زوجي.. كيف أنصحه

[مشكلتي]

السلام عليكم
أنا دايرة الفاتحة مع زوجي

زوجي يطلب مني صور وفديوهات عادية
نبعثهمله عبر خاصية المحادثة السرية في التلغرام

من ناحية العرس مازال بعيد
خايفة تتطور طلباته مع الوقت، وأنا مالقيتش كفاه نقنعه ان التلغرام قادر يكون مراقب
خاطر كي نقوله يقولي راهم مجرد خوارزميات
وأن المحادثة السرية آمنة.

هذا من جهة
ومن جهة أخرى زوجي متدين نوعا ما،
لكن يؤلمني أنه دايما يقولي أنا ماعرفت حتى وحدة قبلك لكني ضعيف، ونحيت التطبيقات من الهاتف وبقالي غير الفيسبوك واليوتيوب برك
ولكن مزال يخرجولي فيه فيديوهات تاع بنات
وكي يخرجولي لا ادعي أني تقي وأني زعما ننوض ولا نبدل الفيديو.

كلامه هذا يؤلمني جدا، أنا دوكا كي نعود شادة التيليفون ويخرجلي كاش فيديو تاع كاش طفلة تحكمني القنطة
نقول زوجي كي يلقى وحدة هكذا يبقى يشوف معها؟؟؟؟

ماعندناش بزاف من لي درنا الفاتحة، وراني نرسله فقط وأنا لابسة ملابس عريضة،

خايفة يتطور الوضع

في قرارة نفسي أنا مقتنعة انه هو لي لازم يصبر ولا يزرب بالعرس قدر الإمكان،

ولكن في نفس الوقت حاكمتني القنطة كي نخمم أنو مسؤوليتي نغنيه عن هذو البنات كامل!!!
حاسة الزواج صعيب
منيش عارفة كفاش نتجاوز الأمر هذا

كلما خرجتلي صورة بنت يضرني قلبي

[مراد سابقا10]

هو انتوما بالفاتحة برك وتبعثيلوا الصور هذي فيها كلام لأنوا قادر لا قدر الله تولي مشاكل مستقبلا ويبتزك بالصور

بالنسبة للنقطة الثانية اغلب الشباب الان والشبابات مفتونين بالعزاب بالمتزوجين مالا ديري روحي مشفتيش وخلاص

مادام تقول زوجك متدين .

[محمد محمد.]

هاته من الأخطاء المنتشرة اي يكون العقد الشرعي بعييد عن موعد العرس .

لازم العقد الشرعي يديروه كي يقرب العرس.

[Noetic]

ما دام أنه صريح و صادق و صارحك بالحقيقة منذ البداية و بأنه سريع الافتتان بالنساء معناه أنه لا يمتلك صفة الإخلاص و الثبات العاطفي و لا تشبع فضوله امرأة واحدة .. يعتبر هذا التصريح و الإعتراف المبكر شيء إيجابي بالنسبة لكي تقرري مصيرك مبكرا مع هذا الشخص .. إذا كان لا يناسبك شخص من هذا الطراز من حقك التعبير عن رفضك لزواج لا يوجد فيه أي إخلاص عاطفي ناحيتك .. ليس كل الذين يزعمون الحب محبون و مخلصون .. هناك من لا يمتلكون صفة الاخلاص و ليسوا ناضجين و مؤهلين في مسألة الإخلاص العاطفي لشريكة الحياة

[حورية تو]

ما ترسليله حتى صورة القانون لا يحمي المغفلين قادر باه يطلب اكثر يستعمل الابتزاز وترجعي عايشة في خوف وضغط
الامور الاخرى غيرة ..المجتمع تاعنا وتعرفيه معمر بالبنات اشكال وانواع يعني يشوف يشوف حتى ويكون ما عندوش وسائل التواصل الاجتماعي وهنا تدخل الرجولة لي راجل يكتفي بحلاله وفقط دون ان نتطرق لمسألة التدين