الكنة هل حدث هذا ؟؟؟؟ - الصفحة 3

z.abdo · 2012-05-11, 17:28

اقتباس:

المشاركة الأصلية كتبت بواسطة ريمة89

السلام عليكم
اه اخي عبدوا شكرا على الموضوع دوك نبرد قلبي
اول حاجة انا نقول لجميع الاعضاء اللي عافس على الجمرة هو اللي يحس ويجي نهار كامل تجوزوا على الطريق هدا وراح تفهموا مليح علاه الكنة تهدر و..........
اولا انا كي العادة انا نعطي مثال بمن حياتي اليومية انا الحمد لله تزوجت وانا اللي شرطت على زوجي نبقى مع يماه مع العلم انوا لي طابق مستقل عنهم وهو قالي لالا انا نعرف دارنا وانا قتلوا يماك عجوزة وخطبتني وداتني نديرها فوق راسي وختوا خدامة منهار تزوجت دايرتها راجل مانتكل عليها فالخدمة فوالوا قلت هي كبيرة ومشي مزوجة وانا بنتها مزوجة امالا قلت مانحاسبهاش والله والله والله اني كي رحت لشهر البصل جات معانا قعدت شهر وانا ماقلت والوا كي جيت من شهر البصل لقيت عجوزتي وبناتها 3 واولادهم وازواجهم وحنا بقى 2 لرمضان واسكتت راجلي تقاتل مع يماه قالها رجالهم برانين كيفاه انا مرتي دوك ماتنحيش الخمار وراكوا تشفاو على رمضان والله داروني خديمة حتى اجهضت من التعب وكي راح رمضان وعيدوا معانا وحد النهار قلت لعجوزتي الحمد لله يايما جوزت رمضان وخدمت يبقى غير الصح الحمدلله جاز مليح غاضتني كي اجهضت برك قاتلي واحد ماقالك اخدمي انا بناتي هوما كلش فالدار هادي وانت وحدك حبيتي تبيني شطارتك تما بديت نفطن ونفيق والله انني مانيش نعاير بناتها ومن حقها بصح حتى انا عروسة جديدة مام نتفاهم ماراحاش نتفاهم مع 8 مستحيل والله انه فرمضان صرا فيا الباطل كي بقى نهار للعيد انا طحت فراش تقست وليت بالراقي والله مكارحمتني قاتلي روحي ليماك وراجلي راه يشوف فيهم المهم داويت ورقيت وبريت الحمد لله والله كلمت ماخرجتها من فمي بقيت نخم وهوما خدامات كامل كي يجوا يحبوا يريحوا عند يماهم ونا قاعدة فالدار والله عايروني ونا عندي 4 اشهر سمعت كلام عمري ماستنيتوا وسكتت قلت هدا هو الزواج وكل مرة عجوزتي تعطي المجال لبناتها يعيروا وهي تتفرج وتقولي بناتي ماعندهمش الزهر انت 20 سنة بنتهم ربي عطاك كلش والمرة الاخيرة انا راقدة في برطمتي انا وزوجي حتى جات ختوا فتحت الباب وبدات تعاير تما زوجي هدر قالي مانبقاوش هنا نرحلوا انا وياك مانتهناوش وانا والله ماحبيت
علابالك علاه خاطر عجوزتي جات تبكي وقاتلي ماضحكيش عليا الناس 7 شهر رحلتي وانا دوك نهدر مع بناتي والله ماهدرت ماوالوا المهم انا راجلي دارلي داري بعدها بصح مازالت الهدرة والمعايرة
انا راني طولت عمرها العروسة ماجي عند اهل زوجها بقلب كحل لالا على وجه زوجها تحمل بصح صدقيني الزوج كي يشوف دارهم كثروا راح ياخد القرار وحدوا
والله انا ماما راحت لكندا 3 اشهر الشهر اللي راحت فيه انا حملت فيه والله ما رفدوني ولا والوا شهرين عجوزتي ماسقسات عليا ماوالوا وساكنين دار وحدة وامبعد جات بنتها دارت اكسيدون دارت حالا وقاتلي انت اللي تخدمي وخدمت لوجه ربي والله انني كي راحت ماما شربولي المرار بالمغرف كي نقولها تشهيت تقولي كل واحد ليماه نا نمد لبناتي وانت يماك راحت وخالاتك واش نديرلم وانا نتوحم
ياختي باه تكرهي انسان ماشي هكداك برك انا الحمد لله جات ماما وبقى غير العيب
وهكداك ونقول عجوزتي خفت نرحل تموت ولا تمرض وتحصل فيا مع العلم انوا راجلي كل مايشوفهم ناضوا يقولي نرحلوا وانا ماحبيتش
انا باه نقولك العجوزة وبناتها ماشي كدب ولا لالا والله من حرقة قلبي فيهم وهدي يماه مانقدرش نقولوا ماشي مليحة انا تاني راح نولي ام بصح نعاملها كامي لوكان جات تعاملني كي بنتها راني طولت هدا مقتطف فقط من حياتي برك
انا نقول الدنيا هدي مكتوب كاين وين الراجل مليح ودارهم ماشي ملاح وكاين وين الدار ملاح وهوما ماشي مليح
انا الحمد لله راجلي ماشاء الله انسان رزين وكل مرة يوقف معايا قدام دارهم يطلع في عيني كثر خاطر انا ماعندي خويا ماعندي ختي عندي ربي وراجلي والحمد لله راني مهنية ضميري وراجلي راضي بكلش وانا راني صابرة حتى يفرج ربي
ههههه خويا عبدوا اسمحلي طولت
الموضوع حتى اليوم باه شفتوا يعطيك الصحة

