راتب المعلم يجب ان يكون هو الاعلي لكن

[hamid-sa]

السلام عليكم ورحمة الله تعالى وبركاته .
أما بعد ..
أولا وقبل كل شيء تحية تقدير وإحترام لكل المعلمين والمعلمات ...في كافة الأطوار ...
ثانيا أنا لست معلم أريد فقط أن أقدم رأيي في هذا الموضوع ..
يا اخواني واخواتي المجهودات اللتي يقوم بها الاستاذ مجهودات جبارة ،بحيث لو شرحناها فلا يمكن لصفحات المنتدى أن تكفيها .
ثم نذهب لسؤال الأولياء ، كيف تتهم معلما بضرب إبنك وانت تعلم ان بن بوزيد يتحلف في المعلمين ولي يجرح تلميذ بكلام فقط يدخل للحبس ويعزل .هل هذا منطق .
وتدعيو بلي المستوى نتاع التلميذ هبط ، والأستاذ هو السبب ،علاه الأستاذ هو لي شرا لولدك لبلاي ستيشن وإكس بوكس ،حتى عاد الأستاذ يشرح وبنك يسقصي على لعبة جديدة .
زيد علاه الأستاذ هو لي شرا لولدك البورتابل وليكتور mp3 ،الأستاذ يشرح وبنك يسمع الأغاني غير جديد بليكوتار في الوذنين والراس يتفاعل مع لغنية ..جابو حتى نوامر نتاع المعلمين وهبلوهم بلابال ماسكي وخلي الأستاذ يشرح وبنك يكتب في مساج ...
علاه الأستاذ هو لي دخل الانترنات لبنك في الدار ..يبات هذا فيسبوك وهذا منتديات وخلي وخلي ،علاه هو لي قلك هذي هي الثقافة هكذا يرقد بنك على 2 نتاع الليل ونتا ما تدري والصباح يروح يكمل رقادو في القسم .
روح طل على الدرج لي راك تخبي فيه اوراقك ، تلقى مجلدات من الإستدعاءات كاتبها الاستاذ ما فتحتهاش ممبا .
نسيت لما دق بابك الأستاذ مسكين يحوس عنك وقتلهم قولولو منيش في الدار .
نسيت انو ابنك يجي يدخل للدار على 1 نتاع الصباح ونتا تفتخر وتقول خلاص ولدي ولى راجل .ما تسأل نفسك حتى وين كان .
نسيت لما كنت تصفق لبن بوزيد وتقول خلاص ولدي ما يزيدش يضربو المعلم ، معليش ولدك نتا ما تضربوش والمعلو ما يضربوش ، كيفاه يتربى وإلا ولدك نتا قديس .
نسيت لما تفوت على المدرسة وتشوف ولادك يجرو وراء المعلم ويطارشو فيه بالحجر لما يخرج من المدرسة وإلا درت روحك ما شفتهاش .
...
والله يا إخواني أنا أفرح لما يفرح المعلم ,ابكي لما يبكي المعلم ...
أنا تاجر منذ 6 سنوات ومنذ أول يوم لي في التجارة داير قانون في راسي وهو
المعلم وعامل النضافة تخفيض 30 بالمائة
وأطلب من كل التجار والحرفيين و .. و.. أن يفعلو مثلي وأجركم على الله
وتجارتي مزدهرة والحمد لله .
قم للمعلم وفه التبجيلا ...كاد المعلم ان يكون رسولا
بكل فخر تحية تقدير واحترام لكل المعلمين .
هناك من يريد تضليلكم يا جماعة لتضنو ان الغلط في الاستاذ ، الخطأ لما صدقتوهم اولا والتفاعل معهم ثانيا إحذرو أن تظلمو من أنشا أجيالا ، إحذرو أن تضلمو أستاذا طعنه المجتمع في ضهره وما كان ليدير ظهره لولا ثقته في من أنجب بعلمه .
سلام