أمي تكاد تفقدني عقلي

[مشكلتي]

السلام عليكم و رحمة الله و بركاته
مهم خاوتي راح نبدأ من الأول و مانكترش عليكم باللف و الدوران
انا عضوة فالمنتدى و كاين بزاف يعرفو حكايتي و لي يعرفوها نتمنى مايقولو شكون انا و يعاونوني في حل لمشلكتي و فقط
انا عمري 23 سنة و انا ارملة توفى راجلي قبل شهرين من العرس و بعدها خطبت عام لاخوه و فسخت الخطبة
عانيت بزاف مشاكل مع كلام ناس و مع شخصي يعني نفسيتي و فعلا مريت بايام بزاف صعيبة و لكن الحمد لله تجاوزت الامر
و الان بعد ما نساو الناس قصتي و رجعت عادي و اخيرا بديت نرتاح نفسيا بدات امي تهبل فيا
كلما تثرا اي حاجة تعايرنيو تقولي انتي فيكي و فيكي و انتي وجه نحس على ناس و انتي لي تخطبتي و فتحتي الخطبة و انتي عرة البنات
رغم انو سبب فتح خطبتي هو انو لي خطبني ضربي بدون سبب و كسرلي يدي دخلني سبيطار
و هي عارفة الامر و تظن انو انا السبب و انو انا درك عالة و ماكاش لي راح يقبل يتزوجني و انو الكل يشوفوني كوشمار
انا مايهمنيش كلام ناس ولا واش يشوفو فيا لانو راضية بقدر الله و ضقائه مي عييت نفهمها مابتش تفهم و والله تعبتني بزاف و رجعت نفسيتي رجعت للاسوء و رجعت نهار و ليل نبكي بسبب الامر هذا
و تاني انا خطابة كاين و بزاف و لكن مانيش نقبل و ربي عالم مش تكبر و لا اي شيء و لكن ماجاش لي يتناسب معايا و مع افكاري و تاني انا مازلت صغيرة و هي تتعامل معي كانو انو بايرة بسن الخمسين سنة
عييت نتفاهم معاها بالعقلية ماقهمتنيش و درت كل وسعي ماحبتش تفهم عليا و الله خاوتي تعبت نصحوني لانو مش عابة نرجع عاقة لا سمح الله و الامر هذا ماعدتش نقدر نتحملو
بارك الله في كل واحد راح يرد على موضوعي
السلام عليكم

[ثلجَة]

السّلام عليكم
أختي حاولي معاملة أمّك بالتي هي أحسن
يعني تحاوري معها و حاولي اقناعها أنّ ما حدث قد حدث و مضى
و أنّه ليس لكِ حيلة فيه و كله قضاء الله و قدره
واشرحي لها أنّ الزواج رزق و رزقك لم يحن بعد
فن تفهّمت الأمر فالحمد لله و ان لم تتفهّم مع الوقت ستنسى الموضوع
لأنّه ربّما حداثة الأمر هو ما جعل الحاحها يزيد عليك فهي تريد أن تطمئنّ
على مستقبلكِ و تراكِ سعيدة ...
موفّقة أختي

[•~ندية الجوري~•]

و عليكم السّلَام و رحمة الله ...~
ــ
أتدري يا أختي ...
أنّنــا كمجتمع و بشكلٍ عام ... لا نُظهر مشاعرنا علنــاً

ستجدي أنّ والدتكِ الكريمة ..ينفطر قلبها عليكِ و على حالكِ ألما و كمدا
و لكنّها الأنفة...

هي تتمناكِ أوفـر البناتِ حظّا و أكثرهن سعادة و راحة

رُبما كلام النّاسَِ يُؤذيها و يُؤثّر في معاملاتها معكِ
أنتِ تعرفين أنّ منهمُ مُصابين بلوثـة إبليس ...
و تُستصاغُ في ألسنتهم أعراض النّاس

تجاوزي و كوني على ثقة بنفسك
و كلّ عباراتها المُؤذيّة ... أسبقيها بإشارة سالبة

و الله يفتح عليك و يرزقك من حيث لا تحتسبي

.

[paloma.laila]

لا حول ولا قوة إلا بالله لا تقنطي من رحمة الله ربي يعاونك راكي بقى صغيرة الوليدة ماعندك مديريلها صبري وخلاص ناس راه عزيز عليها لهدرة يلقاولك متيف ميرحموكش

[مداوم]

في الحقيقة سمعت عن كثيرات لهن نفس المشكل أي تصرف الأم لذا أقول لك هذا الأمر نابع من خوفها عليك فهي تخشى أن لا تتزوجين لذا أحبيها واصبري عليها فهي أمك وأحسني إليها فالأمور عادية وهذه هي الأسر.
يمكنك أن تستعملي واسطة أخت أمك مثلا أو قريبة أخرى احكي لها الأمر ولتتكلم مع أمك قد يكون فيه إصلاح كبير للأمر إن شاء الله
بارك الله فيكم
بارك الله فيكم

[صفاء الروح]

ربي يفرج عليك اختي
نعرف قاسيتي بزاف ربي يفرج عليك

[rayen73]

صبرا جميلا بنيتي أمك لا تلام وانت لا ذنب لك ،،،لكن اكسبيها بالتي أحسن واحاولي ان تدخلي طرف ثالث يكون له تأثير على الوالدة ،،،،اما ما حدث فهذا قضاء وقدر الله وما شاء فعل ،،،اكتري من الدعاء واقتربي من الله بالصلاة والنوافل وان شاء الله يستجيب إليك وصدقيني بنيتي أمك تحبك وتتمنى لك الأفضل ،،،،حاولي معها ولا تيأسي من رحمة رب العالمين رب يفرج عليك ويرزقك السكينة والطمأنينة .