أختي ريمة

تعبتيني وان نقرى

رد طويل بزاف أطول رد في النتدى هذا العام هههههههههههههههه

والله واش نقلك أختي انت حكيتي الواقع فقط لا اتمنى ان تتشأم أي بنت من الزواج المهم تعرف كيف تتصرف

ومازلنا ننتظر مشاركاتك أختي ريمة

وبارك الله فيك على صبرك نعمة الزوجة التي تصبر وعكس التي كل يوم تشتكي

شكرا لمرورك أختي وربي يسعدك بإذن الله

z.abdo · 2012-05-11, 17:36

اقتباس:

المشاركة الأصلية كتبت بواسطة chamchouma1

يعطيك الصحه خويا على الموضوع يا خويا أنا راني حابه نسمع من عند لعجايز ألي كي تجيهم لعروسه يديروها خدامه يشوفوها شغل طياب نظافه كي شغل عبيد و كي يجو بناتهم المتزوجات تزيد تخدم عليهم.أنا عجوزتي كرهتلي الجزائر كي نجي هابطه نطير بالفرحه راني رايحه لأهلي و كي نهبط نندم ما تحبنيش نروح لدارنا و إذا رحت تحسبلي شحال قعدت يمه مسكينه قلبها يتقطع كي تسمعني راني في الجزائر بصح ما رانيش بحذاها و انا وحيدتها.هكذاك و ما نقولش نخليها في قلبي و راجلي يسمع ليماه تسمى نخاف نهدرلو يقولي راكي ديري فالمشاكل.و هذا المره مرضت من راسي ودار عجوزتي ما يحبوش لعروسه تخرج لازم غير لطبيبه و كي قلتلهم نروح لدارنا باش نروح لطبيب شيخي قالي أترزني أحكمي دارك تسمى لكان قلتلهم أدوني نتسوق ولا نحوس خلات هذا كل على التهمبير. المهم هاذي حكايتي ماشي معنتها كامل العجايز ماشي ملاح و ماشي كامل لعرايس ماشي ملاح كاين و كاين كاين شي عرايس هما لعجايز و لعجايز هوما لعرايس تلمو واعرات راني شفت بعيني الله ينزل الرحمه و نطلب من كل عروسه تخاف ربي في عجوزتها و ديرها كي يماها و كل عجوزه دره كي بنتها

