هل اسافر بدون محرم

[salam algeria]

السلام عليكم
انا مغتربة في امريكا و عندي ثلاث سنين ما هبطتش للبلاد و الصيف هذا باذن الله رايحة و راني فرحانة بزاف لكن الشيء لي مقلقني هو السفر بدون محرم
راجلي مايروحش معايا لكن من بعد يلحقني و نرجعو مع بعض و السبب هو الخدمة تاعو وحتى كي عطاوه عطلة غير 25 يوم و جاتني بزاف نغيب كل هاذ المدة و نصرف قريب 5000 دولار و نبقى 25 يوم برك و في الوقت ذاتو مانيش حابة نغضب ربي
حوست في النت على فتاوى السفر من غير محرم و طبعا لقيتها حرام لكن لقيت فتوى تقول اذا وصلك محرم للمطار و استقبلك واحد اخر حلال لكن عندي مشكلتين اولها اني مش متاكدة من الفتوى و المفتي و الثانية اني لازم نركب زوج طيارات يعني يركبني راجلي في شيكاغو و نهبط في المانيا و نبقى ساعتين و نزيد نركب للجزائر و يستقبلني بابا
مع العلم eان 25 يوم قليلة خلاص يومين يروحو في المروح و يومين في المجي يعني بقاو 21 يوم و اولادي لازم يتعرفو على اهلنا ثما اصلا هوما مايعرفوش زوج من اولادي غير من الس ك ا ي ب و الثالث ماهوش متفكرهم خلاص
من فضلكم لي يعرف كاش امام يسقسيهولي و راني كتبت الحالة تاعي بالتفصيل باش تعاونوني و لي يعرف موقع موثوق تاع الفتاوى يكتبهولي وجزاكم الله خيرا