بمناسبة شهر رمضان.... دورة طبخ للمبتدئات

[om obaida]

نعتذر من الاخت اسيا والاخت موستا حبيت فقط نقول للاخت زينب حنا عندنا المرمز اصلو من تشيشة الشعير لكن نقليوه كيما تشيشة الطمينة وشنو يكون خشين كيما لفريك وتشيشة الشعير تبقى بيصة وصدقيني تجي شريبة نتاعها ماشاء الله ومتصرش في المعدة حنا شيخي عندو القلب والكلسترول وووراكي عارفة حالت الكبر عايش غير بيها ومتضروش

[زينب 83]

المشاركة الأصلية كتبت بواسطة om obaida

نعتذر من الاخت اسيا والاخت موستا حبيت فقط نقول للاخت زينب حنا عندنا المرمز اصلو من تشيشة الشعير لكن نقليوه كيما تشيشة الطمينة وشنو يكون خشين كيما لفريك وتشيشة الشعير تبقى بيصة وصدقيني تجي شريبة نتاعها ماشاء الله ومتصرش في المعدة حنا شيخي عندو القلب والكلسترول وووراكي عارفة حالت الكبر عايش غير بيها ومتضروش

اهلين حبيبتي
ايه انا تاني غيرىشربة المرمز حنا معروف بزااف جهتنا
لكن انا حبيت نفهم كي قالت موستا تشيشة الشعير نخلطوها مع المرمز حنا عندنا مرمز واحد هذاك هو لي نديرو بيه الشربة
بارك الله فيك حبوبة

[ذات النورين]

اختي زينب ماعجباتكش حريرتي ههههه
علبالي ما شفتيش ردي

[زينب 83]

حبيباتي
طاجين الزيتون على اصوله كيما تاع زمان
طاجين الحلو او العين
هيا اعطيونا وصفاتكم وين راكم يا حراير ؟

[زينب 83]

المشاركة الأصلية كتبت بواسطة ذات النورين

اختي زينب ماعجباتكش حريرتي ههههه
علبالي ما شفتيش ردي

لا شفتو حبيبيتي يعطيك العافية حنونة
راح ننقلهم مع البقيةايا زيدينا طاجين الزيتون و الحلو

[lila z]

بارك الله فيك حبيبتي زينب أفكار نيرة ما شاء الله
تفضلي طريقتي في طاجين الزيتون حنا نعملوه مرق أبيض و كاين اللي يعملو أحمر
و الجاج ديمة قبل ما نجي نطيبو نرمدو ف الفرينة بش المرق ف الأخير يجي عاقد

طاجين الزيتون

المقادير:

* أطراف دجاج
* 1 كغ جزر مقطع دوائر
* حبة بصل مسكرفجة
* رأس ثوم
* زيتون مثقوب
* 1 إلى 2 م ك زيت+1 م ك سمن أو مرغرين
* 2 م ك فرينة/ ربطة معدنوس
* لعمل الكريات : 300 غ اسكالوب مرحي/حبة بيض/2 م ك شابلور/1 م ك بصل/شوية ثوم/معدنوس
* ملح+فلفل أسود+شوية كمون+كركم
* ماء
طريقة التحضير:
*في طنجرة الزيت+المرغرين حتى تذوب
* الدجاج نرشهم بالفرينة و ننفضهم، ثم كي تذوب الزبدة نحط الدجاج يتقلى حتى يتحمر من الجهتين
* نحط البصل حتى يذبال "مهم أنه يذبال" ثم الثوم على نار هادية+شوية معدنوس+ملح منكثرش+فلفل أسود+شوية كمون و نخلط
* نحضر الكريات بخلط الاسكالوب+البصل+الثوم+المعدنوس+الشابلور+حبة بيض+ملح+فلفل أسود+كمون+شوية كركم و نخلط و نعملهم كريات و نخليهم في الثلاجة
* نرجع للطنجرة نزيد للنار و نمرق حتى يتغطى الدجاج و نضيف الكركم
* كي يبدا يغلي نحط الجزر+الزيتون و نخلط
* كي قريب يكمل الطياب ¼ ساعة قبل نحط الكريات من الأحسن ننزع الدجاج إذا طاب.
* نزينها بالمعدنوس

[ذات النورين]

