مشكلتي مع العمل

[مشكلتي]

البسلام عليكم

بالمختصر المفيد أنا معلمة متزوجة و أم لطفلة مرهقة جدا جدا من عملي و ماكاش مجال باش نبطل الخدمة في الوقت الراهن لظروف قاهرة .

مشكلتي أني لما ندخل للبيت في المساء نحس أنفاسي مقطوعة و أنا في قمة التعب و مهما استرخيت إلا أن التعب لايزول و حتى العشاء نديرو بسيف و طبعا نقوم ببنتي و نرقدها على الساعة التاسعة ليلا ونرقد معاها مانزيدش دقيقة موراها مهما حاولت مانقدرش النعاس يقتلني و أكيد في الصباح دائما نوض على الساعة السادسة صباحا
و الله هذا الحال راهو مقلقني بزاف لأني كي نقارن برك روحي مع زميلاتي في العمل نحير واش راهو يصرالي وحدة مثلا تقولي البارح كي وصلت للدار درت ميناج كامل للكوزينة و غسلت لحيوط و من بعد عجنت و درت العشا و في الليل رحنا سهرنا في دار فلان !
و الأخرى تقولي البارح خرجت رحت واجب و كي رجعت عملت كذا و كذا !
أنا الحق كي نسمعهم يشدني الإحباط نقول و انا و علاش طاقتي محدودة ؟و علاش نتعب لهذي الدرجة ؟ ساعات نقول بالاك على خاطر نتعب بزاف في القسم نخدم من قلبي مع التلاميذ مي مانظنش بلي هذي هي السبة
اقترحو عليا كاش افكار نقدر نتغلب بيها على تعبي بالاك نستفاد منها

[اكرم akram]

ههههههههههههههههه سبحان الله وكانكي امي لي تهدر هكذا تماما ترجع من الخدمة منهكة وغدا تقولي انا نحير في هاذوك لي قادرين اظنهم يكذبو

[روعة الصحراء]

اختي في الله طبقي سنة حبيبنا محمد عليه افضل الصلوات وهي قبل ماترقدى قولى 33سبحان الله 33 الحمد لله والله اكبر34 والله مجربة مني لاتشتكي من التعب ابدا وتولي نشيطة
زيدي اقري الموضوع بشرى سارةالى كل من تشتكي كثرة الاعمال المنزلية في مواضيعي

[رحمة2016]

اختي نظن انك لازمك تشوفي طبيب الارهاق هادا كامل قادر يكون نقص فيتامينات برك او فقر دم مع الدواء الصحيح راح ترجعي غزالة

حتى انا نخدم ونعرف بزاف بنات متزوجات يخدمو صح يتعبو مي ماشي للدرجة اللي قلتي عليها عادي برك
وبالتوفيق حبيبتي

[first first]

ممكن جسمك يحتاج اعتناء اكبر من حيث التغدية

زوري طبيب وممكن تتحسن الامور

وجربي الذكر مثلما نصحتك الاخت

وربي يعينك

[نورسين.داية]

السلام عليكم


عزيزتي العمل المنزلي لا يبدأ من يوم في الأسبوع بشكل منفرد أو قائم بداته و إنما من عطلة الأسبوع التي هي بالعادة الجمعة و السبت .....و حتى تنظيف المنزل راه يختلف بين عطلة الأسبوع التنظيف اليومي للمنزل ماش كيف كيف

و العمل المنزلي فيه ترتيب و أولويات ......المهم القضية قضية نظام و أولويات .......و حتى الطبخ توجد أمور تحضريها من عطلة الأسبوع توفر عليك نصف المجهود اليومي .......الإنسان يسأل ............

بالتوفيق

[intel-i7]

bonne courage

[abder03]

انت معلمة: اصعب مهنة، تدريس و تحضير. الله يعينك.
انت ام لطفلة: اصعب مهنة، رعارية و تربية. الله يعينك.
انت متعبة: اتحداك لو تقولي غير ذلك.
انت فقط حتاجين شوي تنظيم للوقت. خذي ورقة مثل جدول التدريس، و نظمي وقتك. مثلا: تدريس/ 1/2 ساعة جلوس مع الطفلة/ طبخ الاكل ليومين/ تحضير/ الجلوس مع الطفلة حتى النوم.
خدي دوش دائما للاسترخاء، خذيه مع بنتك حتى تربحي الوقت.
في نهاية الاسبوع، حاولي ان تحضري دروسك في يوم الخميس حتى ترتاحي في الجمعة و السبت و تجلسي مع ابنتك و ترتاحي و ترتاحي و ترتاحي نفسيا ان لديك تحضير يجب ان تقومي به. مشكلتك تواصل الاعمال واحدة وراء الاخرى و تشعرين بعدم الراحة. قليل من التنظيم و تحل مشكلتك ، و قليل من العزيمة ستحل مشكلتك.

[ندى الصبح]

السللم عليكم
لست وحدك اختي الكثيرات مثلك ,,,,,,,,,,,,,,,,,الاستيداع لسنه واحدة حل اراه ناجعا

[قدور بن عاشور]

لازم لك تحليل دم،
فهو الكفيل بكشف سبب معاناتك مع هذا الإرهاق الذي يبدو غير عادي.

أجري على روحك سيداتي.

[lalib40]

الحل الراجل يصرف والمراة في الدار

[nihal159]

راقبي التغذية نتاعك؛ أنا أم لطفلين و عاملة و عادي جدا مانحسش بهذ الإرهاق لي تحكي عليه

[visa uk]

اعملي البيلون بلاك عندك حاجة فيك وفي دمك راقبي روحك جيدا

[غزلانْ]

السلام عليكم

ان كنتِ تجدين من عملكِ مشكلة و أرهقكِ ارهاقاا و لم تستطيعين التوفيق بين عملك وبيتك
هنا صحتك أولى و هي الأساس فرأفة لنفسك توقفي عن العمل و يحل المشكل

بالتوفيق

[محمد جديدي التبسي]

انا اللي محيرني وضع زوجك مع حالتك هذه ربي يكون في عونك وعونه
استعيني بالله واكثري من الذكر والاستغفار وراقبي أكلك ونظمي وقتك
وان اردت الاخذ بنصيحتي توقفي عن العمل في اقرب فرصة واهتمي ببيتك وزوجك
هذه ليست حياة زوجية مادام الزوجان يخرجان صباحا معا للعمل ويتركان ابنائهم في الحضانة
ثم تعود الزوجة متعبة كارهة حياتها كيف تجدد حياتها الزوجية وتعيش في سعادة؟؟؟
النظرة المادية للحياة افقدتنا الاستمتاع بالحلال نجمع المال وعندما يحين الوقت للاستمتاع به نجد العمر قد مضى والصحة ذهبت والحالة النفسية متدهورة؟؟؟ ربي يفتح عليك..