[ام رضوان]

السلام عليكم
ربي يصبرك بنيتي ويقويك وياخذ بيدك ويرسيك على بر الامان
اللهم فرج كرب بنيتي صاحبة المشكلة وارزقها زوجا صالحا ينسيها همها
اللهم ابدل احزانها افراحا وصب عليها الخير صبا صبا اميييييين
بنيتي لاتياسي واصبري وادعي الله وتوسلي اليه ليفرج كربك
اما بالنسبة لامك لازمك تطاوعيها برك لانها امك وهي جنتك
وعلاه الجنة تحت اقدام الامهات لانو كاين امهات صعيب ترضيهم وطاعتهم في حد ذاتها جهاد
يمكن هي ثاني راهي تمر ضروف خلاتها تجرحك بهذه الكلمات
وكاين شي ناس كلامهم مسموم
يمكن راهم سمعوها كلامات قاسية
المهم التمسي لها الاعذار وسامحيها ليرضى عليك الله وحاولي تتوددين لها وكي تشوفيها مقلقة تجنبي الكلام معها وماترجعيلهاش الكلام
بنيتي اكثري من الاستغفار وسترين العجب باذن الله
ولا تياسي راكي مازلتي صغيرة وجاية لدنيا
ربي ينولك مرادك ويبعث من يمسح دموعك ويرضيك ويرضي امك عليك اميييين

[زبدة ذايبة]

[color="black"]نحن الجزائريون عندنا مشكلة كبيييييرة صراحة

من الأول كنت ننكرها (مع أنني متأكدة أنها حقيقية ) لكن لما خالطت الجنسيات الثانية

لقيت أننا عندنا المشكل في التعبير العاطفي

للأسف مانعرفوش نعبروا على العاطفة تاعنا

الوالدة الكريمة راهي حاملة الهم أكثر منك

إذا انت نسيتي وتجاوزتي مشكلتك هي مانساتش

مازالها عايشة بنفس الألم اللي مر بيك وكأنه كان البارح

وهذاك الضغط اللي راهي عايشة فيه قادر يقتلها في أي لحظة

مالقات حتى طريقة تتنفس بيها سوى انها تلقي اللوم عليك

لما تشوفيها هادية وعاودت رجعت لطبيعتها

ناقشيها وفهميها

مع أنني أستبعد أنها ستسكت

رايحة نبهك لحاجة نغفلوا عليها وهي خطيرة جدا

ديري في بالك أن الشيطان عدو لينا

وحتى نقربلك الصورة

تخيلي عايشة معاك وحدة في الدار وهي اللي تنشع في يماك في كل مرة حتى توصلك لدرجة أنك ممكن تضربي الوالدة

لو تعرفي أنها موجودة في داركم رايحة ماتخليهاش تزيد عندكم نهار

فمابالك بالشيطان اللي يجري في الإنسان مجرى الدم

تأكدي أنه

ينغز أمك عليك من جهة ، وينغزك عليها حتى تغلطي في جنب الله ثم في حق الوالدة وحق نفسك من جهة ثانية

ومن الشي اللي كتبتيه راكي تباني وصلتي لحد ماراكيش قادرة تتحملي فيه اكثر

يعني الشيطان مازالوا معاك جولة وحدة وتضيعي

وهذا هو الهدف اللي يرمي إليه

الشيطان عدو لللإنسان ورب العالمين قال عنه :" عدو مبين"

عليك وعلى سورة البقرة في الدار ( ماشي شرط يكون السحر) تطرد الشياطين

إذا عندكم في الدار صور او تماثيل نحيهم

عندك أذكار الدخول والخروج من البيت

وأسرع سبب ونتائجه تكون واضحة الدعاء

ادعي ربي ينحي على أمك هذا الوساوس

الشيطان حريص علينا حتى لا نرتاح ، ولا نهنأ

راكي مسلمة والحمد لله ماتخليش حياتك فارغة من الجوانب الدينية والعقائدية

أكثري من الدعاء وسيستجيب الله لك

هذ المشاكل اللي راكي عايشتهم مع الوالدة من نزغات الشيطان

هذه وساوس شيطانية ونزغات شيطانية للوالدة

انت الحمد لله تجاوزتي هذه المرحلة

لكن أمك وجدها ضعيفة وماعندهاش سلاح تواجه بيه هذا العدو

بالتالي راه يسلط فيها عليك

أكثري من الدعاء ومن الأذكار

وانصحي أمك كذلك بقراءة آية الكرسي والمعوذات وسورة البقرة

البيت اللي فيه القرآن تهرب منه الشياطين وتدخله الملائكة

ماتخلوش الدار وكر للوسوسة وللشيطان

يوسولك لأمك ويزيد يجي ليك حتى تتضاربي معاها ولا ديري حاجة غالطة

وذكر الله عزوجل مايجيب إلا الخير والاطمئنان

والبيت والنفس اللي يستحوذ عليها الشيطان مايجيبلها إلا الشر والخذلان

رب يهيديكم ويصلح حالكم[/color]