لي عقبوا الباااااك من قبل رجاااءا ادخلوا // نورر الهدى رانية ندوشة اية عبق الزهور هبة انيس دهي دين......//

[*آمنة*]

سلام
احكولنا العام لي فات كفااااه درتوا مع هذي الايام

[karlita]

ان شاء الله يفيدونا

[jë suîs comçà]

nshfaaa kont nhfd his-geo w n7el math physique
w n9ra f sc psq kont retard fiha
kont nrgd 8h psqq n3ya kon mnchb3ch rgad
mmmmm
msss ntouma nenssahkoum mdiroush kifkif psq tdi3o bzzf diro prgrm lyamat lkhriin w diri to do list w abdaay a9raaaaaaaay
bn crg

[امـــة اللـــه]

نا كنت روطاااااار فمواد الحفظ لذا اضطريت أني نركز عليهم 85% فوتها مع المواد الأدبية الرياضيات وفيزيا كنت متقدمة يعني غير حوايج لليلة الرعد هههه
بالنسبة للوقت كان برناامجي مضغوط لأني ماقريتش بكري تسما لازم نعوض فيهم
يعني من الأحسن كل واحد حسب تقدمو إذا من نووع الل يجبد من بداية العام الأحسن يخفف ويوازن بين نقائصو بصح اللي ماقراش بكري مكاش كي الفرصة هذي بويسك اذا مااستغليتيهاش تبقاالك ديما بتأنيب الضمير

[nr.houda]

السلام عليكم ورحمة الله وبركاته .
نتمنى تكونوا كامل بخير ، عارفة راكم خايفين و stresse لكن الإنسان لي ميخافش و ميتوترش إنسان غير طبيعي ، برك عرفوا كيفاه تتحكموا في القلق نتاعكم.
المهم ، صراحة الايام الاخيرة قبل الباك كانت أجمل الايام صدقوني كان عندي نقائص وكنت عاد نحفظ المقالات المقترحة في الفسفة و نراجع ملخص الإنجليزية و نشوف نقائصي في اللغة العربية والإسلامية صراحة خليتهم للاربعاء والخميس والجمعة والسبت (كنت متمكنة منهم ) ، لكن زدت راجعتهم والمراجعة المكثفة كانت يوم السبت أكيد مشي حتى تهلكوا أنفسكم عادي نضت بكري يوم السبت بديت نراجع في التربية الإسلامية كان باقيلي حوالي 10 دروس أو أقل نراجعهم برك يا جماعة �� وزدت راجعت درس الميراث هذوك تاع ربع ،ثمن ... حتى تمكنت منهم حتى الرابعة مساء هكك ، وبعدها انتقلت الى الأدب نشوف في الملخص ونراجع ونسجل شوية ملاحظات كنت ناسيتهم ولي لازم مننساهمش،بعدها أخذت حمام و كملت المراجعة تاع الأدب حتى العاشرة ليلا هكك ريحت عدلت ادواتي متنساوش وثائقكم وسيالة زرقاء،المنحلة، قلم الرصاص ... بلا منوصيكم
المهم بالنسبة لاسبوع قبل كنت نراجع الفلسفة صراحة والله غير المقالات المقترحة ، ومراجعة للتاريخ والجغرافيا لي حسيت نفسي محفتهاش كامل و الله المعلومات تبخرت حتى يوم لي قبل مانعقبو التاريخ والجغرافيا رقدت مع 12 واه الليل مقدرتش نزيد نحفظ أكثر لكن هكك وقعدت متفائلة، منخوفكمش لكن نظن محفظتهاش بالطريقة لي تلزم لكن الله لا يضيع اجر من أحسن عملا ، الحمد لله بقاتلي الفهامة وجاوبت و متقلقت ماوالو.
ثاني الإنجليزية كنت نشوف الأفكار ممن كراسي نتاع paragraphe ونشوف الملخص .... بالنسبة للفرنسية حتى يوم البكالوريا كنت شادة المخلص ونقرا فيه ،كنت تراجعها في الاختبارات، ونتبع في القسم يعني كان عندي قاعدة وكنت متمكنة منها لكن وخدوني في compte rendu
الرياضيات كنت متمكنة منها عدا أسئلة المناقشة راجعتهم الايام الاخيرة وحسيت روحي منيش شادتهم مليح، بالإضافة لهذاك السؤال في الاعداد المركبة نتاع مجموعة النقط لي مكنتش متمكنة منه ،الهندسة الفضائية حدث ولا حرج الحمد لله مطاحتش .
العلوم كنت نشوف النصوص العلمية ، فقط كنت نأخد أفكار ونتوسع انا بفهامتي للدرس يعني نشوف plan نتاع النص العلمي واش لازم نشرح كي يطلب مني السؤال كذا.....
مرات بيكون عندنا الجواب بركك كي نشششوفو طريقة السؤال ننخلعوا ربما تكون جديدة علينا ركزوا مليح في السؤال و الله الإجابة تكون كاينة إذا كنتوا فاهمين ...
الفيزياء اجمالا كنت ناوية نعوضها بمادة أخرى كنت قارية كامل الوحدات مع هذا كنت نحس نفسي مراحش ندي فيها مليح ،،، عادي المهم نجيب فيها أكثر من كذا ...هكذا كنت نحكي مع نفسي وكي خرجنا من الفيزياء نعقل غلطت في سؤال وراخلي نفس التمرين لكن قلت عادي لي فات مات ...
في عشية يوم الأخير كان عندنا الفلسفة والكل يقول هذي تطيح ...هذي تطيح ... ههه المهم انا حفظت كامل المقالات المقترحة من غير المشكلة والاشكالية كي شفت قارن قريب ندوخ ههههه ، بديت نحلل في النص لكن شفت روحي مانيش فاهمة النص كنت عارفة المنهجية لكن موضوع النص مفهمتهش ماقدرتش نجازف قلت ندير المشكلة والاشكالية الحمد لله المقدمة كنت عاقلة عليها 100% و حتى أوجه الاختلاف ، اوجع التشابه ، ... لكن كان عندي أفكار قليلة بزاااف عقلت عليهم من فرض الفصل الأول، المهم قلت المنهجية عندي ومانيش خارجة عن الموضوع ، كتبت المعلومات لي عندي .وسلمت الورقة مهم ضمنت المعدل....
أختي امنة نتي طلبتي مني كيفاه تعاملت مع تلك الأيام لكن انا ضروري نخرج عن الموضوع ههه سامحيني .
ما أردت قوله من كل هذا : كل واحد عنده نقائص يركز عليها و المعلومات لي متمكنين منها غير قراوها بتمعن وهكذا وحتى مايكفيكمش الوقت لدراسة درس ما ،خذوا فقط نظرة عليه ، اقراوه قراءة بتمعن وتشفير نظن فهمتوني المهم خذوا نظرة .
أختي و كل واحد رايح يجوز الباك هذا العام كلمة كنت قلتها لصديقتي في آخر يوم للدروس الخصوصية قلتلها حنا من سبتمبر وحنا نحفظوا ونراجعوا مستحيل تعبنا يروح هكك
بالرغم كامل مرات نطيحوا نمرضوا نحبسوا القراية يامات ،نغلطوا في طريقة المراجعة ، نضيعو وقت ،نبقاو إنسان والإنسان غير معفو عن الخطأ المهم هو نتعلموا من أخطائنا ومنتعبوش نفسيتنا،لأنكم لازلتم في بداية المشوار،الباك مجرد امتحان والله عادي اسهل من الاختبارات فقط عرفوا تخيروا الموضوع ،السؤال لي متعرفهش خليله المكان سورتو في الرياضيات .
كثرت الكلام هذا لأنني سأعود حتى ابارك لكم إن شاء الله بإذن الله سأذرف دموع الفرح معكم .
وفي الاخير ، أكثروا من الدعاء خاصة قبل استلام الموضوع ،الاستغفار ،الصلاة على رسول الله صل الله عليه وسلم، بعد إنهاء كل امتحان قولوا الحمد لله فمن حمد الله زاده ، متناقشوش الإجابات، نظموا اوراقكم كيما وصيتكم كيفاه تجاوبوا .
الباكالويا تجربة في حياتكم ،حاولوا ان تعيشوها بحلوها ومرها .


