الطبعة العاشرة لدورة الرقي بمدبرة منزل مثالية

[~ حراير ~]

السلام عليكم و رحمة الله تعالى و بركاته
ايييييييييه يا سندس بعد طول راحة و طول تفنيين و قضية غير منين يشوف احمد راكي رجعتيلنا بالسلامة و الحمد لله
رااني كنت ناوية نقولك بلي مول الدار مازل هنا و كي يروح تجيني اختي و خلي نبدأ السمانة الجاية لكني عاودت لعنت الشيطان و خزيته و نضت على 4:30 على ما حليت عينيا و الكل نايمين رحت للكوزينة و فرميت الباب على روحي شعلت إذاعة القرأن لقيتها قصار الصور
انا أصلا عندي غير 2 بلاكارات واحد كبير و لوخر صغير و من عادتي نرجع كل حاجة في بلاصتها الكبير عاودت بدلتلو الطوانسيريات تاعو و رجعتلو ماعنو في زوج طاجيرات الفوق و سقمت الريفيطايما في 2 طاجيرات الوسط و من تحت حاطة غير بيدون الدقيق و بدون الفرينة و ماعن طياب الكسرة والقصع سقمتهم حتى هوما و نظمتهم ماداوش مني حتى 20دقيقة طولت فيهم باش ما نقربعش
زدت البلاكار الصغير فيه الطناجر سقمتهم و حتى هو بدلتلو الطوانسيري تاعو
غسلت الطوانسيريات و نشرتهم فم غير على الكرسي لقيتها مازال الحال قلت نكمل القجور و عينك ما تشوف غير النور القجر الأول فيه المغارف و ولاد عمهم لاباس بيهم الثاني فيه الكيسان لاباس بيهم لثالث فيه المناشف خرجتهم كامل و رنختهم في صابون مارسيليا سايل و شوييية جافيل رغوي و لحتلهم شوية كربونات
و القجر الرابع تاع حوايج القاطو يا يما يا يما ساشيات و بلارات فارغين و ارواحي تتفرجي يتسما كل يوم ندير القاطو نجبد و ندك هكاك برك و الي شريتو جديد كامل مخليتهم في ساشياتهم
عاودت نظفت العلب "البلارات كامل" و حطيت فيهم الخميرة و الفاني و الملون الأبيض و ليبيبيت تاع الشوكولا .... و شحال من حاجة كانو في الساشيات فرغتهم و نظمتهم حسب الأولوية و الإستعمل
القجر التحتاني ما عندو ما فيه غير حوايج التنظيف خزم و شوية لوامب "لمبة الضوء" و ... المهم اني نظفتو كي خاوتو و فرات
و زدت مسحتو مليح من لور و رجعت لقجور لبلاصتهم
و قلت خليني نبل لعجينة خليها تتبت هاداك هو نعجنها بالساهلة و جبدت لوازم الغداء و العشاء من الكونجيلاتور و زد مسحته حتى هو و مسحت الفريجيدار كا نظيف أصلا بصح والله ماقدرت نمسحو من لور الأولى نظيف و الثانية الناس كامل راقدين هيهيهيهيهيه المهم و وجدت العشاء حطيت شوية خضرة تفور و درت دوزينة تاع الحوت باش حدني مع يديكونجيلا نفوحو بيها و وجدتلهم الفطور و حطيتو في لسينية في غرفة الجلوس ايا انا دخاتلها و انا لقيتها شوية مش منظمة نظمتها و فوت عليها بالية مليح و غلقت الباب حتى أذن الصبح نوضت مول الدار ييصلي و درنا الوظيفة مع بعض هو رجع يرقد و انا رحت للعجنة انتاعي شفتها خلعت منها عاودت جبدت العجانة يعطيها الصحة عاونتني طيبت الكسرة حتان كتافي تهراو هي عادت 8 و انا كملت رحت غسلت طرافي من ليدام و قلت نوضهم و مبعد قلت خلي نجوز نشافة خيرلي من تلبازهم جوزت نشافة على كامل الدار "بقاو غير بيوت النوم" و انا دخلت للدوش غسلت طرافي و وجهي و فرشيت سناني و مشطت شعري و درت كحل لعويناتي و شوية احمر خدود و ملمع سحري نوعية رفيعة لشويرباتبي و شوية ريحة و بدلت قشي و نوضت لبنات الأولين و مول الدار و فطرنا عجبتهم الكسرة مع الحليب هاداك حدهم حتى العصير تاع الشينة و الشي لوخر ما مسوهش
خرجو لبنات مع باباهم كملت وجدت لعشا و طيبت تشيشة للغداء و نظفت بيتي "بيوتهم نظفوهم وحدهم" و بديت نخدم في حبيبات قاطو غير عجنت و غطيت بعد الغداء كل واحد شد بلاصتو و قعدت انا مع قاطواتي كملتلهم و درتهم في كراطن صغيورين و غلفتهم بالساشيات "تعرفو الرجال ما يحبوش المواعن" صليت العصر و قلت نضرب طلة على حباباتي لقتهم يديردشو ما حبيتش نطول خاصة و اني قلبي مقبوض نضت على راي فطيمة توضيت و بديت نراجع وش حافظة في سورة الكهف قلت نكملها لقيت روحي مش ناسية الحمدلله حتان الآية 14
كتبتلكم تطبيقاتي و شوف وش راح ندير ما بين ما جاو البنات مع باباهمراهم راحو للحديقة