الجزء 183 من واش طيبتي اليوم كوزينة القلب الصافي و الذراع الوافي

[طيور الجنان]

عشايا اليوم بوراك تركي من كثرة ماسمعت عليه قلت نجربو هو صح يجي خفيف و مقرمش و بنين لكن بالنسبة ليا تحيا بوراك بلادنا لانو اسهل و الذ.

[x ام رحاب x]

طيور الجنان وام هدول صحة عشاكم
ام هدول واش من حمة راكي تهدري عليها هههه قولي قبل مانخرج

[ام هدول]

مازالو صور وحد اخرين...من بعد نصلي سع العشاء ...

[RIMA.87]

السلام عليكم ،
بصحتكم المحاجب غاليتي ام رحاب و اختي طالبة تاريخ راكم شهيتونا ،
اختي سحووبة الطبق الاول حللي و ناقشي الظاهر فيه باذنجان و الله اعلم،
ام هدول اغلب الظن انها حمى البوراك التركي و لا راني غالطة ههههه

[RIMA.87]

اختي طيور الجنان بصحتكم خرجلك توووب ،
اليوم عشانا كان سلق درت منو خبزة بالبطاطا المقلية و البيض و درت عجيجات بالارز مقليين و الحمد لله

[x ام رحاب x]

هههههه قتلتوني بالضحك راه فيروس ايدور في كل بلاصة بصحتكم حبيباتي انامع طيور الجنان بوراك بلادي مانبدلوش ابدا انموت على البوراك بالديول طبعا بالديول الي انديرهم في السنيوة تاع النحاس ايجي مقرمش وايشهي
بصح الحقيقة جاكم تحفة تسلم ايديكم ام هدول وطيور الجنان فحلات الله ايبارك عليكم ربي يخليكم لوليداتكم

[ام هدول]

ريمه جبتيها سوه سوه..هههه
طيور نفس الشعور ونفس الإحساس....يحيا بورااا ك بلادي..ويحيا........اكلات بلادي وشنانا في الحساد .خخخخخ....نروح منبعد...

[x ام رحاب x]

ريمة صحة عشاك عزيزتي مطرح مايسري يمري حنونة

[طيور الجنان]

ام هدول تاع واش الحمى راني نسنى ههههه انا خرجتلي غير صورة الرمان و الماندرين.
ريمة بصحتكم السلق و العجيجات يعطيك الصحة على الكلام الطيب.
ام رحاب و ام هدول مزية لقيت اللي يشاطرني الرأي لانو هاذ البوراك دار حالة و في الاهير تاعنا خير كيما قالت ام هدول يحياو اكلات بلادي

[طيور الجنان]

ام هدول انا ماخرجليش البوراك التركي تاعك واقيلا غاضو الحال كي قتلو بوراك بلادي خير ههههه

[x ام رحاب x]

هادا بوراكي خدمة ايديا وحيات عينيا راني انزوخ ياك ماعليش الي يزوخ في بلادو ههههههههههههههه

[x ام رحاب x]

ماتزفوش راني انقصر برك
ام هدول وطيور الجنان بصحتكم عزيزاتي

[طيور الجنان]

ماشاء الله عليك حبيبتي ام رحاب يعطيك الصحة الديول يبانو كيما تاع برا الحق راهو يشهي ياختي زوخي و عاودي هههه حقك ياك يديك اللي داروه.

[البحر الصافي]

واش راكم خياتي واش احوالكم تفكرت الكوزينة جيت نطل في الصفحة الاخيرة لقيت اختي الغالية ام رحاب دخلت نجري وشراكي اختي توحشششششتك
سامحوني لبنات راني الان نشوف فيها غير هي
ومن بعد نشوفكم

[البحر الصافي]

بوراكك هايل واكلك ديما قمةغير فوخي وزيدي خاصة حاحة بلادك
امونة كوزينتكهايلة رجعتيها ميما بكري بارك الله فيك
طيور الجنان بوراكك هايل حتى انا جربتو ..... ام هدول الغالية وشراكي .....وريما الفنانة دائما مبدعة ......استنوني نشوف شكون هنا ونرجع