حيرة تقتلني

[مشكلتي]

لاخوة انا لا اقدر على تقرير المصير
فلامر يسبب لي ضيقا شديدا
كلما فكرت فيه
انا في دارنا اعيش حياة يتمناه اي واحد ولله المنه
مكاش مشاكل وان حدثت فربما مرة فالشهر

انا مش متعودا على المشاكل واخاف ان اذهب الى بيوت الناس واجد ما يعكر مزاجي ويجعلني اندم لانني وافقت من البدايه
خطرات نقول نقبل وخطرات نتراجع
لاني حاسا انو التصور ليس مثل الواقع وامر زواج شيء صعب جدا خاصة عندما تذهب الى اناس ماتعرفهمش
الزواج مثل الجلبانة قادرا تكون خضرا قادرا تكون مدودا معمرا بالدود
رفضت عدة مرات اناس لاني شعرت بالضيق
والان مازلت اشعر بالقلق
ولا استطيع فعل شيء
انا مش مننوع لي يحمل الذل ولا الحقرة
كينشوف الظلم نبعد من مكان لي فيه الظلم
ومستحيل الزواج مافيهش ظلم
قادر يجيك من اي واحد من عائلة الرجل
وعندها لن افعل شيء سوى الانسحاب
لاني متعودا ننسحب فلمواقف لي فيها ناس يتسببو فلمشاكل
لا اعتقد اني ساتصرف بحرية في وسط عائلة الزوج كما كنت افعل في بيتنا
جربوها برك كيتروح ضيف للناس تدخل ضضيف وتخرج ضيف
انا مشوشه جدا ولا اقدر على اتخاذ اي خطوة في مشروع يسمى زواج

[محارب الحمق]

واش حابة نقولوك؟ ماتتزوجيش وخلاص لانو كيما قلتي, الزواج فيه فيه المشاكل

[زبدة ذايبة]

واحد مارهو متعود على المشاكل

المجرم لو كان تسقسيه على المشاكل يقولك: يالاطيف الله لايجيبلنا المشاكل

التصور اللي راكي تحملي فيه على الزواج خاطئ هذا ثانيا

وأولا " الطريقة اللي راكي عايشة بيها في داركم خاطئة

ماراناش في الجنة

الأصل فينا الاختلاف يعني كل الناس تختلف مع بعضها البعض وهذا أمر طبيعي جدا

لكن

تعتقدي أن دار باباك رايحة تبقى هكذا راكي غالطة

غدوة يتزوجو خاوتك ماعندك وين تهربي

راكي رايحة تعرفي ، وراكي رايحة تعيشي الحياة الاجتماعية على أصولها

وهذيك وين تكون مشكلة تهربي هذا ماراهوش حل ليها

كي تهربي من المشكل مايعنيش راكي حليتيه

وكي ماتشوفيش المشكلة مايعنيش ماراهيش موجودة

حتى تتخلصي من المشاكل حليهم ماتخليهمش

وش بيك هكذا

قاقة في وريقة راكي في الدزاير بلاد المجاهدين

والدينا جاهدو ومازالنا نجاهدو في الحياة

افرضي روحك راكي على قيد الحياة

سبحان الله وبحمده

كيفاش رايحة ديري دار وتكوني مسؤولة على زوج وعلى أولاد

ولا اللي تزعفي عليه تهربي منو

كان أولى أنك تزعفي على نفسك هي اللي دايرتلك المشاكل

الناس خاطيينك خلاص !!!!!!!!!!!!!

