زوجي التافه

[مشكلتي]

السلام عليكم
مع اني علابالي راح تجيني هجمات ولكن عادي تعودنا الي ان مللنا وكللنا

انا متزوجة عندي سنة
ادرس حاليا في الجامعه عندي 24 عام
زوجي تاجر عنده 27 سنة

وبحكم القرابه واشياء غبية وتافهة ارتبطت به وقد حسبته من زمرة العقلاء
وحتى لا اظلمه هو كريم لدرجة غير محدودة لكن
الحياة عنده محصورة بين ماديات وعزائم وولائم
مواضيعه كلها تافه حتى النقاش فيها يجيب الضغط
يعني امس كنت جالسه اطبع بعض الاوراق الخاصة
يجي وينحي الاوراق ويطفي الطابعه من يدي ويقول اسمعيني باغي نهدر
ما علينا اهدر
تخيلوا الموضوع انه شاك في الي جابله الخضره ممكن يكون غاشه في الكميه مع اني شاكه في مصداقيه القصة لانها موش خاشه دماغي وكانه باغي يحكي وخلاص وحتى لو كانت صحيحة
باغيني نروح نحسبله عدد حبات البطاطا ولا وش باغي
انا ساكته مرديتش وش راح نرد عليه من اساسه
سكت ومبعد قال انتي اصلا في واد وانا في واد
وانا ساكته
وزاد رد وقال نروح للي تفهمني خير لي
حكمت اعصابي و رديت عليه بكل برووود وقلتله وعدي مبعد جيب معاك الحبر تاع الطابعه راه قرب يخلص راني محتاجته
فكان رده انه هز طابعتي المسكينة وكسرها قدامي وقالي اي وحده تتمنى مني اشاره وانتي ....
وانا ساكته حتى خرج وللوقت الحالي هاز نيفه ويهدر بالمزية

يا عباد الله وش ذنبي ولا وش راح يكون ردي كي يجي يهدر معايا في البصله والطماطم
عام طول واحنا الطماطم البصلة ومشتقات الخضر والفواكه حتى زعما كي يدلعني يعيطلي فرازه
يرحم باباكم هذا شخص طبيعي
و كي يقول لي ولا يشكيلي طلعت البطاطا وش راح نرد عليه . حاولها يا عمري بلاك تهبط ؟؟؟

حتى لو قلت نرومانسي معاه شوي لازم يدير حاجة تجيبلي الاحباط فالصباط
حتى نحرم نقرب منه وهو يا يتغابى او انه غبي فعلا ويزيد يرد انتي حاكمتلي الكلمه وتقارني فيا بفلان وونكون كي علان
وانا والله عمري ما جبت سيرة حد ولا قتله كون كي حد