لكل العضوات اللواتي طلبن وصفة الشاش تفضلن

Narimene Meriem · 2013-09-12, 22:02

السلام عليكم حبيباتي
اسفة جدا على التأخير راح نبدا مع وصفة الشاش لان الكثيرات طلبوها ومن بعد نحط وصفة السيار ان شاء الله

المقادير و طريقة التحضير:
250غ مرغرين طرية فلوريال+كاس سكر مسحوق +فانيليا نعملوهم جيدا باليد حتى يدخل السكر مليح في المرغرين ثم نضيف 4 بيضات ونخلط و في الاخير نضيف الفرينة و كيس خميرة كيميائية تدريجيا حتى الحصول على عجينة طرية كيما نتاع الصابلي و نتركها جانبا

الحشو:
3كيلات نوادكوكو+كيلة سكر مسحوق+ملون برتقالي أنا استعملت الوردي

لانو ماكانش عندي البرتقالي و جاتني على قلبي

علاخاطرش نموووووت على الوردي

ثم نبللوهم بقليل من ماء الزهر ما تكتروش والا راح يخرجلكم الحشو كي تطيب

نحلو العجينة رقيقة بالحلال على شكل مستطيل و نفرشو الحشو على كافة المساحة المبسوطة و نترك حوالي 1سم في الاخير
نضغط باليد أو ملعقة على الحشو ثم نلف حوالي 5 أو 6لفات نتحصل على حربوش نلصقو في الاخير ببياض البيض ونقطع قطع بالسكين
نقلبو الحبات و نسقموهم باليد و نضعهم في صينية و ندخلوهم للفرن المسخن مسبقا
كي يطيبو من تحت نشعلولهم من فوق ينشفو شويا ولكن مالازمش يحمارو
كي يخرجو من الفرن نعسلوهم

ما صورتش المراحل و لكن اذا عاودت خدمتو نصورهم و نحطهم ان شاء الله
اللي عندها اي سؤال أنا في الخدمة