"◦˚ღيوميات ربة بيت في رمضانღ˚◦"

[ام آدم]

يالنسبة ليومياتي تختلف في اليوم لي نكون فيه خدامة على اليوم لي ما نكونش فيه خدامة
راح نبدا باليوم لي نكون فيه خدامة
النهوص للسحور على الساعة 2.30ومن نسحر وحدي فزوجيما يتسحرش يشرب الماء فقط ومن بعد نتوضا ونصلي حتى يأذن الفجر نصليه ونقرا وردي ونرجع للنوم تقريبا الساعة الرابعة الى غاية 8.00 نوض نتوضا نصلي الضحى ونوجد روحي ونروح للخدمة
نرجع من العمل الساعة 2.15 نتوضا نصلي الظهر ونتكا شوي حتى الربعة نوض ندوزن الشربة و دوزيام بلا ومن بعد نصلي العصر ونرجع للكوزينة نطكمل لفطور والسلاطو والفلان والتحلية الكسرة تكون عندي موفرة من الايام لي ما خدمتهش المهم نكمل حوالي الساعة 19 نحاول نغسل الاواني تاع الطياب ونوجد طاولة الفطار من بعد الافطار نغسل الواني ونسيق الكوزينة والهول والدوش والتوالات غرفة الاولاد لي هي غرفة القعدة وحيانا نجوز على الصالون المهم نكمل على 10 نقعد نصلي و نطل على النت ونرقد حوالي 11.30 ولا 12

[ام آدم]

اليوم لي ما نكونش فيه خدامة لا يختلف كثيرا
سحور صلاة قرآن في الفجر
صلاة لضحى
الاختلاف هو اني ممكن نبدا في الفطور الصباح ونخلي لعشية للكسرة والسلاطة والتحلية
وايضا يختلف في كون التنظيفات تكون اعمق بالاضافة لغسل الملابس والكوي ومسح الغبار..........
وايضا قراءة القرآن تكون اكثر بعد الظهر
اللهم اعنا على الصيام والقيام وتقبل منا يارب

[omelbanin]

السلام عليكم، انا هاذو اليامات راهو عندي الم في الكتف والرقبة راني غيرمع المسكنات والله غير شغلي راني نخدم فيه بسيف، اليوم اولادي هوما لي نظفو المرحاض والدوش. والبارح وليدي درتلو كرسي وغسل معاي لماعن. وكل يوم نقول نروح لطبيبة وهي شوية بعيدة. ووليدي صغير ما عنديش وين نخليه. اسمحولي دخلت نشتكي. راني متكية ونكتب بالتابلات. اللهم اعني على ذكرك وشكرك وحسن عبادتك. امين

[حياتي كلها امل]

السلام عليكم شكرا ام ادم على التهنا وربي يفرحك بولادك .
انا نوض للسحور نتسحر ونصلى ركعتين ثم نقراالقران ثم نصلي الفجر ونقرا الاذكار نولي نرقد حتي 8 نطيب الحليب لاولدي ثم نغسل الاواني ونخمل البيوت بعد ما زوجي يذهب للعمل ونسيق كل يوم المطبخ والكولوار والمرحاض والحمام اما البيوت يوم بيوم ومثل اليوم كان عندي ملابس للغسل غسلتهم ونشرتهم ثم نصلي الظهر ونقري القران ونرقد بنتي ونتكى سعات نرقد سعات لالا ثم نوض نطيب الشربة اذا ماكانتش عندي وبلا الثاني والسلطة والفلون ثم صلاة العصر والاذكار ونكون كملت الفطور نغسل الاواني ونخمل الحالة وسعات نهبط عند عجوزتي وساعات يجي الزوج بكري نقعد معاه ثم نوجد الطاولة بمساعدة بنتي ونفطرو تعاوني بنتي في الاواني نطيب قهوة للزوج ثم نصلي العشاء وسعات التراويح اذا ماكنتش متعبة ثم يرقدو الاولاد ونرقد على11:30 12:00

[arwa alaa]

السلام عليكم يا فراشات واش راكم

[arwa alaa]

يوميات رمضان
انا نوض نتسحر على 2.30نشرب حليب بالقهوة وشوية ديسار راجلي ميتسحرش يشرب غير الماء كي يجي من التراويح ياكل
نصلي حتى يذن الاذان الاول نصلي ونقرى القران حتى يذن الصبح نصلي ونسبح ونقرى اذكار الصباح
نرجع نرقد حتىالثامنة ينوضو الاولاد نفطرهم ونغسللهم نهار وندوشهم نهار نكمل ليهم نغسل مواعن السحوروالسهرة وندوزن الشربة نديرها كل يوم
الشباح نهار بنهار
والطبق الثاني نهار بنهار ونهار الي منديرش الطبق الثاني ندير بيتزا ولاكوكا ...كالدي ....
نروح نفرز البيوت ونغسل القش
نجوز عاى الدنيا كل يوم

