زوجي

[مشكلتي]

السلام عليكم زوجي يموت على خياته المتزوجات والعازبات يروح لعندهم ويعرضهم ليا وديما نديرلهم عشا وهوما يكرهوني ..وصلت بيه الدرجة يكسي خياته المتزوجات احيانا انا ثارت ثائرتي وواجهتو زعف وضرك ران في دارنا مفهمتش اذا ران على صواب ولا غلطت انا جابلي ربي مدام راهم في رقبة راجلهم يكسيهم ولا يتمحن بيهم ميجوش لزوجي يبروفيتو هو اصلا مهوش كافي قيسو قيس اولادو قولولي رران غالطة؟

[nihal159]

ماكيش غالطة إذا هو يقصّر في حقكم باش يكسي خوتو؛ لكن راكي غالطة في طريقة كلامك مع زوجك؛ نورمالمون تكوني ذكية و تعرفي إدارة المفاوضات باش تخرجي أنتِ الرابح الأكبر؛ لكن للأسف أنتي أنفعلتي و درتي مشكل و فوق هذا راكي غضبانة في داركم؛ حلّيها درك إذا قدرتي.

[إكليل]

أختي إذا كان كافي زوجته وأولاده فلا بأس بذلك أما إن كان مقصرا فلا أظن عليه أن يفعل ذلك والله أعلم.
أما من ناحية دعوته لأخواته فلا يجب عليك أن تعترضي فهن أخواته

[محمد جديدي التبسي]

انت قلت يكسيهم أحيانا يعني من باب الهدية هذا أخ مثالي ما شاء الله
المفروض تفرحي ان لديك زوج حنون هكذا مش تعملي مشاكل من والو وتزيدي تغضبي في دار والديك؟؟؟
من رأيي أنت غلطت وكبرتيها مادام أحيانا برك يمد هدايا لأخواته فالأمر عادي جدا المهم مش باخلكم انتم ويوفرلكم واش يقدر ..اطلبي السماح ما فيها والو وربي يصلح احوالكم

[زبدة ذايبة]

بالعكس

المفروض اللي يكون مع أخواته بهذا الشكل تطمئني على نفسك معاه.

والإنفجار اللي درتيه على زوجك راكي غالطة فيه.

حاولي توسعي في مشاعرك حتى تستوعب أشخاص آخرين.

وفرضية أن أخوات زوجك يكرهوك

نظن من ردة الفعل تاعك تجاهم يظهر العكس.

انت اللي درت المشكل على جال فستان أو تنورة جابها أخ لإخته !!!!!!

ممكن يكون هو الأخ لكببر ومايحبش يشوف خواتاتو ماعندهمش.


وممكن يحب يهديلهم الهدية.

الموضوع كله خير من ناحية زوجك.

المشكلة راهي فيك.

حاولي تعجلي بعودتك إلى بيتك.

أسرتك وزوجك أغلى من تنورة أو حذاء اشتراه زوجك لإحدى أخواته.

وسعي في نفسك. يوسع عليك ربي.

مانقص مال من صدقة.

يصبح كل يوم ملك ينادي في السماء. اللهم أعط منفقا خلفا وممسكا تلفا.

هذا نقلا عن نبينا محمد صلى الله عليه وسلم.

ماتكونيش سيئة مع بخل مع كراهية لأخوات زوجك مع التضييق على زوجك مع تهديده بالانفصال باستخدام الهروب إلى بيت أهلك.

هذا كله لايرضي الله.

وش الفايدة اللي رايحة تربحيها كي مايزيدش يعرضهم او مايشريلهمش!!!!!!!

حاجة مارايحة تزيد فيك.

ماتربحي مع ربي ماتربحي مع العبد.

عاوني زوجك في الخير.

يقول صلى الله عليه وسلم خيركم، خيركم لأهله. وأنا خيركم لأهلي.

يعني أحسن واحد يكون اللي يحسن لأهله.

عاوني زوجك على صلة الرحم. ماشي ترفدي روحك لداركم على متين الف شرى بيها لأختو!!!!!!!

باش تشديه من اليد اللي توجعو ومايزيدش يشريلهم؟؟؟؟؟؟

لو كان خوك يكون ماذابيك يتفكرك حتى ولا عندك المال وكنت غنية.

ضيقتي على روحك وعلى زوجك. وبخروجك من بيتك كشفت الأشياء اللي في نفسك نحو أسرة الزوج.

حاولي ترقعي الأشياء اللي فسدتيها.

رب يهديك.

[خالد عنابي]

الاولولية للزوجة والاسرة

واذا كان فيه كفاية يقدر يهدي للعائلة

[sohaibdz]

ماعندكش حق تدخلي روحك في علاقة زوجك و اهلو
الا اذا كان مقصر معاك و التدخل يكوز بالتي هي احسن يعني نصيحة بشكل لائق يتقبلها زوجك تفيدك و تفيدو
اما الطريقة تاعك هاذي راكي جبتيها في روحك المرة هادي بعتك لداركم و المرة الجاية ممكن يطلقك لان الرجل علاقته باخواته خاصة جدا اما الزوجة ممكن اي مرا تكون زوجتو
و بالتوفيق

[ابو سليمان10]

هذه غيرة...انتي تتمنين ان يقاطع اخواته فلا يدعوهن و لا يهديهن...اغلب النساء هكذا لما تتزوجها تتسلط عليك و تحرمك من عائلتك

[هـــدوء]

مممم شوفي عزيزتي.أولا راجلك قبل ما تتزوجيه كان عندو عايلة ضك تكرهيهم يكرهوك و لا تحبو بعضكم مايهمش خاطر الاهم علاقتو هو بيهم.و هو راه يحاول يحافظ على العلاقة هاذي بالزيارة و لا الهدايا.

