اليوميات الرمضانية لكل عضو ....

[سعاذ]

سلام عليكم
اسماء ان شاء الله تكوني مليحة
انا دوك نبدالك من نوض حتى نرقد غير ماتمليش برك
انا نوض قبل من سحور بساعتين او ثلاث نصلي ونقرى القران حتى يقرب وقت الصحور نوجد سحور مع يما وحجا لي لازم تكون في سحور لمدة 30 يوم هي مسفوف برايب وباقي عادي كيما كامل الناس بعد السحور نزيد نصلي ونقرى قران حتى الاذان نصلي ونقرى شويا قران ومن بعد نقرى الجرنال وكاشي كتاب حتى لسابعة خاطر انا من النوع لي مايوليش يرقد المهم السابعة ندوزن شربة فريك ونوجد كاشي حجا لفطور ونروح نخدم على التاسعة وشحال يعجبني حال طريق خالية وقهاوي مسكرين المهم وين نخدموا الدوام من التاسعة الى الرابعة لرجال ولنساء من التاسعة الى الثانية وانا من النوع لي مايشتيش يهدر بزاف سرتوا في رمضان واغلب الاوقات ندير كتمان ونسمع الاذاعة او القران كي نروح نصلي ومن بعد نسمع واحد حصة تاع الطبخ في الاذاعة ونرقد على الاقل نصف ساعة ونوض لشغل تاع الدار وحنايا في رمضان مكانش واحد مايخدمش ماعدى الرجال كي يوصل وقت العصر نصلي و نقرى قران ونولي للكوزينة مابين لعجين تاع المطلوع و خبز الدار وحوايج اخرين كي يبقى ساعة لفطرو نقسم هذيك الساعة 15 د للاستغفار 15 لتسبيح 15 لقراءة القران 15 لتحضير المائدة ورمضان لي فات في وقت لفطور كنا نتفرجوا رسوم متحركة يحكي على الانبياء ومن بعد لماعن وصلاة
وخيتك من النوع لي مايشتيش يسهر يعني لاقعدت للعاشرة ونصف اني درت انجاز كبير
وفي رمضان ماكانش جرنال تاع الطبخ ولا تاع الدين ومانشريتوش
وانا من النوع لي مايكلش بزاف المهم في رمضان نعود مانبانش
ومانشتي لافلون لا زلابية لا صباع لعروس لا ديسير حتى الماء لوكان مانشوفهمش يشربوا مانشربش
تقدري تقولي عايشا قدرة الاهية
كل عام وانتم بالف خير