[arwa alaa]

توصل ال12نفطر الاولاد ويكون فطوري طاب نغسل المواعن نروح نرقدهم ونرقد معاهم حتى الرابعة نشربهم الحليب وندير حاجة حلوة والفلونوالمحلبي ونحطهم يبردو وندير الكسرة والسلاطة ونوجد الطابلة وبيبقى غير البوراك
نوجد وحدة من البنات باش تخرج ونكمل كشما بقى
نفطرو نتفرجو كميرامخفية هذاك واش نشوف نهار كامل راني مقاطعة التلفاز في رمضان راجلي يروح يصلي هو ووليدي وانا نغسل المواعن مع تلباز اروى والاء ههههههههه زعما يغسلو معايا
نكمل نغسل روحي ونوجدهم برقدو نرقدهم وندير التراويح ونقرى حتى يجي الزوج نحط السني نتاع السهرة ومنبعد نرقدو على 12 نتاع اليل
وبنسبة لجانب الديني راني معتمدة برنامج الاخت امنيات راهو مساعدني ونصلي في الوقت ونصلي النوافل ربي يحفضها ويجازيها

[arwa alaa]

ربي يقدرنا ويقدركم في هذا رمضان والله دارتلي القلب الاخت ندية وراح نحاول نحسن من عدد الاحزاب الي نقراها

[omelbanin]

السلام عليكم، جا زوجي بكري. على3. رحت معاه للطبيبة. وعطاتني ادوية مسكنة وقالتلي ديري راديو،، اليوم طيبت غير. شربة. الصباح. و ممبعد راح نقلي الفلفل. وخلاص.

[ام آدم]

السلام عليكم ام البنين ربي يجيب الشفا حبيبتي سايسي روحك وطمنينا عليك بعد ما ديري الراديو

[حياتي كلها امل]

بالشفاء عليك ام البنين وخدمي غير بلعقل واش قدرتي

[omelbanin]

شكرا حبيبتي ام ادم،وام هاجر، الراديو قالتلي كملي الدوا وديريه بعد رمضان قالتلي احتمال يكون بداية arthrose لانو المراة في بداية الثلاثينات ممكن يبداها.
. ومقبيل. قريت من المصحف وانا متكية والنت غير. كي والفتكم وما نقدرش نستغنى عليكم .

[oum sabrin]

السلام عليكم صح فطوركم
ام البنين لا باس عليك غير بلعقل ما تفورصيش على روحك و ان شاء الله ما يكون غير الخير طمنينا حبيبتي
ام ادم اروى الاء حياتي كلها مل و كل الملتحقات بعدي صح سحوركم

[ام متين]

]
دعاء اليوم الثامن
عن ابن عَبَّاسٍ، عَنِ النَّبِيِّ صلى الله عليه و آله:
" اللَّهُمَّ ارْزُقْنِي فِيهِ رَحْمَةَ الْأَيْتَامِ، وَ إِطْعَامَ الطَّعَامِ، وَ إِفْشَاءَ السَّلَامِ، وَ ارْزُقْنِي فِيهِ صُحْبَةَ الْكِرَامِ وَ مُجَانَبَةَ اللِّئَامِ، بِطَوْلِكَ يَا أَمَلَ الْآمِلِينَ".

ثواب هذا الدعاء

"مَنْ دَعَا بِهِ رُفِعَ عَمَلُهُ بِعَمَلِ أَلْفِ صِدِّيقٍ" .

[ام متين]

على سلامتك ام البنين وربي يشفيك وغير بالسياسة في الشغل
سبحان الله الاثنين الي فات كان اليوم الاول واليوم ران في الثامن يارب اغفرلنا تقصيرنا يارب انت اعلم بحالنا واحوالنا
الايام تتشابه والروتينات تتكرر انا كل يوم يفوت نحمد ربي كثيرلما نقوم نصلي العشاء وانا واقفة ونعمل ركعات بعد العشاء والله نحس بفرحة كبيرة يارب لا تحرمني من هذه الفرحة واعيني على ذكرك وشكرك وحسن عبادتك .نحاول قدر الامكان ناخذ بنصائحكم ودائما كلامكم في بالي حتى وقت السحور
جهينة عندك الحق بالنسبة للقيلولة لكن انا مشكلتي ان اولادي ما يرقدوش في النهار لا الكبار ولا الصغار وزيد ان النوم نتاعي في النهار خفيف وصعيب يعني لوتغفو عيني دقيقة ونفيق بسبب صوت ما ما نقدرش نعاود نرقد وتخيلي الاولاد في الدار الكبار نقدر نتحكم فيهم باه ما يديروش الحس لكن الصغار فهميهم غير نحط راسي على المخدة يجي الصغيرواذا ماجاش يتقابض مع اختو رغم اني نحاول نخلي الكبار في غرفتهم والصغار في الصالون لكن الحمد لله ربي يقدرنا.