سؤال للجميع

[soso sirin]

السلام عليكم.اولا الف الف مبروك على الفوز و التاهل لمونديال 2014 و ان شاء الله تكون نتيجة مليحة و تكون احسن من مونديال 2010 .لا اضن ان هناك جزائري لم يفرح بهذا التاهل حتى و ان كان لا يتابع و لا يهتم بكرة القدم صراحة في بيتنا الكل كان مهتم و طلعونا الضغط و السكر سوغتو مع الدقايق الاخيرة .مناصرة الفريق الوطني ليست مقياسا للوطنية و ليس من حق اي شخص ان يصف الاخر بانه غير وطني او ان مناصرة الفريق حلال او حرام و ليس من حق اي احد ان يكفر من يناصر الخضر.من حقنا ان نفرح لانه انجاز كبير من الناحية الرياضية لان كرة القدم هي رياضة و ليست مشروعا اقتصاديا حتى ندخلها في حساباتنا الاقتصادية او السياسية رغم ان الرياضة قد تخدم الاقتصاد بشكل كبير و حتى بعض الوجوه الرياضية تم اقحامها في الجانب السياسي راني بديت نتفلسف نرجع للموضوع خير.
ما لم استطع هضمه هو المبالغة في الفرحة صراحة حنا شعب مانعرفوش نفرحو و مانعرفوش نزعفو رجعنا شعب يبالغ في كلشي .لما قعدت نشوف في التيليفيزيون و الشعب الي دخل في حالة هيستيرية حتى الاطفال حكمتهم العدوى حنا التلاميذ المؤسسة الي نخدم فيها خرجو على السيطرة البورطاي تاع المؤسسة قريب يكسروه و مانهدروش على الحجر تقول رانا في فلسطين حسيتها فرحة لكن فرحة يخرجو فيها الزعاف او الضغط .كاين ناس ماتت و ناس انجرحت ربي يرحم الي ماتو ان شاء الله و يصبر اهاليهم .
الفرحة مليحة لكن من الاحسن تكون بعقل .و قبل مانهدرو و نقولو انو راهم يفسدو دراهم الشعب على جلد منفوخ نتفكرو الي اختلسو اموال الشعب و راهم عايشين في الخارج.الوضع الي رانا فيه رانا كامل مشاركين فيه و الشعب هو تاني مسؤول لما شفتهم واش دارو على التذاكر و ناس باتت في الزنقة على جال ماتش يديرو تاني هكا باش يطالبو بحقوقهم و يولو يخرجو تاني مع الصباح بكري و يروحو يخدمو .مش الخدمة يروحو على 10 و الماتش يباتو في الزنقة.و كل حاجة في بلاصتها مليحة .والله اكثر حاجة غاضتني الناس الي ماتت و مش حتى سبب يستاهل الواحد يوصل روحو للموت الفرحة و ماجاتش كاملة.