أختي بارك الله فيك على مرورك

لكن مجرد تعقيب انت قلتي لو نطلب باش نتفسح أو نحوس يكون رد مش مليح من عدهم

فقط مجرد نصيحة إذا تحبي تحوسي أو تتفسحي لازم هذا الطلب يلبيه ليك زوجك وليس اب زوجك أو أخيك

كذالك مثلا لما تروحي للطبيب اطلبي من زوجك ان تتفسحو قبل العودة للبيت نظن فهمتي قصدي

كذالك عندي سؤال نظن انت من العاصمة وزوجك من اين ؟؟ لأن نظن كاين إختلاف في الثقافة هذا سبب السؤال

لكن راح نعطيك نصيحة كيف تتعاملي إذا كان صح زوجك ليس نفس ولايتك

z.abdo · 2012-05-11, 17:41

اقتباس:

المشاركة الأصلية كتبت بواسطة lydia istanboul

اخي عبدو لم قصدك لما قلت يرون في زوجة الاخ كشيطان و بارك الله فيك على وقوفك مع زوجات اخوانك و انا قلت كلمة بعض لعدم تعميم الوصف أما الاخت أمينة فأقول لك أطيع زوجي أكيد و أفرحه بإهتمامي و احترامي لعائلته لكن كلمة الطاااااااااعة راهي كبيرة يا حبيبتي و خلينا نبعدو على المثاليات شوي مثلا عجايز هاد الزمن يتحكمو حتى في مواعيد زيارة الكنة لأهلها ووووو هنا في رأيك لازم نطيع عجوزتي و الا انا اثمة؟ أعيد ما قلت و اكرر الطاعة للزوج و الوالدين و فقط اما الاحترام و الوصال فللجميع و الاقربون اةلى بالمعروف يعني الاسلام موصيني بالجار فكيف بأم زوجي اكيد اعاملها بالحسنى لكن يبقى لي وجودي و كياني و بيتي و استقلاليني و ما أفعله من طيب اثاب عليه و ما حفضته لنفسي من حقوق لن اعاقب عليه و الله اعلم

بارك الله فيك أختي

لقد وصلتني فكرتك أختي

وشكرا لمرورك الطيب

امينة 1991 · 2012-05-11, 18:10

اقتباس:

المشاركة الأصلية كتبت بواسطة Lydia istanboul

اخي عبدو لم قصدك لما قلت يرون في زوجة الاخ كشيطان و بارك الله فيك على وقوفك مع زوجات اخوانك و انا قلت كلمة بعض لعدم تعميم الوصف أما الاخت أمينة فأقول لك أطيع زوجي أكيد و أفرحه بإهتمامي و احترامي لعائلته لكن كلمة الطاااااااااعة راهي كبيرة يا حبيبتي و خلينا نبعدو على المثاليات شوي مثلا عجايز هاد الزمن يتحكمو حتى في مواعيد زيارة الكنة لأهلها ووووو هنا في رأيك لازم نطيع عجوزتي و الا انا اثمة؟ أعيد ما قلت و اكرر الطاعة للزوج و الوالدين و فقط اما الاحترام و الوصال فللجميع و الاقربون اةلى بالمعروف يعني الاسلام موصيني بالجار فكيف بأم زوجي اكيد اعاملها بالحسنى لكن يبقى لي وجودي و كياني و بيتي و استقلاليني و ما أفعله من طيب اثاب عليه و ما حفضته لنفسي من حقوق لن اعاقب عليه و الله اعلم

صح يا اختي قلتلك ان طاعة ام الزوج واجبة لكن في حدود معقولة فمثلا اذا تعدات حدودها ما تديريش عليها وتجاهليها روحي لبيت اهلك وقت ما تحبي واقعدي كيما تحبي المهم ربي وزوجك راهم راضيين عليك وتاع الصح ماشي من حق ام الزوج التدخل في الحياة الزوجية بين ابنها وزوجته يعني انتي تزوجتي براجل واحد ماشي تزوجتي بيه وبيماه وبخواتاته ...الخ ان شاء الله تكوني فهمتيني واسفة اذا ازعجتك بردي السابق

والسلام عليكم ورحمة الله تعالى وبركاته.

