الخيانة الزوجية

[مشكلتي]

السلام عليكم ورحمة الله وبركاته
اشكركم كثيرا كثـــــــيــــرا على منحى هذه الفرصة حتى نعبر على وش كاين فى قلبى آه وش كاين فى قلبى انا مشكلتى بلاك تشوفها صغيرة وهى عندى عظيمة عظيمة لوكان تعرفوا
فى البداية انا شاب جزائرى متدين شوى او هكذا احسب انفسى المهم ان ابى رجل ديكتاتور فهو من الحجاج الى يتحكموا فى هذه البلدة والناس كامل ترجع ليه فى امورها بالمختصـــــر هو من أعيان مدينتنا الصغيرة وكبار تجارها . ذات مرة رجعت من العمل وكى لحقت للدار لقيتو عند الباب قالى وجد روحك راك رايح تتزوج الشتاء الجاى شتاء 2013 اختلطت علي المشاعر ما عرفت لنفرح ولا نغضب نفرح لأنى رايح نتزوج ام نغضب لأن أبى ماشورنيش الرأى وما خذاش موافقتى . نعم للأسف أبى زوجنى فى صفقـــــة من صفقاته جاء واحد حاب يدير معاه الشركة أيا قالوا نزوجو أبنائنا لبعضاهم باه نولوا نساب واحباب وزيــــد انا شايف روحى صغير على الزواج 25سنة برك ومنيش مستعد نفسيا ليه اما ماديا الحمدلله خدام وعندى منزل تاع الوالد قاسملنا رزقو
المهم ماكانش والدنا باه يشورنا في الرأي وهكذا زوج أبناءه ذكـــــور ولا اناث يعني خطبونى وزوجونى كي الطفلة ...يا ذيك التبهديلة كي نتفكرها مانرقدش ......
مكانش عندى الوقت و لا الفرصة باه نتعرف على زوجتى هذه بعثت اختى تقصها ليا قاتلى لاباس وتصلى وجابتلى صورتها فظهرلى انها زينة وشابة وتزوجنا زواج تقليدى
بعدما تم الزفاف كى جبتها لدارى بعد حوالى شهر تقريبا بدأت اكتشف زوجتى يا جماعة زوجتى هذه جريئة جريــــــئة بزاف وماتحترمش زوجها مانيش عارف كيفاه نفهمكم فهى تسمع الغناء عادى قدامى وترفع صوتها ياسر وقبيحة فى الهدرة تسب كيما يسبوا الاولاد فى الشارع ومن اول زواجنا وهى تطلب منى نشتركوا فى النت وكل ما نجى من الخدمة الا وتفكرنى بالانترنت وتقولى لازم نديروها ورانى والفتها كيفاه دارنا مافيهاش نت وملى كنت عند بابا كانت عندنا الكونيكسيون صدعتنى حتى رحت وطلبت التوصيل وجبتلها الانترنت ولكن للاسف بردتلى رجليا فهى ماكنتش تستعملهاش بزاف مرة على مرة برك وواحد النهار كى دخلت للدار لقيتها تسمع فى الاغانى ودايرة صور الفنانىن وتشاتى فى الفيسبوك وكى شافتنى ماحبتش تحشم ما قادرتنى انا ماهدرتلها والو رحت للمدام واعطيتها درس فى الأخلاق بالاضافة إلى \لك انها مش قايمة بالبيت وماتخدموش وماهيش متعاشرة مع اهلى ولامع جيرانى كامل يشكوا منها لا صلاة لا ذكر الله كل هذا دارلى حجرة فى صدرى ولو اننا لسع متزوجين لوكان رانى ريقلتها ....... ......
واصلنا حياتنا إلى جا اليوم المشؤووم جات صاحبتها العانس على 9وجابتلها فلاش ديسك وقالتلها عمريه وخيريهم بالحبة المهم مافهمتش قصدها إلا انى العشية احتجت الفلاش ومالقيت الا فلاش صاحبتها قلت نعمر فيه امور ونعاود الويندوز ونرجعهم كى فتحتو وش لقيت فيه الوسخ حاشاكم انا عينيا ضبابو وليت نشوف على ربعة وبصح حبيت نتأكد ونقطع الشك باليقين وقررت انى نعسها ونرقبها وبعد نهارين على الـــ10 تاع الليل حطيت راسى رح نرقد وهى راحت تكونيكتى خليتها قيس ما شاعلاتو رحت ليها خفية لقيتها فاتحة المواقع اللعينة ومرتاحة وكان الامر عادى وانا تحكمى وحد الهستيريا رحت مباشرة هزيت الميكرو وكسرتو وبديت نضرب ونركل ونخننق وفى كل مكان من جسمها وسحبتها من شعرها وضربتها على الحيط وهى تعيط وتبكى وانا مش سامعها تحولت الى وحش صدقونىماقدرتش نتقبل هذا الموقف كيفاه مرتى تخونى كيفاش مراة مسلمة من عايلة محافظة تسمح لنفسها تشوف اعضاء وعورة تاع الكفار واليهود انا منسمحلهاش ومنبرئهاش ونرخصها ونسبها ونبصق عليها لصبت سواء عازبة ولا متزوجة اصلا ماديرها إلا دنيـــــئة وسافلة وحقيرة وماتشرفش المسلمات العفيفات الطاهرات الطيبات ومانمدلها حتى عذر مهما كانت الظروف والى تشاهد فى الافلام مهما دارت من حجاب ما تقدرتش تخبى حقيقتها الوسخة كيفاش ياعباد مرأة لاباس عليها بزوجها تروح ترخص روحها هاك وتتخيل انها تكون مع هذاك الممثل الكافر النجس .... المهم قطعتها تقطاع وكليتها نية ولحتها حذا الباب ولحقتلها حجابها المزعوم ... وهى عيطت لخاوتها وتخاصمنا وفكوا بيناتنا الجيران والصباح جا الوالد وخويا وامي للدار وداوسونى الوالد قالى يا الطحان علاش ضربتها علاه انا كنت نضرب امك يالى ماتسواش بهدلتنى قدام الرجالة انا ماسكتش عليه ورجعتلوا الحديث وقتلو لوكان شاورتنى في الراي ياخى انتا الى فرضتها عليا وماعندك مادخلك فيا . خويا ماحملش وجا يضربنى فضاربت انا وياه المهم راهم منايفينى الان وهى راه عند باباه ماخلانيش الوالد نطلقها وزيد راها تشوه فى سمعتى ونشرت عليها حوايج مش فيا وقالت عليا ضعيف في ذاك الامر زورا وبهتانا رانى نتالم وحدى والدى مش راضى عليا ولا حتى امى قالتى لوكان طلقها طلع لباباك السكر والدم وخاصة ان باباها صاحبو وزيد انا منيش حاب نقول السبة باه مانفضحهاش وخايف اذا مايشوفهاش سبة تاع طلاق .... رانى فى حالة انا كنت حاب المرأة الى تكون سندى ونتاعونوا فى كلش الزواج مش فراش برك الزواج راه حياة اخرى اولاد وتربية وحصان ومودة ورحمة ومنزل ورسالة رانى حاشم حاشم