الى متى'الراجل ماينعابش'؟

[مشكلتي]

السلام عليكم
تمت خطبتي قبل 4 سنوات خطبة تقليدية لعامل غير ثابت و بعد ان تم الاستفسار عن عائلته بطريقة سطحية قالو انهم ' لاباس بيهم ' و لكوني لست جميلة و تعدى عمري 30 في ذلك الوقت فقد اجبرت على الموافقة بطريقة غير مباشرة
تم العرس و بدأت الحكاية :
اولا اكتشفت ان زوجي غير عامل و لا يملك قوت اليوم لدرجة وصلت نهارات مانلقاوش وش ناكلو بكل ماتحمله الكلمة من معنى مع انه ساكنين في بيت باباه لكن كل واحد مسؤول عن روحه عندهم
امه و العياذ بالله تمارس الشعوذة مع انها تدعي التدين و كي تكون تهدر تقول هذي خارجة من الجامع و هي لا تنكر انها تمارسها لكنها تتستر بأعذار واهية تقنع بها بعش المغفلين من اهلهم
ابوه دخل للحبس بتهمة اخلاقية

هدا كامل في العام الاول و من بعد جبت توام بنات و راكم علابالكم وش قالولي و واش عايروني و اولهم زوجي و ولات عادة عنده صباح و عشية يقولي نتزوج عليك نجيب مرا تجيبلي اللي يخلفني في هاد الدنيا و هو خدمة كي الناس معندوش عايشين على الفتات
بعد هاد الفقر توفى الوالد تاعي و خلالي مصدر مالي على شكل استثمار كل شهر زعما نهز مبلغ و قلت زعما على خاطر نهار ماشفت دراهمي دار الوكالة و هو يهزهم و يصرفهم على روحو
كي قلت لدارنا قالولي يخي راكي مستورة و تاكلي و تشربي وش تزيدي
جاو نهارات بدا يدخلي نيميرو ديرونجمو مباشرة عطيت لراجلي يهدر معاه و من بعد ولا يعيط غير كي مايكونش تما و كي بدلت النيميرو كيف كيف حتى شك فيا راجلي و كبرت القصة و اتهمت فيي شرفي و من بعد انا قتله اديه ل لابوليس و نشوفو و من بعد اكتشفنا بلي وليد عمه هو اللي راه يعيط و تم ضرب النح كي شغل ماصرا والو ماقاليش على الاقل اسمحيلي

الضضرب المعاملة السيئة الكلام الجارح و مع ذلك دايما انا الغالطة في نظر الجميع المهم كأي امرأة نسكت و نصبر حتى نهار قدر ربي و مرضت عافاكم الله ماداواني ماجرى بيا طيشني في دارنا و هاكذاك واحد ماقاله راك غالط حتى دارنا بالعكس يجو ليا يقولولي ساعفيه مسكين و الله ساعات يجيني الضحك انا رايحا نموت و هو المسكين
هاي خلاصت حياتي و ضاعو اجمل سنين الشباب واش كان راح يضرو لوكان احسن معاملتي ماشي النسا كامل يسمحو
هو كان عندو كيما جميع الرجال سلاح دنيوي وسمه ''الراجل ماينعابش '' بصح في الاخرة واحد مايسلكه من دعاوي المظلوم
اتقوا الله في النساء المستضعفات ماشي اذا عطالك المجتمع الجاهل الحق و القوة تنسا توزنها في عقلك و تشوف اذا فعلا حلال
اسمحولي كثرت عليكم
هاذي ماشي مشكلة لكن نداء و ادعولي ربي يغفرلي

سلام

[أسيل 0022]

ربي يعينك أختي و يلطف بيك.......... و يقولولك علاه المرا تخدم
وااااش نقلك
أول حاجة لفت نظري كلمة نجيب ليخلفني ههههههههههه غير ربي راه عارف الخير وين يديروو
برك حابة نخفف عليك احنا 4 بنات و باباا ربي يهديه و يحفظو كان مهبل ماما على جال الدراري لدرجة انو حنا البنات كنا نحسو أنفسنا منبوذين بصح عدت السنين ديت باكي مليح و دخلت كليتي بالمختصر شرفت بابا في شحال من حفل تكريمي كيما نقولو ولى يعرف قيمتي هههههه صراحة بدا يتغير تدريجيا خصوصا انو ولاد عمي مايدو ما يجيبو مسمرين برك
نصيحتي إليك كبري بناتك و شوفي السعادة من جيهتم هوما / راكي عايشة على جال بناتك . البنات هوما الي يسعدوك
و صل صلاه الثلث الاخير و دعي ربك من قلبك يصلح احوال زوجك ربي يهديه

[نورسين.داية]

السلام عليكم
عزيزتي العرف اسسه انسان عادي و الزامته لم يؤسسها قران و لا سنة ثبتت عن رسولنا صل الله عليه و سلم ، و اذا اردنا ان نغير الواقع علينا تقع مسؤلية التغير من انفسنا لا ان نخضع لقوانين الغير و نطبقها ثم نطلب التغير بل علينا نحن ان نكسر دلك الواقع الاعوج
و لا تنسي ان الرزق على الله عز و جل و ما كان عليكي الدخول في عقد خاسر و دون تثبت سبحان الله هذا زواج .....و لاحظي النتيجة ......
عموما نطلب الله عز وجل ان يفرج همك ان شاء الله و ينور بصيرتنا يارب