وشنو هذا ؟؟؟؟

شخصية من زجاج اللي يجي يكسرها

ماشي هكذا يا أختي

إذا كنت مراهقة نقولك ماشي هكذا

وإذا كنت شابة ماشي هكذا

الحياة تحتاج لقلب صحيح ينبض بالحياة

ماتكونش حياتك ميتة وانت على قيد الحياة

اخرجي للناس وللدنيا

اللي يزعفك رديلو الهدرة ماتتخبايش

عندك مشكلة واجهيها ماتهربيش

واحد ماراح يعيش في بلاصتك لوكان ماتعيشيش حياتك انت

انفض على روحك هذا الضعف وهذا الجبن وهذ الأوهام اللي سلسلتلك عقلك

وخلاتك تعيشي في دائرة الأوهام

الحياة اللي راكي تشوفي فيها مريحة وهم راكي عايشاتيه

يجي نهار وين تفطني وتفيقي ونتمنى مايكونش راح الحال عليك برك

عاودي جددي حياتك وابعثي فيها الحياة

حياة الظلام والاختباء والعزلة ماتوصلك حتى مكان

راكي رايحة تبقاي مسجونة في غرفتك ماتخرجيش منها

لأن داركم والأسرة اللي اكي فيها راهي رايحة تتغير لامحالة مسألة وقت فقط

اسمحيلي الزواج ماشي كي الجلبانة الخضرة!!!!!!!!!!!!

بما أنك راكي تعرفي تستخدمي جهاز الكمبيوتر وتكتبي في المنتدى

تقدري تبحثي على مواضيع بزاف

يوجهوك في حياتك

قد ماكتبت ما رانيش نشوف أنه يكفي لحالتك

ديري شوية مجهود للتغير

ان شاء الله راكي فهمتي وش كتبتلك

إن شاء الله تبداي صفحة جديدة في حياتك تكوني فيها انت البطلة ومايكونش دورك فيها وراء الستار أوتكوني متفرجة فقط


ربي يوفقك

[مصطفى_س]

قَالَ النَّبِيُّ صَلَّى اللَّهُ عَلَيْهِ وَسَلَّمَ
" الْمُؤْمِنُ الَّذِي يُخَالِطُ النَّاسَ وَيَصْبِرُ عَلَى أَذَاهُمْ ، خَيْرٌ مِنَ الْمُؤْمِنِ الَّذِي لا يُخَالِطُ النَّاسَ ، وَلا يَصْبِرُ عَلَى أَذَاهُمْ "

صحيح انه لا احد يحب الظلم و لا يرضى به ما يجب عليك فعله او اي زوجة او زوج هو العيش في مودة و رحمة و تجاهل المشاكل الصغيرة التافهة
لا وجود لاي بيت لا يخلو من المشاكل و حتى بين الاخوة او الوالدين و لكن لنكن متفائلين و السعي لارضاء رب العزة اولا ثم الوالدين و الزوج
استخيري و أوكلي أمرك لله رب العالمين هو يحسن التدبير
اسال الله ان يرزقك الزوج الصالح و جميع شباب و شابات المسلمين.

[لمسة ابداع]

الاخت زبدة دائبة كفاة و وفاة
نزيد على كلامها برك
اذا جاءكم من ترضون دينه و خلقه فزوجوووووووووووووه ان لم تفعلو تكن فتنة في الارض و فساد كبييييير صدق رسووول اللله صلى الله عليه و سلم
صلي صلاة الاستخارة و ربي يكملك و يرزقك الزوج الصالح

[طيور الجنان]

اختي لازم تبدلي نظرتك للزواج لانو لو كل وحدة تخمم كيما انت حصلة ماتبقايش تفكري بهاذ الطريقة لانو بزاف بنات تزوجو و عاشو مع ازواجهم حياة هايلة ربي يوفقك.

