الجزء184 من واش طيبتي اليوم.... كوزينة التألق و النجاح

[oum islem]

صباح النور فيفي ربي يحفظك على الكلام الجميل

زقزوقتي فكرتيني في طورنو أم حبوبة يهبل ذوقو يهبل درتو شحال من مرة والمقفول من يديك عسل ولا هذاك الفلفل العايم في زيتو اااااااه
وشكرا جزيلا على وصفة الباذنجال باني جربتها وعجبتني هايلة مع تشربش الزيت الله يعطيك ويمنيك حبيبة

أم رحاب اطباقك كلها تشهي من مالح وحلو والله يرحم مميتك صح صعيبة لكن حتى أولادك صغار وكثرة الحزن تأثر على نفسيتك ونفسية وليداتك وتحبط معنوياتهم هاذي حاجة رب العالمين لازم الانسان يكون قلبو كبير يدير مساحة للحزن ويخلي مكان لما تبقى من حياته وإلا ما كانت الدنيا لتستمر
ملاك ملاكي وييين الغيبة اشتقنا لك وللمساتك الانيقة
فضيلة خرجلك الكيك روووعة واقيلا نديرو شهيتيني أنت وأمنية

والروينة ما عرفتهاش لو تتكرمين وتعطينا طريقتك حبيبتي تعرفيني نموت على التقليدي

[oum islem]

نهولة قريب خرجت وما حطيتش الباروك وتقولي أم إسلام دخلت بلاطاي ههه

نبداو بالارشيف الحصري حتى نصغر الصور الجديدة

صابلي الكرمال والنقاش يهبل من النت














نعاود نفور بربوشتي ونكمل شغالاتي ومين نصيب شوية وقت راني ندخل


سلامي لكل الغاليات ويومكن سعيد

القاكم بخير

مع السلااامة مواحاتي

[أم فاطمه]

السلام علبكم اصبحنا واصبح الملك للله والحمد للله
صباح الخير جميعا وجمعة مباركة
ام يوسف رجعتي كما زمان الله يدوم هناك
جبتلكم من الارشيف وهدوك لسقار رسلتهملي جارتي البارح
رني نطيب في الكسكس ونغسل الملابس نترككم في امان الله


.

[Fifilondon]

ام فاطمة صباح الخير وشكرا على الحو .
ام اسلام صراحة كل الحلويات تحفة وخااااصة كعك النقاش يهبل ويبان يذوب في الفم ادا مافيهاش ازعاج كي تدخلي حطيلي الوصفة باش نستفادو الكل منها وتكون في ميزان حسناتك وشكر مسبقا

[أمنية غفران]

السلام عليكم و رحمة الله تعالى و بركاته

أخواتي الكريمات نهاركم زين معطر بورد الياسمين



اختي ام اسلام مرحبا بلي جا و جاب الله يعطيك الصحة

راني جبت وصفتك في صورة بالك ما شفتيهاش من قبل ربي يحفظك و في ميزان حسناتك و تاني جبت ليك كيك ام فاطمة ربي يعطيها ما تتمنى لازم تجربيه هايل





أختي ام يوسف يعطيك الصحة و اخيرا شفنا طيابك هايل يعطيك الصحة بصح جربي طريقة التحميل باش يبانو الصور مباشرة لينا احم احم راهي ساهلة ماهلة

ام هدول عجبتني النكتة ههههههههههههههه درك نسرقها و نديها لهيتة تعيشي

اختي فيفي يعطيك الصحة شفتك درتي دوارة يا لهوي شحال راني متوحشتها امممممممممممممم

مولا ت الكوزينة و الفحلات الله يعطيكم و يمنيكم صحيتو يا نوارات بلادي
.......................

اليوم راني دايرة بركوكس قبايلي حر نتاع زيكا و غدوة ان شاء الله ندير التليتلي باش هاكة يشبعو عجاجن مليح مليح و الايام الاخرى نطيب ليهم غي سوبات عقوبة هههههههههههه


ربي يعاونك خياتي

[أم رقية نسرين]

السلام عليكم يا حراير بلادي
نهاركم مبروك و زين اسمحووووولي على الغياب كانت لظروف خاصة توحشتكم بزاف البارح دخلت كي السرارقة ع 11 و نص تاع الليل طليت عليكم الله يبارك معمرة بالخيررات ربي يدومها نعمة
نهال خانووم راني راجعت دروسي كاااامل كلهم ماشاء الله و نتي تاني ماشاء الله عليك قايمة بالكوزينة و شكرا على وصفة افخاد الدجاج إن شاء الله نجربها و راني زعفانة منكم قسمتو لابياس مونتي ووحدة متفكرتني اشفاو عليها خخخخ
إييييه سعيدة ختي ربي يرحم خالتك و يوسع قبرها و يجعلو روضة من رياض الجنة
مصورتش بزاف بصح درك نحط بعض صور الأيام لي فاتو

