قراتان قوس قزح بنة وبها

[heaven's road]

السلام عليكم
واش راكم انشاء الله كامل بخير و صحة و عافية
انا زوجي يموت على الخضر بانواعها طايبة مفورة مرحية انا الصراحة نحب الحاجة لي تطيب في الفور فقررت البارح نجمع بين الخضر لي يحبها زوجي و انو تكون طايبة في الفور الشئ لي نحبو انا و خرجلي قراتان رايع بنة و بها و زيد ما يديش الوقت
المقادير بطبيعة الحال كل وحدة و العايلة تاعها المهم نحتاجو
لحم مرحي
بطاطا
جزر
جريوات
بصل
ثوم
جلبانة
بيض
كريم فريش
معدنوس
جبن بيض و جبن مرحي
توابل
الطريقة
اول حاجة حطي الجلبانة تطيب في ماء مع شوية ملح



في الوقت لي تطيب فيه الجلبانة قطعي البصل طوليا و حطيها تتقلى في شوية زيت و تضيفيلها الثوم رابي و شوية ملح كي تذبل خلاص نحيها و حطيها في صحن تاع الفور



ترابي البطاطا في لا راب و لا الروبو الشئ لي عندك و تحطي تقليها مع شوية ملح كي تتقلى فرغيها مع البصل



تقومي بنفس العملية مع الجريوات



ايضا الجزر



و اللحم المرحي



تكون الجلبانة طابت تصيفها من الماء و تضيفيها للخليط


في وعاء يكون كبير تحطي البيض كيما انا درت اربع بيضات و ثلاث ملاعق كريم فريش الملح و الفلفل و راس الحانوت و الزنجبيل و المعدنوس خلطتهم مليح



و من بعد تحكمي تفرغي الخليط تاع الخضر لي حطيتيه في صحن الفور على الخليط تاع البيض و تحطي قطع من الجبن الابيض و تخلطي الكل مليح بملعقة




من بعد تعاودي ترجعيهم لصحن الفور و تحطي فوقه الفرماج مرحي انا ما كانش عندي حطيت طراف من الفرماج الابيض




تغطيهم بالالمنيوم و الى الفور يطيب و هادا بعد ما طاب



و هادا بعد التقديم




عندي ملا حظة صغيرة تولهو فقط للملح خاطر كل حاجة تملحيها و ايضا ماتكتريش من الزيت للقليان باش ما تجيش ميدمة

و بالصحة و العافية