احبتي انصحوني و ادعو لي

[مشكلتي]

السلام عليكم جميعا ...
صديقتكم تحتاجكم اليوم و اكثر من كل يوم مضى و لأني اعرفكم فثقتي بكم انكم لن تخذلوني ...
تجاوزت الثلاثين و انا بكل صراحة تقدملي كثير كان عندي شرط سـاهل و صعـيب حابة راجل عندو كلمة و مهما يكون صعيب بالصح عندو كلمة ماعليش رفضت و رفضت و تقدملي شخص ظنيتو ملاك و تخدعت فيه و تظلمت و اقسم بالله مريت بمأساة حتى لقراب ظنو اني ممكن نفقد عقلي و اللي ما يخافوش ربي ستسفاو فيا و قالو و قالو
لاموني لي محافظة على روحي و قبلت بواحد بطريقة شرعية قالو معقدة و زادو همي و نصحوني اتعرفي باه تنقذي روحك و تتزوجي بواحد تعرفيه من قبل ....
نصحوني نمنع روحي من العنوسة و نستغل الفرص و انتعرف و و و ..... قلت نديرها لقيت ربي سبحانه منعني و رجعلي عقلي و قلت حسبي الله و نعم الوكيل
تخطبت بعد المرار لي شفتو و رفضت لأني خفت و تعبت من اللي فات و كاين ثاني لي يسأل و يحب يتقدم و يروح بلا رجعة و دون اسباب و كقير و احترت و مليت
من اسبوع جات لعندي واحدة تخطب فيا لوليدها ابتسمت و نسيت الموضوع لأني فقدت الثقة في روحي و قلت راح يروح مثل اللي قبلو و حتى اذا راح عادي اصلا انا خايفة
لكن حبيبتي جاتني اليوم و قاتلي مازالهم حابين يتقدمو و راني نعرفهم و راه يخاف ربي و فيه مواصفات الحمد الله لكن متشدد يحب واحدة ثقيلة و تعرف قدرها و ما تخشنش راسها *** و أكيد لأني انا عكس ما نبان راني حابة اللي متشدد على قولها و لكن لي قالتها فرحتني و هي اللي نبحث عليها هدا هو شرطي
ادعولي ربي ادا فيه الخير تتم و يكون فعلا فحل و عاقل
ادعولي ربي ينصرني على اللي ظلمني و على عفس على جرحي
ادعو ربي يعوضني الدموع اللي حرقت قلبي ليل و نهار
ادعولي ربي ينصرني و يجعل زواجي من هذا بالذات آية لكل واحدة نصحتني نتعرف و ندير علاقات باه نمنع من العنوسة
ادعو ربي يرضى عليا و يكرمني من فضله
ادعو ربي يفرح لميمة لي عيات تنظر لعيني و تقولي ربي ينصرك على لي ظلمك بلا سـبة
ادعو ربي يفرح احبابي نتاع الصح لي عياو يشوفو دموعي و يقولولي ربي يصبرك راه ابتلاك كونك قوية
علابالي عندي 32 و هو قريب ليا بالعمر و ما خاصو والو .... لكن انا صح فقدت الثقة في روحي لكن عمري ما فقدت الثقة في ربي سبحانه
ادعو الكريم يرجعلي ثقتي بروحي و ينزع كل خوف داخلي ...
اشتقت الى الفرح فادعو الله معي عسى ان يكون بيننا دعاء مستجاب ...
هذه ليلة أؤمنكم فيها الدعاء فلا تنسوني ليس لأنه رجل و أنا امرأة تخاف العنوسة بل لأنها دعوة مظلوم كاد يفقد صوابه يوما ... و لأنهم قالو انحرفي و الا ... و الحمد لله لنا رب لا تخيب عنده الظنون

أحبك ربي فلا تحرمني من رضاك و كرمك يا رب ...

أعلم يقينا أنكم لن تخيبو املي فسلام الله عليكم جميعا