كيفاه ندير؟؟

[مشكلتي]

السلام عليكم ورحمة الله
عمري 22 سنة عاملة والحمدلله،عملي هو المشكلة من لي بديت نخدم الناس كامل حارت فياـتخرجت من لقيت الخدمة من ترسمت ثم ثم،وللأسف كامل يولوا يطمعوا حتى اقرب الناس ليا،ما نعرف غير انا نتحسس ولا صح،بابا من لي بديت نخدم دايلي الشاك وهو لي يتصرف عاذ الشي نورمال حتى انا ما عنديش شكون لي يجبدلي دراهمي بالصح ماعنديش حق التصرف فيهم،صح لي نقولو عليها يجيبهالي بالصح انا نبغي لوكان يعطيهملي في يدي،عندي عمتي محتاجة نبغي نعاونها بالصح ما نلقاش في يدي دينار،هاذ المرة كان عرس قريبتي بغيت نشري ملابس جديدة قتلو قالي ما عنديش راني نبني،هاذ البنيان بدا غير من لي بديت أنا الخدمة،غريب والله،تخيلو ما يجبدليش على الزواج خلاص لي يجي ليه يقولو لالا بنتي مازالت صغيرة والادهى والامر انو يتبدل عليا نهار لي يجي واحد يخطب،عمرو ماقالي نسمع غير من برة ولا خطرات يجو لمكان عملي،انامارانيش نلوم فيه ولا نقول لياه بالصح شوية على الاقل يدي دراهم يخليني شوية نخمم في مستقبلي،آخرتها رايحة نتزوج وندير الدار،لي يشوفو يتساءل علاه ماراهش باغي يزوجك ويحيرو كي مايلقاوش عندي دورو باه نتحرك،والله غير نشوف لي ماراهمش خدامات خير مني،يلبسو خير مني وعايشين خير مني،الحمد لله على كل حال بالصح دايمن نتساءل وعلاه؟؟،خطرات نقول ياليتني ماخدمتش والله غير كنت هانية في راسي،اذا تناقشت معاه دايمن يقولي الناس كامل ناديين غير باباك للي لا،واذا قتلو مرة هاذ الشهر راني محتاجاتو يقولي خلي مازال الحال حتى نسلك من الدين،ياربي وينتا يسلك من الدين؟؟
قولولي راني غالطة كي نقولو عطيني دراهم؟؟
وياهل ترى انا بنت عاقة على حساب هدرتي؟؟
كيفاش ندير معاه؟؟
والله غير راني حايرة
ربي يفرج عليا وعليكم وعلى كل مؤمن
شكرا لنصائحكم مسبقا