صابلي خمسة خمسة

[ريتاج تيارتية]

اليوم جبتلكم قاطو قديم عندي عندي شحال ماخدمتوش كي درتو اليوم قلت نحطو في المنتدى اقتصادي وزاكي

مانطولش عليكم

نبدا بالمقادير
5حبات بيض
5 كيسان صغار تاع اتاي سكر
و5 كيسان صغارزيت
ملعقة صغير لافاني
3 خمارة كيميائية انا ساعات نخدم غير بزوج
والفرينة قيس ماتلمي العجينة
التحضير
نخلط البيض مع السكر مليح ومن بعد نضيف الزيت بلا ماننسى لافاني ونخلط مليح من بعد نضيف الخميرة مع شوي فرينة ونبدا نلم في العجينة بالفرينة حتى نتحصل على عجينة طرية
اذا شكلتوها بطابع الفرفارة والصفارة كل واحد واش يقوولو خلو العجينة طرية بزاف باش يجي هشيش
كيما راكم تشوفو

نشكلها كرات صغار باسكو في الخميرة بزاف ويزيد في الحجم كيما سبق وقلت يقطعلك كمية مليحة
وتحطي الكرات في صينية الفرن مرشوشة بالفرينة وتحكمي الطابع وتضغطي شوي حتى يخرجلك الشكل كيما راه موضح في الصورة






كي تكملي الكمية دخلي للفرن سخون من قبل على درجة 160 ومايديش طياب بزاف يطيب غير من تحت
لما يطيب نلصق كل زوج مع بعض بالمعجون ونزين الحواف بجوز الهند حسب الرغبة ومن الفوق درت معجون ملون بالاحمر
والشكل الاخر كيما راكم تلاحظو درت شيكولا



تقدرو تشكلو اي شكل باغيينو بصح ضيفو شوي فرينة اذا خليتوها طرية بزاف تغلبكم بصح مش بزاف طرية باش ما يجيكمش يابس
صدقون هذا القاطو هااااااااايل سيرتو اذا خدمتوه وخبيتوه في علبة بلاستيك كل ماطول يزيد في الهشااشة
سميناه خمسة خمسة هههه باسكو فيه من كل شيء خمسة تقدرو تنقصو من المقادير يقدر يولي ربعة ربعة كيما يولي ثلاثة ثلاثة هههههههههههههه
ان شاء الله تكون الحلوى عجبتكم