الله يسلمك اختي زينب
بالنسبة لطاجين الزيتون انا نحب نطيبو في الطاجين تاع الفخار يجي لذييييذ بشكل غير طبيعي
اولا نحط الزيتون نتاعي ليلة من قبل في الماء والخل وكل مرة نبدلو الماء حتى اللي نجي نطيبو يكون الملح هرج منو وهكذا ما يفقدش بنتو ثم نصفيه من الماء نغسلو مليح ونحطلو نص مغيرفة صغيرة سكر وهذا سر اخر يعطيه بنة على بنة
نسكرفج البصل وندير كمية لاباس بيها قيس بصلة كبيرة لانه هي اللي تساعدني باش يجي المرق خاثر
ونقليه في شوية زيت زيتون والدجاجلازم نكون مرقداتو في هاذو التوابل ليلة من قبل مع مغيرفة زيت زيتون وقيس ربعة سنينات توم مسكرفج ونفس التوابل نديرهم في الطاجين واللي هوما الكركم الفلفل الاسود سكنجبير قصبر مرحي ونقلي
ونزيد مغرف تاع ماكلة طماطم مصبرة نحب نقليها هكذاك معاهم ونرمي الزيتون يتقلى معاهم وعلى حسب اذا كان صغير نرميه في الاول يتقلى معاهم اما اذا كانت حبتو كبيرة نعمرو باللحم المفروم ونرميه بعد ما نمرق وتغلي المرقة
المهم نزيد كاس ماء فوقهم ونخليها حتى تقرب تنشف نزيد لب الليمون المصبر وحبيبات بطاطا مقطعة خشينة شوية ودائرية ونستفها فوق الزيتون ساير داير ونزيد فوقو الجزر مقطع دوائر ساير داير ايضا ونرش شوية قصبر ملفوق نمرق قد ما يتغطى الدجاج ونغلق الطاجين ونخليه على نار قليييييلة يطيب على خاطرو وهذا سر اخر لزيادة البنة
غير يطيب والمرقة تختار نزيد شوية معدنوس وحبيبات لوز محمر ومقشر نذرذرو ملفوق
ونقدمو في طاجينو وبالصحة والعافية

[ibtihal18]

طاجين الزيتون
في قدرة نقصو حبة بصل +شوية معدنوس+ 3 سنات ثوم+ملح+الفاح ولا التوابل اللي موالفين بيهم +فلفل اسود+4 ملاعق زيت+ حبة طماطم رابي +لحم ولا دجاج .................نقليوهم مليح فالزيت وحد 10 دقايق حتى يبدا البصل يذوب كي تلقاه بدا يذبال ضيفيلو شوية ماء سخون كيما تتغطا اللحم باش تطيب شوية كي تنشف ضيفيلها زوج حبات زرودية مقطعة دوائر باتجاه جانبي يعطيها شكل رائع خليها تتقلى شوية مع البصل و بعدها مرقيها بالماء يغلي و كي تمرقي اذا كان حطيتي دجاج نحيه خاطي و مرقي و و ذوقيه اذا طيب ما ترديهش حتى للاخير و سربيه و اذا طيبتي باللحم ما تنحيهاش مي كي تمرقي حاولي ما تصبيش الما فوق اللحم يقولو امهاتنا ربي يحظهم بلي يسماط و لوحي الزيتون تاعك بعدما تكوني غسلتيه و غليتيه زوج مرات يعني غليه المرا الاولى و مبعد قلبي الما و بدليه و زيدي خليه يغلي هكذا باش يجي طري و يطيب مليح و خليه يطيب على نار قليلة شوية يطيب بعقلو كي يقرب يطيب قصي حبة ولا 2 بطاطا صغيرة قصيها براج على 4 و قليها فالزيت شوية و لوحيها مع الزيتون و خليهم يطيبو كي يوجد حطيلو طماطم مصبرة خليها تطيب و طفي عليه و لازم يكون الصوص خاثر و كل واحد كيفاش يحبو كاين اللي يحبو فيه الما بزاف كاين اللي يحبو خاثر عن نفسي نحبو يكون خاثر ..........بعض الافكار ديتهم من مرت سلفي باباها طباخ كبير و طيابها ماشاء الله
نتاسف لعدم وجود الصور

[mosta*limoges]

المشاركة الأصلية كتبت بواسطة زينب 83

اهلين حبيبتي
ايه انا تاني غيرىشربة المرمز حنا معروف بزااف جهتنا
لكن انا حبيت نفهم كي قالت موستا تشيشة الشعير نخلطوها مع المرمز حنا عندنا مرمز واحد هذاك هو لي نديرو بيه الشربة
بارك الله فيك حبوبة

