ماذا افعل

[مشكلتي]

السلام عليكم ورحمة الله
انا فتاة علقت في كثير و كثير من المشاكل في هذا الركن و اليوم احتاج ان اضع مشكلتي هنا عسى ان اجد لها حل و اريد التحدث بالعامية بدل الفصحى

عمري 22 سنة طفلة خاطيني العلاقات و هدرات التلفون و نخاف من ربي و والديا في مرات كثيرة يضايقني الشباب يحبو يهدرو معايا كيما تعرفو حيل الشباب احدهم يقولك نهدر معاك واذا تفاهمنا نخطبك و اخر يقولك نيتي لحلال و هكذا بصح الحمد لله عطاني ربي عقل نخمم بيه نعرف هذا الشي فاني و لا مرة وقعت في فخ احدهم ولو التزم الامر في كثير من الاحيان كنت نخبر اخي اذا شخص مافهمش روحو و استمر بمضايقتي
لكن البنات صديقاتي او بنات الجيران او حتى بنات العائلة يقولولي من حقك تعرفي شخص او فلان راهو يحبك و مافيها والو راو يخطبك صح و هكذا بصح انا الحمد لله مانسمعلهمش حتى كي نخمم في كلامهم بيني و بين نفسي نرجع نستغفر و نقول يا ربي احميني و عففني
في الفترة الاخيرة من حوالي سنة بديت نحس بلي عندي فراغ في حياتي كبير مع اني نصلي و نقرا في المصحف لكن دائما حاسة بلي ناقصتني حاجة وناقصني اهتمام حتى في المنزل كل واحد لاهي في همو ندير اعمال المنزل و نريح وحدي و مانكذبش احيان كثيرة نحس بلي نفسي رح تضعف ونخاف نهدر مع شخص في الهاتف او نسمع لهدو لبنات و نرجع نستغفر
رجعت في كل صلاة من الفجر للعشاء نقول ''' اللهم اغنني بحلالك عن حرامك ''''

من شهر كنت مع الوالدة بعد الصلاة التقينا امرأة شافتني قالت لامي بنتك مخطوبة قالتلها امي لالا قالتلها خويا كلفنا بالخطبة و بنتك عجبتني و حكاو بزاف و اخذت رقم هاتف امي
وقت اتصلت قالتلها خويا عمرو 30 سنة لاباس عليه قاري خدام مستقل بسكنو لكن عندو مشكلة انو تزوج بنت خالتو كي كان في العشرينات يمكن في 26 و بقات عندو شهور فقط و طلقها و انجبت فتاة بعد الانفصال و قال مستحيل نرجعها لان المشاكل بينهم كثيرة و كانت حتى الطبيخ ماتطبخلوش وقالت اختو بلي راو يلوم نفسو يقول كيفاش دمرت حياتي على سوء اختيار دام لاشهر
ماما قالتلها كيفاش و لالا و المراة بقات لاصقة سقسينا عليكم ناس شكرتكم شكرت باباها و خاوتها و شكرولنا في الطفلة راح بابا سقسى عليه قالولو الناس بلي هداك انسان مليح بزاف ومربي و بلي كاين ناس عرضو عليه حتى يزوجوه بناتهم
امي اول مرة قالتلها مكانش نصيب لكن عاودو رجعوا عندنا وبقاو مصريين عليا
و انا دائمة الدعاء اللهم اغنني بحلالك عن حرامك و اكرمنا بالحب الحلال
امي في الاخير قالتلي الامر بيدك اذا انت وافقتي كلنا موافقين وهذا الرجل ماشرط والو قال حاب فتاة تصون عرضي و تحفظ غيبي و المشاكل ماتقيسهاش لاني لا علاقة بيني و بين طليقتي
الشاب اعجب الجميع باخلاقه و شكر به الجميع في عمله و انا الان محتارة خايفة الناس تحكي و تقول كيفاش باباها مدها لراجل مطلق بدون مايعرفو عليه والو و امي قاتلي وش عندك في كلام ناس اذا نتي موافقة
وانااخاف ضعف النفس و دائما حاسة بلي ناقصني اهتمام ومانيش حابة علاقات عاطفية و ماشابه ضميري مايهنينيش وهل هذا سبب مقنع باه نوافق على الزواج؟
وفي نفس الوقت حشمت نقول لماما ايه راني موافقة وخايفة من كلام ناس يقولو تزوجت من شخص مطلق وش بيها مزروبة مع اني مانيش مستعجلة على الزواج ونخاف يجي يوم يقول واحد راني حكيت مع فلانة ونخاف يجي يوم و النفس تضعف نغلط وندخل في دوامة العلاقة العاطفية كيما راني نشوف وش صاري في البنات
زائد اني اعاني من مرض مزمن( السكري )يعني في هذا الوضع ممكن هو لي يرفض امي قاتلي اذا وافقتي بعد مايديرو الرؤية الشرعيه قوليلو اذا وافق كان به اذا ماوفقش الله غالب
في شكلي الحمد لله في خدمة الدار نسلك راسي لقرايا حمد لله مثقفة ومكملة قرايتي اما العمل لست عاملة

انيروني هل رأيكم يساعدني فانا مشوشة من جهة خايفة كلام الناس من جهة حشمت نقول لماما انا موافقة و من جهة خائفة من فتن الدنيا