كم يقدر المهر في ولايتكم

[anise2011]

المشاركة الأصلية كتبت بواسطة بوسعادية2012

السلام عليكم

قريت الردود واستغربت معناها الشاب مسكين ما يقدرش يتزوج طول عمرو

مايقدر يشري دار وما يقدر يكري

ولولزمو هو للزواج غرفة نوم مثلا مايقدر يديرها مع الغلاء الفاحش لى رانا نشوفو فين

ويزيد يمد ثروة للعروس من مهر وذهب وكساوى وكباش

منين؟
بركة من ربي فقط ناس راهى عايشا

عندنا في بوسعادة الحمد لله مازالت الرحمة والرفق بالناس كاين
نصدقكم القول وربي شاهد مانيش نزيد ولا نفقص

_ بالنسبة للعائلات العريقة في البلاد والله العظيم ما يشرطو دورو كى يتقدم الخاطب يشرطو الهنا ويقولولو لى تقدر عليه ما نكلفوك

_وكاين عايلات بدون ذكر اسمائهم والله العظيم غير العريس جاب مهر واب العروس وسط الجماعة نقص دراهم مبلغ رمزى مقدار غرام ذهب وقالو تفظل الباقى زيدو في درا ك وهادى صارت من قريب
_وكاين عايلات تخاف ربي يقولو للراجل حنا ما نشرطو فيك وحنا نديرو وش نقدرو نجهزو بنتنا

_العامة من ناس اقصى حد للشرط 12 و13 مليون ويزيد معاهم خاتم وسلسلة وخلاص
_وكاين لى تزوجو ب5 و6 و7 عادى
اصلا عندنا عادة في البلاد لي يشرط في بنتو عيب يقلك ماهيش حاشاكم بقرة للبيع

وما ننكرش كاينين عباد ما نعتبرهمش عايلات اصلا هوما لي يشرطو ويعصرو في الرجال عمبالهم كى يشرطو باش ما يحقرهاش وما يطلقهاش

والله امنيتى يكون المهر فكل مكان حسب السنة اشرف الخلق السيد محمد صل الله عليه وسلم تزوج وزوج بناته بمبالغ رمزية

علاه مانرجعوش كى ايام زمان كيما تزوجو يماتنا وجداتنا يجيب يكسيها ويدي ربي باركلهم في زواجهم وذرية وعاشو سعداء

وش من فرح بقا في الزواج حاليا رغم ان المبالغ العملاقة وتكاليف ولخساير لى مايرضاش بيها لا ربي ولا العبد المسلم

وش بقانا اصلا الفرح وزواح اصبح مظاهر باه الناس يقولو فلانة عطاوها ايه وما بقا لا بنة ولا طعم اعراس الرهج وزواج الفاشل

نسبة طلاق البنات راهى تزيد يتزوجو في الصيف ويطلقو في الشتا وش نفعهم المهر ودراهم

سامحونى هاد موضوع بالذات كارثة كاننا غير مسلمين تخلينا على السنة
عاندنا الاجانب في كل شي
بصح اهم شي الزواج ما حبيناش نعاندوهم
الرومية يجيبلها الراجل خاتم طير بالفرحة وتبكى شغل عطاها الكرة الارضية بخيراتها زواج بسيط في كنيسة لا حلويات الملاين لا الماكولات لى تروح خسارة في زوبية حاشاكم
زواجهم ما يخسروش عليه مليون
حتى سيارة العروس يزينوها حشاكم بغوكى من لور يقربع
وحنا راكم تشوفو وين وصل
كون جيت من شباب نديرو اضراب
والله غير حرام
سامحونى خرجت على الموضوع حبيت فقط كلامى يوصل للجيل الجديد لعل وعسى نراجعو حسابتنا ننساو كلام ناس ومجتمع ونطبقو كلام ربي والنبي

والسلام عليكم

شكرا اختي البوسعادية على موضوعك وردك الرائع لانني حينما كنت اتجول بين اسطره وعبق عباراته تاكدت بان الجزائر بخير ومازل فيها الفحلات نعم فحلات ثورة نوفمبر انجبت الذهب الخالص شكرا على مرورك الطيب وردك الاطيب يا طيبة
ابشروا يا شباب الجزائر مازالت بخير والي مايتزوجش بوسعادية مات اعزب