هل يوجد أحد متزوج

[مشكلتي]

السلام عليكم و رحمة الله تعالى و بركاته
حبيت نعرف اذا كاش واحد راه متزوج مثل زواج أخي
الحقيقة أنا قلبي درني بزااف لأنه أخي عمره 32 سنة متزوج منذ عامين و نصف مازال ربي ما رزقهش أولاد و لكن ليس هنا المشكل
زوجته عاملة و عمرها 31 سنة ما تعرف دير والو و لا مرة دخلت الكوزينة طيبت جاااامي حتى قهوة الصباح أحيانا هو يبكر و يطيبها
الفطور و العشاء أنا أو أمي نطيبو حتى نطبطبو عليها حتى تجي تأكل
مثل ضيفة عندنا
بالرغم أخي يسكن معانا و لكن و الله مقادرينها و لا مرة قلنالها كلمة حتى أننا ندلقولها من أجل أخي الوحيد نخافو الا سمعت كلمة 99% يخرج من الدار بحكم لديها مسكنها الخاص قريب لدارهم
الله يخليكم قولولي بصراحة كاين راجل متزوج مرته ما طيبلهش تماما ؟؟
أرجو أن تدعو لأخي الله يجازيكم
في أمان الله

[أمل94]

وانتوم علاه راكم اطيبولها ها خلوها تطيب وحدها ولا تشري ولا تديرحل لروحها؟ماشي متعرفش تطيب هذي لقات الرخا ملقاتش لي يزيرها وي انشاله رب يهديها ويهدي الاخ تاعك ويرزقه اولاد وانشاله رب يرزقك ويعطيك الصحة اختي

[Golden Princess]

الله يهديها و يصلح احوالكم و يرزقكم على قد نيتكم ان شاء الله

[بلقيس88]

الله يكون في عون أخوك أولا مارهيش صغيرة حتى ما تدخل للكوزينة الله يبارك راهي كبيرة هذه باينة ما بغياش تولفكم طيب و توريكم حنة يديها نعرف بنات بزاف كيما هكذا
الله يهديها و يرزقها النية لدارها

[النجمة القطبية]

مشكيتش متعرفش اطيب لكن مش حابة لاسباب خاصة بها والله اعلم
كاين بزاف ناس هكا لما تخرج تتفاجئي بيها تولى تحط العجب من يديها بالشطارة
لكن اخوك هل اشتكى
شفتيه مراهوش مهنى
ادا هو عاجبو الحال انتى علاه يدرك قلبك
عموما الله يهديها ويطيب العشرة بينكم

[AMINA.Z]

المشكل كان في بداية الزواج
مادام جات راهي ولات وحدة منكم .. ميما تخدمو تخدم و تتعاونو في الشغل.
امك هي اللي تقدر تتدخل
و تهدر مع ولدها ...و تقولو يا يهدر معاها يا هي تهدر معاها
و واش هاذي حكاية تهدرو معاها يخرج من الدار !!!!!!!!!!
هو الراجل و الا هي !!!!!!!!!!!!
تبانلي خوكم دللتوه بزاف ....و ما يقدرش يفرض روحو ..باه تخافو تديه لدارها !!!!!

[AMINA.Z]

المشكل كان في بداية الزواج
مادام جات راهي ولات وحدة منكم .. كبما تخدمو تخدم و تتعاونو في الشغل.
امك هي اللي تقدر تتدخل
و تهدر مع ولدها ...و تقولو يا يهدر معاها يا هي تهدر معاها
و واش هاذي حكاية تهدرو معاها يخرج من الدار !!!!!!!!!!
هو الراجل و الا هي !!!!!!!!!!!!
تبانلي خوكم دللتوه بزاف ....و ما يقدرش يفرض روحو ..باه تخافو تديه لدارها !!!!!

[محمد جديدي التبسي]

أظن أن كل شيء أصبح متوقعا في مجتمعنا للأسف!
حقيقة لم اسمع بهذا من قبل امرأة متزوجة اكثر من عامين لا تطبخ ولا مرة!!!
اظن انك تبالغين خاصة وانك لم تذكري موقف أخوك من الأمر لأنه مستحيل يسكت المفروض!
ربي يرزقهم الذرية الصالحة ويهدي هذه الزوجة.

