امر وارد الحدوث لكل الشباب (( يا ربي وما يصراليش ))

[عطر الملكة]

السلام عليكم و رحمة الله تعالى و بركاته
شوف خويا حسين


عن تجربتي الخاصة احيانا المشكل يكون في الشاب

علاقة الزواج لو ما يكون فيها صراحة و تفاهم على شروط معينة صدقني تعرض الشاب و البنت لمواقف حرجة يحرجوا انفسهم و يحرجوا والديهم و يدخلوا في دوامة الرفض و القبول

شوف في ايام الجامعة خطبني شخص من عائلة معروفة هنا بالجلفة انا فرحت و قلت الحمد لله هذا اقصى ما اتمناه و غير نكمل جامعتي نتزوجوا حتى اني اقترحت فكرة انو نتزوجوا ونكمل قرايتي و انا متزوجة هو قال لا كملي قرايتك في غرضك من الاول كنت صريحة لاقصى درجة و حكيتلوا على شروطي

من بينها شرط العمل و شرط السكن عندي او يوفرلي سكن منفصل عن دارهم كوني مسؤلة عن والدتي
كنت كل ما نقلوا حكيت في الامر مع اهلك يقلي من يلحق وقتها خلصت جامعتي و لحق وقتها و عرضنا اهلوا باش نتفاهمو على مراسيم الخطبة هنا كانت صدمة حقيقية ليا اتضح انو مش مفاتح اهلوا كامل في شروطي مام امو و اختو حاروا في الحكاية

هنا قتلهم حبسوووووو لا خطبة لا والو روحوا قبل تفاهموا مع وليدكم و شوفوا واش حكيت معاه مسبقااااااااااا
الوالدة نتاعو فهمت الامر بشيء من الحساسية هي فهمت انو انا مش متقبلة نسكن معاها مي قتلها لا مش هاك القصة اني مسؤلة عن والدتي ما نقدرش نتخلى عنها هذا شرط غير قابل للتنازل نتنازل على شرط العمل و ما نتنازلش على هذ الشرط

و من هنا قتلهم خلاص المكتوب فرق ما عادش نضيع وقت اكثر مالي فات
هكذاك و بقى يحرج في والدته كم من مرة تجي عندنا حاملة تورتا في يدها مي قتلها يا ماما الله يحفظك لا تحرجيني و لا تفكري اني ممكن نتنازل على شروطي
تفرقنا على هذ المشكل

هو عاش ظروف صعبة و انا نفس الشي عشت تجربة و تطلقت لما سمع بطلاقي بعد فترة رجع يكرر في العرض مجددا
قتلوا شوف انا هي انا و شروطي هي شروطي و زوجي السابق خلعتو لانو لم يحترم و الدتي مع انو سكن معايا قتلوا شوف انا والدتي تاج فوق راسي نخلع 100 رجل لعيونها تستاهل مي انت عائلتك عائلة زينة و الف بنت تتمنى تكون في هذه العائلة لكن انا الظروف اقوى مني الله غالب

لكن من اجل العشرة و لاني نحب اهلك صح ما شفت منهم الا كل خير

عندي حلول مليحة و ترضي جميع الاطراف هنا حكمت عقلي و باقتراح من والدتي

اقترحت عليه يتزوج مع بنت اخرى قتلوا انا نختارهالك اذا حبيت وقتها كانت موجة السوريات قتلوا نخطبلك سورية و لا امازيغية ولا نايلية ما يهمش انت واش تحب هي تبقى عند امك و انا نبقى عند امي او بسكن لوحدي انا و امي

السيد انفجر في وجهي كي القنبلة و ما تقبلش كامل الاقتراح قتلوا ياك عادي انت ماديا مقتدر و الحمد لله تقدر تفتح بيتين او اكثر قال لا مش هاكا نفسيا ما نقدرش على التعدد نحب نكون مع مرأة واحدة

قتلوا هنا خلاص ما عادش عندي حلول كل واحد يحكم طريقو لا تحرجني ولا تحرج اهلك المكتوب مش كاتب صايي
و انا واش فهمت من هذ التجربة انو السيد عندو حب التملك لا اكثر ولا اقل

يعني خويا حسين لما نقولوا صراحة قبل الارتباط و لما نقولوا شروط ما راناش نلعبوا و لا نتمسخروا هذا قرار مصيري و الشروط لازم تدرس شرط بشرط كاين شرط يمكن مراجعته و كاين شرط غير قابل للتنازل علاش نحطوا رواحنا و نحطوا الطرف الاخر في مواقف حرجة

يعني لما تاخذ الموافقة مسبقا و تكون عارف على اي اساس مقبل و متقبل لجميع الشروط نظن عادي تجنب روحك و تجنب اهلك احراج الرفض
ميرسي خويا حسين على التوبيك النايس كالعادة