أختي زينب كيما قالت آسيا om obaidaالمرمز أصلو شعير بصح في منطقتنا سنابل الشعير مين تكون خضرا و يخدموها نقولو مرمز أما الثاني يخلوه حتى ييبس و يحصدوه هداك نقولو لو دشيشة نتع شعير عادية ولا بيضاء و أنا فقط كانت عندي كمية كبيرة من نتع شعير خلطت معاها نتع مرمز تجي هايلة في لبنة
طاجين الزيتون نطيبو بمرقة بيضاء
قبل ليلة نصفي الزيتون من الماء نتاعوو نغسلو و نخليه يبات في ماء جديد مع نصف حبة ليمون
في طنجة نقلي قطع دجاج مع بصل مقطع رقيق و نقليهم مليح مع التحريك حتى يذبال البصل و يتقلى الدجاج ثم نضيف جزر مقطع دوائع و 2سنينات ثوم و التوابل فلفل أسود كركم و وريقات رند و شوية نعناع يابس بنتو تعجبني في الطبخ و خاصة في الحريرة و لمرقة البيضاء و نضيف الزيتون ومرات نقطعوا دوائع نمرق بماء سخون و نخليهوم يطيبو حتى تعقد المرقة و في هذه الأثناء نقلي البطاطا مقطعة دوائع و نزين بها طاجين الزيتون و شهية طيبة

[Omrihem]

موضوع جد شيق يعطيك الصحة حبيبتي الغالية علي هاذ الموضوع الذي اذا حفظ بقي للاجيال الفايس البوك كمرجع ههههه وحتي لينا حنا نتعلموا من بعضانا بارك الله في الجميع ليا رجعة مع الوصفات باذن الله

[عازفة الناي]

عجبني الموضوع فحبيت نشارك وان شاء الله نفيدكم و نستفيد منكم
طاجين الحلو :بطريقتي
فالطنجرة ومذابينا طنجرة تاع فخار يطيب فخاطره و يتعسل يجي يهبل
نذوب 2 ملاعق زبدة و نزيد اللحم قطع صغيرة و نقليه و بعدها نحط ورقة رند و عود قرفة و زعفران شعرة و شوي كركم و نزيد شوي ماء زهر و نغطي حتى يبدا يدخل للحم الطايب
* نكون نقعت الزبيب فماء او ماء زهر نضيفه للحم و نضيف العين بقرة و نمرق بماء الزهر و كمية قليلة من الماء ~~التمراق حتى يتغطى الزبيب و عين بقرة ~~ ونخليهم 10د و نضيف تقريبا كاس سكر و شوي و نرشة ملح ونزيد المشماش اذا متواجد ونخليهم على نار هاااادئة حتى يطيبو و يتعسلو
هنا زدت شرائح من التفاح يجي بنين تاني

وهذا لونه وشكله بعد ما يطيب

[رحمة2016]

المشاركة الأصلية كتبت بواسطة آسيا 27

عندنا في الغرب كاين زوج انواع تاع التشيشة المرمز لونها يميل للأصفر و العادية اللي يكون لونها ابيض وكل وحدة تختلف على الاخرى في طريقة التحضير يعني المرمز الشعير يكون اخضر ما زال ما يبس كي يخدموه تشيشة مي ما يشبهش الفريك على خاطر يطيبوه و كاين بزاف مراحل في التحضير انا ما نعرفهاش صراحة و النوع الثاني يخلو السنابل تاع الشعير حتى تيبس و يخدموه
شوفي هاذي مرمز
[img][/img]
و هاذي البيضا العادية
[img][/img]
و هنا صورتهم مع بعض باه تشوفو الفرق في اللون و كاين فرق كبيييير ثاني في البنة
[img][/img]
موستا العفو منك اختي جاوبت في بلاصتك

السلام عليكم يا الحراير حبيت برك نوضح الفرق بين المرمز ودشيشة الشعير
حنا المرمز هو الشعير كي يكون اخضر يفوروه تفويرة ويديروه ييبس ومن بعد يقلوه في طاجين الطين ويرحوه يجي بنتو خيالية في الشربة و دشيشة الشعير هي تاني نعيطولها المرمز نشروها من برا واجدة وهي شعير لكن يابس نورمال ومرحي يعني حنا المرمز نشروه عند النسا هاداك اللي يجي بنين وكاين العطارين اللي يبيعوه

[جنة الفردوسْ]