[أم رقية نسرين]

بسبوسة بذوق المندرين اول مرة ندير فيها اامندرين و عجبتني بزااااف


وهادي دوبارة تاع فول وصفة ام ياسين الزهراء صراحة تهببببل مالفة بالفول غير مالح و بنيين عمري ماطيبتو هكا جا فووور يعطيها الصحة


وهادا خبز دار



و هادا جاري فريك

[nihal159]

صباحكم برباحكم و مية Audi A5 في مراحكم ههههههههههههههه راني دعيتلكم يالبنات بسيارة الله الله.
صباح السعادة و المحبة و الخير عليكم حبيباتي كامل، ذخلت طول للصفحة الأخيرة اسمحولي ماراجعت والو، شفت الذخول القوي لام اسلام ماشاء الله عليك و على حلوياتك تحفة، نورمالمون الحلويالت هذو مايتكلوش نورمالمون يحطوهم فالمتحف و الناس تصور معاهم هههههههه الله يبارك تحفة.
أم فاطمة يعطيك الصحة على الكيكة و بصحتكم البربوشة.
أمنية الغالية شكرا حبيبتي على مجهوداتك معانا لأثراء الكوزينة ربي يجعلها في ميزان حسناتك.
مريومة حبيبة قلبي توحشتك، خليتي فيد كبير فالكوزينة و الدردشة، ان شاء الله كل امورك تكون بخير.
الفحلات الباقيات الصالحات هههه اسمحولي و الله كي نقدر نرجع نذخل و نشوف مشاركاتكم لي علابالي فبهم مشاركات لذيذة ههههههه.
ليوم راهو نهار كبير عندي فالكوزينة هههههه هذا النهار سيذخل التاريخ و سيكتب بماء من ذهب هههههههههه الدنيا راهي تغلي عندي هههههههه درت تليتلي للغدا، و عجنت لمسمن للقهوة تاع العصر و اكيد ندير حبيبات ملوي لي ذاق البنة مايتهنى هههههههههه، و راني نوجد فلاصوص طوماط على طريقة اللهلوبة، رايحة ندير بيتزا دوبلي للعشا.
اتهلاو في رواحكم و انتضرو الصور الحصرية ههههههههه، جمعة مباركة للجميع

[nihal159]

ماقدرتش نخرج قبل مانعلق على اطايب حبيبة قلبي مريومة، كلش يشهي الله يبارك خاصة الجاري بصحتكم و ربي يدوم عليكم النعمة، سلامات للجميع

[سحابة باردة]

صباح النور جمعة مباركة
فطورنا روز في الفرن

[

[أمنية غفران]

صحا فطوركم بنات

حبيبتي نهال دخلت باش نقول لك رايحة ندير ملوي بطريقة جديدة هههههههههههه وقلت نعطيك عفسة رايحة نجربها اليوم كي تحلي العجينة اطليها بخليط الزبدة و الدقيق و خميرة الحلوة و كملي الملوى عادي راهي تباني لي مليحة هاد العفسة و انتظري ملوياتي الزوينات ههههههه و حقا قبل ما ننسى ليك و لأم هدول صح واش قلتو الملوي يجي ملحم هههههههه ماشي لحم يعني كيما وصفتوه ههههههه نيشان

حبيبتي سحوبة كنت سقسيتي على الكسكس العاصمي لعيونك رايحة نحط لك الطريقة و سر بنته احم احم اصبري برك الصور عندي فقط خاصني التصميم هههههه

تحياتي

[طيور الجنان]

صباح الخير شمرا ليكم حبيباتي كامل كل وحدة باسمها ربي يخليكم و يحفظلكم كل عزيز على قلبكم اااامين.