ومهما واش صرا معاكم غلطتوا ..نسيتوا...خفتوا... تأكدوا أن هناك الله يرى ويسمع ويجيب ،تضرعوا له { الإشتكاء لغير الله مذلة } ،الحل لكل مشاكلكم يكون عندكم ومن عند الله .
تمنياتي لكم بالتوفيق لن أنساكم في دعائي.
إن شاء الله الكل يحقق حلمه .
إن شاء الله ستكون ايامكم القادمة مثل حصاد يوسف بعد تعبه ،وراحة أيوب بعد صبره .
ستقهواو مليح ��
متخرجوش حتى تشوفوا بلي عدلولكم اوراقكم بلقرافوز.
كي تجيو خرجين قولو لأساتذة تشوفلكم رقم التسجيل تتأكد معاكم
ديو الة حاسبة casio وآخرى احتياط
عندكم تستمعملوا الورق الملمتري وتكتبوا فيه اسمكم ولا علبالي بلي عارفين لكن نفكركم وعندكم تردوه معاكم تأكدوا بلي درتوه مع ورقة الإجابة.
رقموا اوراق الإجابة^^ مهم جدا^^
خطيوكم من هذيك النجمة ومنيش عارفة ركبتلي الوسواس في الباك كي ستملتها
رقموا اجاباتكم وكي النصف الثاني من الجواب ديرو
-مطة -
اعذروني على غيابي ، لكن أظن أنكم قدها وقدود ههه
ثقتي كبيرة فيكم
بالتوفيق ��

[أمل أميرة]

اختي نور الهدى بارك الله فيك وربي يجعلها في ميزان حسناتك والله ماطولتي بالعكس نقرا في كلاملك وجاني راحة على قلبي رغم اني مانقراش المواضيع الطويلة الا اني استفدت منك كثيرا بارك الله فيك وربي يزيدك من فظلو