سلام اختي زينب الف شكر ليك على مجهوداتك وربي يجازيك...... الصراحة انا اكبر مبتدئة في المجموعة ههههههه واني تعلمت الشربة غير العام اللي فات هههه الله غالب الدلال والتفنيين واسمحيلي اذا ماهيش في المستوى
المقادير تاع الشربة حقيقة مانديرش بزاف لاني غير انا وبابا ماما
حبةبصلة متوسطة+حبة طماطم متوسطة+2حبات ثوم +قرن فلفل حار+لحم او دجاج+نعناع+فلفل كحل+كسبر+راس الحانوت+2 مغارف كبار طماطم مصبرة+ملح+2مغارف زيت(تقدري ديري زيت زتون او تقدري ديري مغرف زيت ومغرف زبدة)
التحضير
نجيب الكوكوط ندير 2 مغارف زيت ونحط الللحم والبصلة المرابية والثوم ونرش عليهم الملح والتوابل نخليهم يتقلاو مليح وامباعد نزيد طماطم المرابية ونذر عليهم شوي نعناع وندير مغرف طماطم مصبرة ونزيد عليهم شوي ماء ونخليهم وامباعد نزيد قرن حار وفي الاخير نزيد كمية تاع الماء ونغلق عليهم الكوكوت ونخليها مدة من الزمن وفي الاخير كي نفتح عليها نزيد فيها مغرف طماطم (هنا اختيارية) كاين اللي يحبها حمرا بزاف
وامباعد نحطها في الصحن ونجيب دبشة نقصها ونذرها فوق الصحن
هاذي شربة المبتدئة هههه اما الحريرة نسمع بيها مي جامي طيبتها وفارميسال هذا اول مرة نسمع بيه ههههههه
دمتم في امان الله ورعايته

[جنة الفردوسْ]

طاجين الزيتون (قيس ثلاث عباد)
حبة بصلة متوسطة+2حبات ثوم +دجاج+توابل(راس الحانوت +كسبر+فلفل اسود)+شويو نعناع+زيتون خضر +ملح+2مغارف كبار دويدة مش معمري
الكفتة: نصف رطل فيانداشي+فلفل اسود+دبشة+ شوية فريك +2حبات ثوم +ملح+مغرف كبيرة فريك رقيق مش معمرة
التحضير
اولا قبل كل شيئ لازم الزيتون خضر نطيبوه في الماء مغلي شوي حتى تنقصو منو المرارة والملوحية واحد 5دقائق
الان نجيبو كوكوط ندير فيها 2مغارف كبار زيت+بصلة مرابية +ثوم+دجاج والتوابل+ملح ونزيد النعناع ونقلي مليح... نزيد شوي ماء تزيد تمرق مليح وامباعد نزيد الزيتون الاخضر ونزيد الماء الدافي ونغلق الكوكوط وامباعد كي يبقالها 10 دقائق باه طيب نفتحها ونزيدلها 2 مغارف كبار دويدة مش معمرين ونخليها هكاك مانغلقش عليها خلاص واحد 10 او 15 دقيقة وخلاص نطفي النار
في هذه الاثناء نوجد الكفتة تاعي نجيب اللحم تاعي نتبلو مليح نديرلو الملح والثوم والدبشة مقسوسة صغيرة ونلمو بمغرف فريك مش معمرة ويكون رقيق خلاص باه ماتحليش كي ندير دي بول..... ونحكم لكفتة نتاعي نديرها دويرات صغار ونقليهم ونخليهم يتقطرو من الزيت
وامباعد نحطهم في الصحن ووندير عليهم المرق ونرش عليه الدبشة وبالصحة والعافية

ماتضحكوش الله غالب اني نتعلم هك راني ندير وندير بالشويتح مازال مانعرفش ندير كي يكونو بزاف عباد هههه لانو عائلتنا راهي صغيرة خلاص

[حياة نور الدين]

طاجين الزيتون

في طنجرة نحط مغرف زبدة بصل مرابي سنة ثوم رند شوية ملح فلفل اسود قرفة وزعفران مع اطراف دجاج او لحم نخليه يتقلى حتى يتغير لون اللحم نمرق بكاس ماء ونخلي المكونات تطلق على بعضها كنت قطعت الجزر دوائر بعد ما نظفته كي يغلي المرق نمرق ونضيف الجزر والزيتون اللي نكون مبيبتاتوا في الماء والقارص
نقلي البطاطا الشكل اللي حبينا ونقدمها معاه ومنرات ندير فطر ادا كان عندي ونخلي المرق يخثر


طاجين الحلو

نحط في طنجرة زبدة وعود قرفة وقطع لحم ونخليه يتقلى بعدها نمرق ونخلي اللحم يطيب بعد ما يطيب اللحم ندير الزبيب المنفخ في الماء زهر والبرقوق والمشمش المنفخهين في الماء زهر نحطهم في الطاجين ونزيد كيلة سكر وشوية من اكستخي تاع ماء زهر ونخليه يعقد والفواكه الجافة تطيب