[Davidcena]

فكري ف الجانب الايجابي للزواج علاش تخممي غير ف المشاكل

[اميرة اليالي البيضاء]

بارك الله فيك

قوليلي حنونتي كي ماكيش تخمي
في مشروع الزواج فاش راكي تخمي ؟
شوفي ملايين البنات يريدون الزواج
ويبحثون عن سبل الزواج وانت لا
تريدين الزواج وغدا من سيكون
سندا لك بعد غياب والديك
يجب ان تكوني قوية وتتحملي
المسؤلية وتكون لك القدرة عن
حل المشاكل وعدم الهروب منها
هذه هي الحياة الزوجية احيانا
تكون مستقرة واحيانا متذبذة والمهم انك تسيطرين على الوضع
ولا تتأثرين .
احنا عندنا بنت 17 سنة تتزوج و
تتحمل المسؤلية وتتعود على
المشاكل وانت خائفة
الى متى ستبقي خائفة
انزعي ثوب الخوف والقلق
اليوم تخافين من الزواج والمشاكل
وغدا كيف تواجهين العنوسة و
مشاكلها ومخاطرها .
##########

اختي روحي تزوجي و اللي تصرا
تصرا بالك تكوني محظوظة تعيشي
سعيدة .
سلام من قلب احب السلام

[فاطمة شلف]

السلام عليكم
الحياة دون مشاكل مهيش حياة
كيف يكون لها طعم اذن
ماعد الخدعة الزوجية
توكلي على ربي

[knives66]

افضل وسيلة للدفاع الهجوم

مشكل فيها فيها ومكانش منها حياة بدون مشاكل

ولي ما تعلمش يوجه المشاكل راح يعاني في حياتوا

ولي يهرب منها تجيه وتعبوا .

الحل وحيد هو موجهة المشكل و صبر على اي مشكل لان ((ان مع العسر يسرا))

[نسيم الريح ش]

المشاكل نتي ما جيبيهمش لروحك عيشي ضحك والعبي وما دخلي روحك حتى في حد ما جي مع حتى واحد ديري روحك ما سمعتي ما شفتي ما تعرفي تهلاي في راجلك اولا وامه ثانيا والباقي احترام وقدر وكيما هاك تكون المشاكل قليلة .ومكاش دار خالية من المشامل

[blanche rose]

باختصار حبيبتي
والديك باش وصلوا لمرحلة الاستقرار اللي راكي تشوفي فيها مروا بعدة مشاكل .. ما حكاوهملكمش باش تستقر العائلة..

أنا كنت مثلك لكن بالقراءة وملاحظة العائلات الاخرى ومتابعة الفيديوهات والنصائح وبالتجربة التي تجعلني أتعلم درسا كل مرة.. صبرت ولله الحمد، وتجاوزت امور لم أكن لأتجاوزها بتفكيري السابق

الأهم،ثقي بالله عز وجل حصني نفسك يوميا وتقربي إليه كثيرا ولا تخافي

ربي يسعدك
فهو لا يكلف نفسا إلا وسعها

[سحابة باردة]

سلام انا ماعندي مانزيد على كلام الاخت زبدة دابئة وباقي الاخوات والجرعة القوية الي عطتهالك اميرة الليالي فقط ملاحضة انتي تحبي تعيشي حياة هادئة
ياو الحياة الهادئة نصنعوها بايدينا ميش نلقاوها على طبق من دهب
سلام

[noureddine2016]

انا وزوجتي كنا اذا لم نتعارك في الصباح نتعارك في المساء والعكس صحيح عادي جدا ومع مرور الوقت والفنا.. المشاكل جزء من الحياة الزوجية فقط يجب مواجهتها بذكاء وعدم الانسحاب حتى لاتتراكم وتصبح معظلة حقيقية يااختي اذا السيد ناس ملاح توكلي على ربي

[أم سلوى]

المشاركة الأصلية كتبت بواسطة noureddine2016

انا وزوجتي كنا اذا لم نتعارك في الصباح نتعارك في المساء والعكس صحيح عادي جدا ومع مرور الوقت والفنا.. المشاكل جزء من الحياة الزوجية فقط يجب مواجهتها بذكاء وعدم الانسحاب حتى لاتتراكم وتصبح معظلة حقيقية يااختي اذا السيد ناس ملاح توكلي على ربي

الله خليكم لبعض ....