Lydia istanboul · 2012-05-11, 18:44

أهلا حبيبتي أمينة ابدا لم تزعجيني و احترم رأيك مهما كان و الحمد لله في الاخير يظهر لي ان لنا نفس التفكير فقط الاسلوب يختلف حبيبتي مجددا اقول لم تزعجيني و بارك الله فيك و في اخي عبدو لفتحه هذا الموضوع المهم

مريم الصابرة · 2012-05-11, 18:49

السلام عليكم اخي عبدو الصراع الدائم بين الحماة والكنة
انا نقولك راي بكل صراحة ما رانيش متزوجة كنت مخطوبة النقاش عن الوالدين محسوم ما نلحق أهلو وما يلحق اهلي كل واحد في بلاصتو لما انا نتزوج رراحا ننتقل من بيتنا لبيت زوجي أهلو لازم يكونو اهلو نقولك بكل صراحة النسا امهم مليحة ام الزوج ما راهيش مليحة علاه ما فهمناش على العكس أنا كنت انا وام خطيبي صدقني كاننا صحابات وتحبني بزاف وحتى انا نحبها ونعزها حد الىن نزورها ونطمن عليها ونتذكرها في كل لاعياد مثبها مثل امي ولما كان تجي مناسبة نعيط لخطيبي فالهاتف ونقولو روح إشريلها هذية نفكرو راك عارف الشباب ما يهتموش بالمواضيع هذو المهم انا الصراحة ما عنديش مشكل وحتى لو ربي رزقني باهل زوج ممكن يكونو صعاب وما نحبش نقول الكلمة هذي اكيد على جال زوجي راحا نتحمل ومهما يديرو نربجهم بالملاحة على جال زوجي يكون مرتاح تعب العمل بزاف عليه تزيدلو مشاكل الدار واي ام تتحسس لما وليدها يتزوج ولازم نخليها تحس إني ما ديتش وليدها عليها على العكس لازم يكمل حياتو كيما كان من قبل شكرا على الموضوع الرائع

z.abdo · 2012-05-11, 18:56

اقتباس:

المشاركة الأصلية كتبت بواسطة lydia istanboul

أهلا حبيبتي أمينة ابدا لم تزعجيني و احترم رأيك مهما كان و الحمد لله في الاخير يظهر لي ان لنا نفس التفكير فقط الاسلوب يختلف حبيبتي مجددا اقول لم تزعجيني و بارك الله فيك و في اخي عبدو لفتحه هذا الموضوع المهم

وفيك بركة أختي فقط ابقي متتبعة لمواضعي لأان جميع المشاركين الله يبارك عليهم و ستستفيدي بإن الله

شمس 15 · 2012-05-11, 19:00

اقتباس:

المشاركة الأصلية كتبت بواسطة z.abdo

أختي بارك الله فيك على مرورك

لكن مجرد تعقيب انت قلتي لو نطلب باش نتفسح أو نحوس يكون رد مش مليح من عدهم

فقط مجرد نصيحة إذا تحبي تحوسي أو تتفسحي لازم هذا الطلب يلبيه ليك زوجك وليس اب زوجك أو أخيك

كذالك مثلا لما تروحي للطبيب اطلبي من زوجك ان تتفسحو قبل العودة للبيت نظن فهمتي قصدي

كذالك عندي سؤال نظن انت من العاصمة وزوجك من اين ؟؟ لأن نظن كاين إختلاف في الثقافة هذا سبب السؤال

لكن راح نعطيك نصيحة كيف تتعاملي إذا كان صح زوجك ليس نفس ولايتك

أخي عبدو أنا زوجي من العاصمه و أنا كذلك.أنا كل ما نهبط للجزائر زوجي يقعد معايا أسبوعين أو 3 على الأكثر بحكم عمله هنا,و أنا و أولادي نقعد شهرين أو ثلاث لأنو مزال ما يقراوش زوجي يخليني في دارهم و هو يرجع فتتحتم عليا نشاورهم و عجوزتي و شيخي عندهم عقليه تاع بكري لازم ما نخرجوس بلا سبب.

