أبي ومشكلتي

[مشكلتي]

السلام عليكم ورحمة الله تعالى وبركاته
بعد ماكرهت،ومالقيت لمن نحكي،ضاق صدري وواحد ماهو فاهمني
قلت نجي لندكم تنحو علي شوية خاطر نشوف في العادة ردودكم ولي تكون معظمها في المستوى وفي الصميم
انا خدامة،وهذا هو المشكل،أبي هو لي يقبضلي دراهمي في آخر الشهر ويتصرف فيهم كيما يبغي،وما يعططينيش الا حق ما نركب بحكم اني نخدم بعيد على دارنا شوية،اذا شتهيت حاجة ولا بغيت نشريها لازم حتى نقولو،خاطرات يعطيلي وخطرات يقولي ما عنديش،قلت لأمي تهدر معاه ما حبتش،صدقوني مرة كي دخل الشهر طلبت منو مبلغ معين عطاني 50 ألف والله العظيم غير نصدمت،وعلاه نظل نخدم وفي الاخير يعطيلي 50 ألف؟؟صدقوني حتى امي ماهيش فاهمتني واش دير 50 ألف بحق الله؟؟تقولي راكي مخصرة ورايحة تربحي دعوة الشر بالصح والله ماراني فاهمة علاه نربح دعوة الشر انا قلتلها قوليلو يعطيني مبلغ محترم قد ما نكسي روحي ونشريالحوايج لي نستحقهم
والله العظيم خطرات نحشم،مانلبس كي الناس،ماناكل كي الناس،ما نصدق وندير الخير كي الناش غير شيعة أنا خدامة،قولولي زعما راني ظالمة؟؟
حتى الزواج مانعو عليا،والله العظيم شحال من واحد تقدملي وكانوا ناس ملاح بزاااف بالصح هو رفضهم بلا ما يخبرني،علاه انا ماعنديش الحق نعيش كاي انثى،نتزوج ونستقر وندير دار ونجيب اولاد،هل هذا حرام مثلا؟؟
كل ما يجي ليه واحد يقولو بنتي مازالت صغيرة مع العلم انو عندي 23 سنة،بالصح لوقتاش نبقى هكذا؟؟صدقوني كرهوني بسببه يقولولي كنا حاسبينو ناس ملاح بالصح ظهرالعكس
كنت نحترمو بزاف لكن للاسف رجعت نكرهو،هو ابي بالصح والله العظيم ماعدت نحسو هكذاك عدت نحسو يشوفني دراهم وفقط،مع العلم أنو هو خدام ولاباس عليه
خبروني واش ندير؟كيفاش نتصرف معاه؟؟واش نقولو؟؟راه يدي دراهمي بالصح بلا مانسمحلو انا
ماتقولوليش برك حبسي الخدمة،أكيد مارايحش يقبلو،وزيد والله غير يدير فيا حالة اذا قعدت مقابلتو
على وجه ربي ادعولي اليوم الجمعة،ولكم بالمثل ان شاء الله
راني نصلي،ندعي،نبكي وننتظر من ربي يفرج