[زبدة ذايبة]

العيب مانسحقو حتى واحد يجي يوريهولنا

العيب عيب عند كل الناس وكل الأجناس

عقلية بكري راحت تاع الراجل مايتعابش

حطي وذنيك برك في داخل البيوت وتعرفي واش يسواو

حاشا اللي مايستاهلش وحاشا الأتقياء والأنقياء والأصفياء

حاشا الراجل بأتم معنى الكلمة

أما الوقت اللي رانا فيه

مابقاش رجال تتكلي عليهم وتلقايهم في اكتافك

ربما بقاو صالحين للإخصاب برك ( إلا من رحم الله )

يعني أدات أو وسيلة تتحصلي بيها على أولاد

الراجل اللي يخلي دارو وزوجتوا وأولادو على جال صورة إمرأة في فيسبوك

وياريت صورتها الحقيقة مجرد وهم

الراجل اللي يضرب زوجتوا على جال الملح زايد في الماكلة

الراجل اللي يضرب زوجتوا على جال جابت لبنات

الراجل اللي مايتأخرش يهتك عرض البنات ويغريهم بالزواج

الراجل اللي يهمل زوجتوا وماينفقش عليها ويروح ينفق على ....... ووووو

الراجل اللي مايعرفش شكون دخل لدارو من بعد مايخرج أو زوجتوا وين تروح بعد مايخرج

الراجل الكذاب

الراجل السراق وزيد يسرق زوجتوا باش هو ينفق عليها يولي هو اللي يسرقها

جاتني عيب نكمل. كاين في المنتدى رجال بزاف محترمين يسمحولي


أي رجال تتحدثين عنهم ؟؟؟؟؟؟؟؟ بل هم والله أشباه الرجال فقط

إلا مارحم ربي

كانت فتنة بني إسرائيل في النساء ومانحن منهم ببعيد.

ضعف زوجك والفشل والخيابة اللي راه عايش فيهم خلاوه يتوهم أن الحاجة الوحيدة اللي يقدر عليها هو أنه يجيب أولاد ذكور- هذي الحاجة الوحيدة اللي سليمة فيه-

لأنه يعتقد أن المشكلة فيك انت لأنك إمرأة انت اللي تجيبي الإناث وهو لأنه ذكر يجيب الذكور ؟؟؟؟؟!!!!!!

ماتحزنيش عليه نهائيا. هذا مكتوب الله ونحن ناس نؤمن بالقدر خيره وشره

واش ديري تزوجتي بواحد عطالك ربي منو لبنات بطريقة شرعية وهذا هو المهم عندهم أب وعندهم أصل

ربي بناتك يخرجوا صالحات تقيات . ربيهم على الدين وعلى تقوى الله

وباباهم إذا صلح راه زوجك وإذا راكي قادرة تتحملي معاه هو خير من والوا

[amira19]

الاخت زبدة ذايبة كفات ووفات
ربي يصلح حاله
و ربي يصبرك

كوني قوية

[خالد عنابي2]

كارثة ... هذا ما نقدر نقولو

بالصح المفروض اهلك وقفوا معاك وليس قالولك يخي مستورة وتاكلي وتشربي

[nasser26]

أختي الرجال ماشي كامل كيف كيف
- صح كاين الرخاس لي يبينو الرجلة غير فالدار ويحقرو نساهم و برا الكف ميرجعوهش على روحهم

مي كاين لي يخافوا ربي ... وزيد تان كاين بعض النسا النار ليهم ومتكفيش

[نجمة التميز ♥]

السلام عليكم و رحمة الله تعالى و بركاته
أختي تأكدي انه ما دام الله معك فإن نهاية كل كرب ستكون الفرج حتما
و فيما يخص زوجك أخبريه أن الرجل هو المسؤول عن تحديد جنس المولود و ليست الأنثى
اهتمي ببناتك و دعك من البقية
فما الله بظلام للعبيد
عليك بالدعاء
اسأل الله ان يفرج عنك

[ibtissembiti]

إييه قطعتيلي قلبي
ربي يكون معاك ويحميك و يرزقك بحلاله عن حرامه وبفضله عمن سواه
وربي يهديه ويبينلو الصح من الغلط
تهلا فتوأم ربي يحفظك ويحفظهم
تقبلي مروري

[سفير الأيام]

شوفي الفقر ليس عيب لكن انا من جهتي بالرغم من كوني رجل

الراجل اللي ما يتسببش في رزقه كامل ماشي راجل وبالزيادة ماهوش قانع بالرزق اللي قدمه له ربي

واش خاصه توام والله يبارك طفلات

قولي له وقتنا ورانا نشوفوا في كبرك تلقى غير الطفلة تجيك من دار راجلها وترفدك وتنقي لك وتوكلك والطفل قليل وين راه يخرج مليح ويتفكر والديه