z.abdo · 2012-05-11, 19:14

اقتباس:

المشاركة الأصلية كتبت بواسطة chamchouma1

أخي عبدو أنا زوجي من العاصمه و أنا كذلك.أنا كل ما نهبط للجزائر زوجي يقعد معايا أسبوعين أو 3 على الأكثر بحكم عمله هنا,و أنا و أولادي نقعد شهرين أو ثلاث لأنو مزال ما يقراوش زوجي يخليني في دارهم و هو يرجع فتتحتم عليا نشاورهم و عجوزتي و شيخي عندهم عقليه تاع بكري لازم ما نخرجوس بلا سبب.

حسنا أختي راني فهمتك

إذا فقط عليك ان تبقي تحترميهم كما انتي كذالك هم حريصين عليك لأنك امانة في رقبتهم بعد غياب زوجك

كذالك انت لما تعاملي والدي زوجك بالحسنى ربي يجيب كذلك من يعتني بأهلك أو لما تكبري انت وتولي عجوزة تجدي من يقف بجنبك ويصبر عليك

وتأكدي مثلا لو انت بعد 30 سنه هل تبقى نفس العقلية مع الجيل الجديد أكيد لا

إذا اكيد الوالدان كذالك كبرو ولازم تساعفيهم وصدقيني أختي انا الكبار دائما فيهم حكمة سواء في المعاملة أو في كلامهم

فأتمنى ان تغظي الطرف من هذا الجانب وتكرميهم مثل العادة لأنك تباني بنت أصل لأنك ساعفتيهم في عقليتهم

وأي استفسار أختي أو مساعدة لن ابخل عليك اختي

وبارك الله فيك واسعدك الله مع زوجك أختي

z.abdo · 2012-05-11, 19:18

اقتباس:

المشاركة الأصلية كتبت بواسطة مريم الصابرة

السلام عليكم اخي عبدو الصراع الدائم بين الحماة والكنة
انا نقولك راي بكل صراحة ما رانيش متزوجة كنت مخطوبة النقاش عن الوالدين محسوم ما نلحق أهلو وما يلحق اهلي كل واحد في بلاصتو لما انا نتزوج رراحا ننتقل من بيتنا لبيت زوجي أهلو لازم يكونو اهلو نقولك بكل صراحة النسا امهم مليحة ام الزوج ما راهيش مليحة علاه ما فهمناش على العكس أنا كنت انا وام خطيبي صدقني كاننا صحابات وتحبني بزاف وحتى انا نحبها ونعزها حد الىن نزورها ونطمن عليها ونتذكرها في كل لاعياد مثبها مثل امي ولما كان تجي مناسبة نعيط لخطيبي فالهاتف ونقولو روح إشريلها هذية نفكرو راك عارف الشباب ما يهتموش بالمواضيع هذو المهم انا الصراحة ما عنديش مشكل وحتى لو ربي رزقني باهل زوج ممكن يكونو صعاب وما نحبش نقول الكلمة هذي اكيد على جال زوجي راحا نتحمل ومهما يديرو نربجهم بالملاحة على جال زوجي يكون مرتاح تعب العمل بزاف عليه تزيدلو مشاكل الدار واي ام تتحسس لما وليدها يتزوج ولازم نخليها تحس إني ما ديتش وليدها عليها على العكس لازم يكمل حياتو كيما كان من قبل شكرا على الموضوع الرائع

بارك الله فيك أختي مريم والله اسعدت كثيرا بمرورك

وربي يرزقك بالزوج الصالح ويعوض عليك أختي

شكرا لمرورك

مريم الصابرة · 2012-05-11, 19:21

اقتباس:

المشاركة الأصلية كتبت بواسطة z.abdo

بارك الله فيك أختي مريم والله اسعدت كثيرا بمرورك

وربي يرزقك بالزوج الصالح ويعوض عليك أختي

شكرا لمرورك

السلام عليكم اخي شكرا جزيلا لك على الموضوع الرائع
ربي يزقك الزوجة الصالحة
أنا ندعي ربي يرزقني صحتي وفقط أما الزوج شباب الايام هذي ما يتزوجوش باللي مريضة وفالحقيقة هوما مرضى لكن واش دير تفكير الاغلبية هكذا ربي اعطاني مرة خطيب فالقمة ورجل بمعنى الكلمة لكن كلمة الموت كانت اسبق ربي يرحمو شكرا لك اخي

