماء بالشوي بالشوي

حتان تولي طرية

لكن أنا نطريها أكتر من عجينة لمحاجب المهم تبقى تقدري تحكميها بإيدك

ومن بعد نخلوها ساعة أخرى ترتاح

ومن بعد نحطو الطيفال على نار في الاول قوية شوي باه تسخن المقلاة

ومن بعد نقصوا عليها حتان تولي خفيفه كامل

وقبل هذا نمسحوا المقلاة بقطعة من البصل

ومن بعد نأخدوا شوي من العجينة ونحطوه في المقلاة ساير داير

من الخارج للداخل وكي نكملوا كامل وتتغطي المقلاة

تسنيها شوي برك يعني لثواني ونحيها

باه ما تيبس وتولي تتكسر

إن شاء الله راني أفدتكم بشوي من تجربتي

وإلي ما فهمتش مليح راني هنا نعاودلها