إلى هنا ماتقدريش تدخلي إلا إذا الزوج هاذوا (الهدايا و الزيارة) تعداو الحدود و صار راجلك يحافظ على خواتاتو على حساب أسرتو .بمعنى مثلا يضالوا عندكم في الدار و متعبينك في خدمتهم و و ثاني بسبب مصروفهم راجلك مولاش قادر يصرف عليكم .هنا برك تقدري تدخلي .

و كي تدخلي ماشي تغضبي وتقلقي و تخلي دار راجلك .لا هنا راكي عميتيها تولي نتي الغالطة في أعين الجميع. لازم الحوار تتفاهمي معاه بالعقل و في حقك قال يا راجل اسرتك أولى الآن .ولادك محتاجين البيت محتاج و هكذا ....وفهميه بالعقل كيفاش ينظم مسؤولياتو و أولوياتو .

عزيزتي أسلوبك يخليه يحسك طماعة و غيارة و هنا تزيد الحكاية تتخلط و عليه لازم تتصرفي بحكمة.مثلا نتي ثاني اعرضي فاميلتك عشيهم و جيبيلهم هدايا و شوفي ردة فعلو.

المسألة مسألة ثقافة كاين ناس هك مايعرفوش الأصول و الواجبات خاصة كيما فاميلتو من المفروض راجل مزوج خلاص اللهم إلا إذا كان مقتدر ماديا.

[FATIHA131]

مافيها والو وسعي خاطرك
ما تضيعيش اسرتك من اجل التفاهات
يكرهوك عرضيهم لوجه الله انت احسني نيتك
وستنالين باذن الله تعالى
ربي يصلح اموركم

[رندة.]

مكانش لازم تخرجي من دارك وتزعفي على جال زوجك اعرض خواتاتو للدار ولا شرالهم هدايا. بالعكس كان لازم تفرحي انو زوجك يحب اهلو ويحن عليهم ويعطيلهم. هذا الشيء نورمالمو يحسسك بالأمان اتجاهه.

وبالنسبة ليهم يحبوك ولا يكرهوك مش مهم انتي كي يجو عندك افرحي بيهم واخدميهم على وجه ربي اولا وعلى جال انهم اخوات زوجك وعمات اولادك ثانيا.

حاولي ترجعي لدارك في اقرب وقت وعاوني زوجك على صلة الرحم مش تضغطي عليه بخروجك من البيت وتظهري للجميع انك مش مليحة وماتحبيش انو يعرض اخواته او يهديلهم... ربي يصلح احوالكم ان شاء الله

[فافا مينوشة]

ياختي ادا كان مانعك من امور من حقك لكن مهيش طريقة تقوليهالو وزيد يقلك راها تعس في خواتاتي هو وخواتاتو دبرو راسهم انا بانلي بلي مستحيل يكون سامح فيك مادام خواتاتو متزوجات ومش سامح فيهم حنا نسا برك جينا لغيرة كنتي تجيبيهالو بطريقة هادئة بضحكة هكدا يقلك راها حاقدة على خواتاتي وتبع فيهم نعلي بليس واحسني التصرف

[* الحلم سكر *]

عندهم حق يكرهوك ..
عندك برك تطيح نهار براجلك و يروح لخواتوتو و يلقاهم حتى ثم قولي راهم متزوجين و متأكدة راح يلقاهم
ربي يهديكم لي يتزوج ولا لازم تفصلوه على خواتاتو
آسفة على هذا الرد هذا الطف رد اخترتو

[النجمة القطبية]

سبحان الله
كي ربي رزقك بزوج حنون وكريم هكا هادي حاجة تزعف !!!
كنت قادرة نجي معاك لو قلتي الزوج مقصر في حق بيتوا وزوجتوا
او بخيل او ماشي مدين او....
اما انك تزعفي لمجرد انوا يحب خواتاتوا ! ويشريلهم حاجة مرة على مرة من باب صلة الرحم وتزيدي تنفجري فيه
امالا لو لسمح الله في يوم من الايام واحدة من خواتاتوا دار بيها الزمان واحتاجت خوها يصرف عليها واش راح تديري
احمدي ربي يا اختي وشجعي زوجك وبالعكس الهدية بركة في المال والصحة تشوفيها في بيتك واولادك
واحمدي ربي اللي اعطاك زوج قادر يصرف على داروا وزيد قادر يقدم الهدايا لاهلوا راهي نعمة
احمدي ربي باش يباركلكم في مالكم ومتجحديش بالنعة وتضبحي على الخير
موفقة

[mohamed nadim]

نعم الأخ


واصل للرحم ما شاء الله في وقت قطعت صلة الرحم

أين المشكل ان اشترى ملابس لاخوته ؟؟؟

مشكلك مع اخواته و هو مشكل جميع الجزائريين

لا تشعلي النار بين الاخوة

و ان كان هناك مشكل حقيقي وقع لك مع اخواته فاطرحيه عليه حتى يسوي الامر بينكم

ما الدي يرضيك ؟؟؟

ان يعادي اخوته

تدي غير دعاوي الشر