شمس 15 · 2012-05-11, 19:23

باك الله فيك أخي راني صابره و راني ندعي ربي يوسعلي خاطري ما نحبش نغيض زوجي و نحكيلو على دارهم نتحس راني ندير في الفتنه مهما راني موجوعه و ركزلي على الجمله الأخيره تاع الدعاء و إنشاء الله تكون مقبوله يا رب لأني عن قريب إنشاء الله حنعيش معاهم 24/7الله يوسع لقلوب.

z.abdo · 2012-05-11, 19:29

اقتباس:

المشاركة الأصلية كتبت بواسطة مريم الصابرة

السلام عليكم اخي شكرا جزيلا لك على الموضوع الرائع
ربي يزقك الزوجة الصالحة
أنا ندعي ربي يرزقني صحتي وفقط أما الزوج شباب الايام هذي ما يتزوجوش باللي مريضة وفالحقيقة هوما مرضى لكن واش دير تفكير الاغلبية هكذا ربي اعطاني مرة خطيب فالقمة ورجل بمعنى الكلمة لكن كلمة الموت كانت اسبق ربي يرحمو شكرا لك اخي

يامريم والله مزال الخير ولا تقنطي من رحمة الله

انا نعرف صديقي قريب ليا بزاف تعرف على وحدة وكان حاب يخطبها المهم قاتلو انها عرجاء

لكن هو قبل وقالها ليس لدي مشكل مهم تكون متلزمة ومطيعة لا يهمني كيف تمشي وبعد أخبرته الحقيقة انها تمشي لاباس عليها وليست عرجاء كما قالت كانت تجربه فقط لكن للأسف

الحين هي تخطبت وتقدري تقولي بصريح العبارة تركاتو ولم تتذكر انه قبل بها كما هي

هذي حوال الدنيا أختي مريم

z.abdo · 2012-05-11, 19:33

اقتباس:

المشاركة الأصلية كتبت بواسطة chamchouma1

باك الله فيك أخي راني صابره و راني ندعي ربي يوسعلي خاطري ما نحبش نغيض زوجي و نحكيلو على دارهم نتحس راني ندير في الفتنه مهما راني موجوعه و ركزلي على الجمله الأخيره تاع الدعاء و إنشاء الله تكون مقبوله يا رب لأني عن قريب إنشاء الله حنعيش معاهم 24/7الله يوسع لقلوب.

إنشاء الله أختي وتكون ساعة مستجابة من هذا اليوم المبارك

تهاليل · 2012-05-11, 21:22

الموضوع أعجبني بزاف والي يدو في الجمر مش كيما اللي يدو في الماء هي صحيح نقولوا لازم نساعفوا ونريحوا الزوج من أعباء العمل بصح يجي يامات وين تقعدي غير تشدي وتفوتي لدار زوجك ومتقدريش واش نقولوا أحسن حل الدعاء لأهل الزوج بالهداية وحسب رايي المتواضع أنه مهما تكون أم الزوج أو أخواته واعرين بالملاحة تكسبيهم ايتها الكنة نعرف أنه ليس سهلا ولكن ليس صعبا على الله سبحانه وتعالى فاسأليه العون عليهم وأي كنة مالازمش تدير بين الإبن وأمه وخصوصا الأم لأن المرأة تتعوض بصح الأم يلا زعفت شكون وواش راح يراضيها المهم حاولي تحلي مشاكلك بنفسك ايتها الكنة والصبر ثم الصبر مفتاح كل فرج وعامليهم بنيك لأنو مول النية يربح وإلا مايجي يوم ويعرفوا قدرك عندهم خصوصا يلا كانوا كاينين زوج كناين في دار واحدة عاقلة والأخرى طايرة وربي يسهل للجميع يارب