[fadila34]

السلام عليكم ياحراير وجمعة مباركة للجميع وربي يتقبل مينا ويجمعنا فى ساعة الخير
صح غداكم وربي يبارك فى اكلاتكم ويدوم رزقكم
لبنات لي عجبهم الكيك نقولهم عيونكم لي شابين ربي يخليكم ولي معرفتش الروينة نقولها هذك قمح ويتقلة ويترحة نخدمو بيه
امنية اختي ربي يبارك فيك ويحققلك ما تتمناي ويعمر حجرك يارب راني شوفة البا وفكرتين فيه يممممم قد ماناكل منو ما نشبعو كي دخلت لقيتك جاوبتي على اللغز وكون تزيدي تحطي فيه فلفل الحار الاحمر يخرج هايل ونزيك معلومة كي تعود تاكلي فيه وهو سخون لازام متنصفيش فيه يعني متبرديهش بفمك خليه يبرد بعقلو وكولي ولا كنتي تعرفي هذي المعلومة معليهش يتعلم منها لبنات

[fadila34]

المشاركة الأصلية كتبت بواسطة oum islem

صباح النور فيفي ربي يحفظك على الكلام الجميل

زقزوقتي فكرتيني في طورنو أم حبوبة يهبل ذوقو يهبل درتو شحال من مرة والمقفول من يديك عسل ولا هذاك الفلفل العايم في زيتو اااااااه
وشكرا جزيلا على وصفة الباذنجال باني جربتها وعجبتني هايلة مع تشربش الزيت الله يعطيك ويمنيك حبيبة

أم رحاب اطباقك كلها تشهي من مالح وحلو والله يرحم مميتك صح صعيبة لكن حتى أولادك صغار وكثرة الحزن تأثر على نفسيتك ونفسية وليداتك وتحبط معنوياتهم هاذي حاجة رب العالمين لازم الانسان يكون قلبو كبير يدير مساحة للحزن ويخلي مكان لما تبقى من حياته وإلا ما كانت الدنيا لتستمر
ملاك ملاكي وييين الغيبة اشتقنا لك وللمساتك الانيقة
فضيلة خرجلك الكيك روووعة واقيلا نديرو شهيتيني أنت وأمنية

والروينة ما عرفتهاش لو تتكرمين وتعطينا طريقتك حبيبتي تعرفيني نموت على التقليدي

ام اسلام توحشتك وانتي الاروع حبيتي وغير جربيه راهو يشهي ويحمر الوجة حتى امام الضياف تاع الغفلة
ام الروينة شرف ليا اني نعطيلك الطريقة حتى انا نحب التقليدي والصحي والروينة صحية تحكمي القمح تقليه فى طاجين الطين وترحيه ماهو حرش ماهو رطب وفى طاوة تحطي الماء حسب الحاجة وتحطي زيت الزيتون والسكر ولا دبس التمر ولا عسل كما راكي حابة المهم حاجة حلوة وتحطيهم يسخن فقط مايغليش الماء يسخن برك وطفي النار وحطي دقيق الروينة بشوي وراكي تحركي خطر تنشف ثم ثم وخليها جارية شوية وكوليها بصحة والرحة هذي الروينة يديروها بكري لليجارة يعني للرجال لي يكونو يحصدو على التسعة تاع الصباح باه اديرلهم الطاقة ان شاء الله نكون فهمتك وفهموني لبنات خطر نسيت شكون لي قاتلي كيفها اجي هههههه على هذا النسيان عدة مندخلش ههههه نخاف ننسا وحدة ومنيش حابة لبنات يزعفو مني

[سحابة باردة]

راجعت أصبرو عليا نلقى روحي الأطايب خير ربي اليوم مع الجمعة النسا والشيرات كل في الكوزينة الله يبارك
حيوتة جامي ننساك علقت على فطورك نهار اللي درتي العدس بعدو مانتبهتش وسامحيني أنتي صديقتي الغالية على قلبي علابالك المائدة علامة القرنون مع الشربة البيضا وهذاك الخبز الخفيف مقدرتش وتحلية في السهرة لانقاوم تمنيت راني قاعدة معاكم مستمتعة بهذاك الخير ربي يدوها نعمة ويحفضها من الزوال شكرا على كلامك الحلو
أم يوسف شفت الروابط ياختي راكي خطيرة متنسيش المرة الجاية تصورينا الدجاجة بق بق بق باق ههه
أم فاطمة أرشيفك شباب
فيفي المقروط يشهي مع الكفة يعطيك الصحة
أم هذول في الغرب ناقص الإقبال على الفوط المهم ربي يحفظ البلاد والعباد هذا مكان وبصحتكم العدس والبطاط بالحوت
امنية عجبني شكل لاطارط بصحة العائلة
أم إسلام كلشي قمة الله يبارك في إنتضارك حبيبتي
مريومة بصحتك الدوبارة والشربة الفريك أممممممم شحال نبغيها
فضيلة مرحبا بيك منورة
اللي نسيتها تسمحلي