شوفي اختي كل شيء بالمكتوب واش نقول لك صبري مادام عندك دراري وخرته ربي بصبرك يجازيك وما تعرفيش واش راه يستنى فيك


اما بخصوص رقم الهاتف لوكان انا صرات لزوجتي وكانت صريحة كيفك نعرف بلي بنت حلال وخايفة على بيتها

لكانت ردت فعلي التوجه لوكيل الجمهورية لاستئدانه في تقديم لي تسريح بغية تقديمه لوكالة الاتصالات الخاصة بالخط وعن طريق الشرطة يجبدوا لي الشخص وان كان حتى من الاهل فانني اتابعه قائيا بدون استحياء لانه خرب في عرضي وشرف اعز مخلوق لي


بصح يبدوا ان زوجك حدث ولا حرج فليس له نخوة الرجولة

ربي يصبرك اختي

[رَكان]

الراجل ما ينعابش ..مقولة صحيحة وتصور الواقع في مجتمعنا ..المرأة يجب أن تعمل ولاتكل لتصير مثالية شبية بالملاك الطاهر ..وويلها العثرة والخطأ ..ويلها أن تقول يوما وإن كان على استحياء أن تقول أنا انسان ..الرجل ..لامشكلة يمكنه أن يكون شيطانا فاسقا ..فاسدا ..تاركا للصلاة ..مرتكبا للموبقات ..في وضح النهار ..وعلى رؤوس الأشهاد ..ولكن يكفيه أن يصرح يوما أنه توقف عن ذلك يكفيه أن يلبس قميصا ويتوجه الى المسجد ويصلي جماعة ..يكفيه ذلك ليكون مرحبا به ..مقبولا مشكورا محمودا ..الراجل ما ينعابش ..هكذا قالوا ..المرأة يستدرجها الرجل في مجتمعنا .يعمل على ايقاعها في الخطأ ..وحين تقع فيه ..انمتهى أمرها والى أبد الآبدين ..تبا ..لمجتمع بهذه العقلية ..أوكان ذلك في اسلامنا ؟؟؟؟
أوكان ذلك مشروعا لدى الكفار .؟؟ أبدا ...
الإسلام .سوّى بين المرأة والرجل في التكليف والحقوق والواجبات ..الا ما استثناه الشرع .رحمة بها ...ورفع شأنها وصان كرامتها ...
الكفر سوى بين المرأة والرجل في الحقوق والواجبات ..فمنع ظلمها واهانتها واذلالها ..وصان حقوقها ..
فلا شرعنا التزمنا فيم أمرنا به نحو المرأة ..ولا قوانين واخلاق وضوابط الكفر في معاملة المرأة بلغنا ..
فعلى أي صعيد نحن .؟
صاحبة المشكلة ..ليس لك الا أهلك من يمكنهم رفع الضيم عنك ..
صاحبة المشكلة .هناك من يعانين مثلك وأكثر ...فمنذ أيام فقط حدث في منطقتي وأن تم العثور على امرأة بين الحياة الموت ..بعد أن فقدها ذووها قرابة الثلاثة أيام هجت على وجهها في البادية ..ثلاث أيام مرت عليها جوعا وعطشا وبردا ..وعلام ؟؟؟؟
هربا من زوج شيخا أجبرت على الزواج منه ..وليس كبر سنه ما دعاها للهروب ..إنما الضرب المبرح والسب والشتم تفتح عينيها على ذلك صبحا وتنام عليه ..امرأة سخرت نفسها لخدمته وخدمة ماشيته ..طول اليوم ولاتعرف فسحة للراحة وأخذ النفس ..لم تتحمل المسكينة فهربت من الجحيم الى غير وجهة لتضيع في القفار ..كانت تعرف أن الموت المحتم في الإنتظار ..الذئب ..أو الجوع أو البرد ..ولكن الله قدر وشاء أن يكون لعمرها بقية فوُجدت في الفلاة مرمية ..

[عثمان الجزائري.]

زوجك لا يتدعى كونه ذكر

[randa3]

ربي يصلح أحوالك وأدعي الله في أخر الليل انو ربي يصلح لك زوجك ان شاء الله
ماعليك سوى بالدعاء فهو الذي نجى الأنبياء

[ساجده 82]

سلام فرج الله همك ونفس كربك
وعافاك الله واصلح لك بناتك وعوضك خيرا
الاخت زبده دايبه كفات وفات ...

[nihade off]

الى متى الراجل ماينعابش : الى ان يرث الله الارض و ماعليها
بالنسبة للاخت اللي قالت هو خير من والو اسمحيلي ختي والو خير الاخت مسكينة تعاني من العنف اللفظي و الجسدي لاقدر الله قادرة تهبل و لا كاش ما يصرالها
اختي حاولي تربي بناتك تربية صالحة و اذا طلقك و لا تزوج عليك تتهناي منو
و اذا خلاك حاولي متربحيش الذنوب بسببه يعني قومي بواجباتك كزوجة و خليه بينه و بين مولاه
موفقة
سلام