التجارة الالكترونية في الجزائر

[bakhire2000]

بسم الله الرحمن الرحيم
بعد تفكير عميق و عصر لكل خلايا المخ المسؤولة على الفهامة لم اجد اي فكرة ابدا بها موضوعي
تذكرت شياء واحدا . من حوالي 6 او 7 سنين رايت اشهار لثلاجة lg الذكية .ثلاجة بها شاشة متصلة بالانترنت تشتري كل شيئ تحتاجه .طبعا يتم برمجتها مسبقا على الاستهلاك اليومي .(بديل جيد لاخي الذي يروح يشري بالسيف و يزيد يدي الصرف) المهم شوفو هما من سنوات وين كانو
ارواح حنا في 2013 وين رانا مين نبدا
1-العملة
اولا ممنوع تشري العملة الصعبة من البنك و زيد مكانش مصارف و فوق هذا و ذاك كي تقول للمسؤول في كاش بنك جزائري وين نلقى العملة الصعبة يقلك في السوق السوداء (وهذا ميخافش من الدولة و لا كيفاش)
ثانيا كي تحب تبعث الدراهم للخارج ممنوع (حنا نحشولهم هما يبعثولنا و حنا نصحروهم )
ثالثا انا و اعوذ بالله من كلمة انا عيطت لوحد البونكة (زعمة بونكة) رفدت عليا وحدة تخدم في الرسيبسون (زعمة وحدة خاطاك مورها بليامات عيطتلي هذيك الودة نتاع نتلر باش تاكتفلي الكونت فقت بلي الوحدة نتاعنا مشي وحدة بلاك زوج ولا ثلاثة) ايا و سقسيتها قلتلها خصني bic نتاعكم قاتلي واش هو bic قلتلها السويفت قاتلي درك نفوتلك الشاف سرفيس(زعمة مسؤول) سقسيتو قلي منعرفهمش عيط للريزو انا عيطت للريزو قلي مشي هنا عيط للشاف سرفيس
ايا الشاف سرفيس قلي واش حاب ادير بيه قتتلو باش نستقبل دراهم من الباي بال قلي واش هو الباي بال كوبيتلو في وجهو
بونكا كاملة متعرفش السويفت و حاب دير تجارة الكترونية (هاذا وين فهمت علاه قاع الي يشريو مالانترنت اول حاجة يشروها هي السيجارة الالكترونية )
رغم كل هذا تجد البعض يطيح و ينوض و يحصل على بايبال مفعل و فيه الدولار واش يدير يروح يشري من النت و يصيب اتصلات الجزائر بالمرصاد
2 اتصالات الجزائر
اولا شفت فالاشهار نتاعهم (الاختيار الافضل ) هنا وسوسوني انا لي علبالي بيه بلي راهم وحدهم فالجزائر اذا كاين شركة وخدخرة راهي تقدم فخدمة الهاتف الثابت و النترنت نورونا الله ينوركم خطاك اذا كاين وحدة واش تخطار.
ثانيا اول مرة نشوف شركة وحدها فالسوق تكلاسي الثالثة مفهمتش علاش
رابعا الافضل مين جابوها واك الا بديت نحكي على الانقطاعات و 3g وو منكملش
خلونا منها خير
3 بريد الجزائر :غير كيما بعثتلهم رسالة فالدعم الفني (زعمة) عندها سمانة مزال مجاوبوش خطال سالتهم وين نقدر نتبع الطرود نتاوعي (هههههههههههه) هوما و مايجاوبوش .
الطرد من الصين للجزائر يدير 3 ايام و من مناء العاصمة الى جانب مناء العاصمة دير ثلاثة اشهر
كي تحب تبعث حاجة للخارج مكان رقم تتبع و كلش ممنوع الا التمر ؟
اصلا الموقع نتاعهم فيه غير ccp الشهرية دخلت ولا مدخلتش و بس
انا كي نشوف الرسائل الي يجو من فرنسا تغيضني عمري على البراوات نتاع 5 دينار الي رانا نبعثوهم
4 الجمارك
الحجة الاولى مكان لا سكانار لهم يحزنون افتح الطرد مكانش كونفيونص
ثانيا الا عجبتني نديها و بعث الطرد فارغ خلي غير الشارجور
ثالثا الجمركة 5000 دج بغض النضر على سعر السلعة حتى و اذا نسرقت تخلص الغرامة
رابعا يعاودو يبلعو الطرد بالسكوش نتاع لومبلاج مكان لا شمع لا هم يحزنون زعمة الا ما عجبتش الجمارك تعجب نتاع البوستا ( الفاكتور هو التالي زعمة اذا صحتلوا)
واذا السلعة نتاعك مداوهاش هذو الكل سور يديهالك واحد صاحبك بعد ما دير موضوع في منتدى الجلفة طبعا
سمحولي خاطر كتبت بالدارجة خاطر الموضوع متقدرش تكتبو باللغة العربية
تحية لكل شخص يشتري من الانترنت هواية برك
صح رمضانكم و نتمنى قاع الي راهم يستناو في الطرود نتاعهم توصل ان شاء الله و السلام عليكم