لوبيا ماشطو من مطبخي بطريقة جديدة ولذيذة

Nada perla · 2014-04-18, 21:32

لوبيا ماشطو من مطبخي بطريقة جديدة ولذيذة جدا شفتها ف المنتدى من فترة طويلة

السلام عليكم ورحمة الله تعالى وبركاته
اليوم جبتلكم طريقة جديدة باش اتحضري لوبيا ماشطو وعلى ضمانتي راهي اتجيك بزاف بنينة متقدريش اتقاومي الطعم الرااااااااااائع

نبداو بسم الله بالمقادير

لوبيا ماشطو على حسب افراد عائلتك
ثلاث حبات بصل كبار
اربع حبات طماطم طازجة
كمية من اللحم المرحي
شوية ارز
شوية معدنوس
خمس حبات بيض
شوية فرينة
شوية شابلوغ
فرماج غابي
ملح وتوابل على حسب ذوقك
زيت للقلي

طريقة التحضير
تنقي اللوبيا ماشطو ديالك وقطعيلها غير الاطراف وغليها نص طياب وصفيها وخليها تبرد
اللحم تاعنا اندوزنوه مع الروز والمعدنوس والملح والفلفل الاسود وانديرولو حبة بيض
نحكمو كمشة لوبيا ماشطو تكون عندها نفس الطول نستفوها وانحطو داخلها شوية لحم مرحي على شكل صباع ونغلقو عليها ونربطوها بخيط الطهي وانقطعو الاطراف اللي خارجين باش اتجي متساوية وهكذا حتى انكملو اللوبيا تاعنا كامل

ملاحظة رح تلقاي حبيبات لوبيا ماشطو يتفتتولك او يفضلولك
متتقلقيش
انتي رايحة اتطيبيهم
احكمي البصل قطعيه طويل جمريه ف الزيت وضيفيلو الطماطم بعدما تكوني رابيتيها وخليهم يتجمرو مليح ثم مرقيهم وكي يغلي المرق ارمي الداخل هدوك اللوبيا اللي فضلولك وتاني اللوبيا اللي حشيناها بالفيونداشي
نغلقو الكوكوطة تاعنا ومنطولوش عليها قيسما يطيب برك اللحم اللي داخل
كي يطيب كلش انحو اللوبيا اللي فارصيناها بالفوينداشي وانخلوها تبرد ثم انحولها الخيوط كامل
نرمدوها ف الفرينة ثم البيض ثم الشابلوغ والى المقلة اللي انكونو سخنا فيها الزيت وانقصولهم النار وانخلوهم يتحمرو
كي تكملي كامل اللوبيا تاعك خليهم يقطرو ثم ديريهم ف بلا تاع الفور وحطي فوقهم فرماج رابي وحطيهم شوية ف الفور
ثم قدميهم مع لاصوص تاع البصل والطومعطيش

ان شاء الله انكون وفقت في ايصال الوصفة بكل خطواتها وان شاء الله تعجبكم وتجربوها خاطر راهي بنينة بزاف واللي ميحبش اللوبيا ماشطو رايح يولي ياكلها بهاذ الوصفة
ايا بصحتكم كامل انخليكم مع الصور اللي ان شاء الله رايحة اتوضح اكتر طرق التحضير بصح كنت شوية مزروبة مصورتش كلش
واللي عندها اي استفسار ان شاء الله راني رايحة انرد عليها وانفهمها
متنساونيش من دعواتكم وردودكم الجميلة

بالهناء والشفاء