[أريج الهدى]

السلام عليكم أختي انتي متكسريش راسك المهم راكي طايعة لميمة ومتزعفيهاش زيد راكي تطيبي علاجال أمك يجي النهار وتحشم عى روحك صحت الوالدة هي الفايدة هي كلات ولا لا ميهمش ومش من حقكم تبقاو ساكتين لازم تفهمو خوك يكلمها أنت ثاني مراكيش خدامة ليها أتهلاي في الوالدة

[أم سلوى]

متغطيوش الشمس بالغربالجيا اعضاء الجلفة كونوا واقعيين قالتلكم حتى قهوة الصباح..متديرهاش....اضن انكم خايفين تروح من عندكم..في ستين داهية....هي دارتلكم...عفسة باش تبدا..الزعاف وانتم قاعدين..في اوامرها...اضن انكم بالغتم في الدلال..
نعم عندك الحق تهدري...عندك الحق تقولي نوضي للكوزينة لوكان جات مسالة ورث البيت لاخذت نصيب منه...انت بالذات لا نفعلي شيئ....ولماذا تقومين على راحتها سبحان الله خدامة عليها..؟؟؟؟
للعلم انا ايضا لدي اخت مثل..عروستكم ولكن هي تعمل ولديها توأم بنات في خمس شهور...تتعب كثيرا لكن لا يشفع لها مساعدة عجوزتها...مرة مرة تقوللها نوضي...لكن تتثاقل اختى كثيرا من التعب...
وانا لا ادافع عن تختى ايضا..

[زبدة ذايبة]

كل السبب ماحطيتوش الحدود تاع الدار والقوانين

خليتو الأمور سايبة علابيها راهي دير هكذا معاكم

في الفنادق وماتلقهاش عروستكم خدمات 5 نجوم

ولوكان ماتنفضوش الغبار عليكم راح تبقاو تخدمو فيها للمات

عرفت ناس من هذا النوع وكلما مر الزمن بيهم كلما تعقدت الأمور وماقدروش يتخلصو من المشكل

على الأقل تخدم نفسها وزوجها

غدوة تسعى الولاد وجدو رواحتيكم للخدمة تاع الصغير في الليل والنهار

إذا ماعاودتوش رتبتو بيتكم راحت عليكم

ماشي كامل بنات الناس اللي يتزوجو بنات أصل تاع الصح

كاين اللي تعرف واجبتها ودورها بلاما يقولولها وكاين نوع ثاني حتى تنغزيه!!!!!!!!!!!!!!!!

وخوك مسؤول على هذا بالطبع

راه راضيه الحال تزوج باش يطيب قهوتو وحدو. علاه تزوج بلونجة بنت السلطان ماطيب ماتنقي دارها

وزيد على هذا كامل راكم خايفين تديلكم خوكم بالتالي هي عرفت نقطة الضعف عندكم وراهي تستغلها ضدكم وضد خوك

ا لأمور باتت واضحة والحل في يديكم

يا إما تغيرو من تصرفاتكم وتتغير العروسة معاكم يا إما تبقاو هكذا ومايوجعك قلبك ماوالو

تقبلو الوضع وعيشو بهذ الطريقة وخلاص

[مواطنة]

اختي الكريمة الله يعلم واش مور راسها لكن نقولك و يمكن علابالك لازم عليها تخدم راجلها و مشي كل القاطنين لكن تساعد في لي تقدر من الاشياء لي يستفادو منها و لوكان اي واحد يتدخل يقدر يصرى مشكل او اخوك يفطن ويصير مشكل
ممكن تقولولها ساعدينا من فضلك و تشوفو ردة الفعل لكن دون نرفزة حتى لو قالت لا و حاولو تسافرو تخلوها وحدها يمكن تخدم و يوالف خوك مكلتها لانو يمكن هو يقولها ما طيبيش
يا اختي احيانا الزوج يفرض على مرتو او يتفاهمو على هدي النقاط من الاول

[اياد حياتي]

ديرولها كوزينتها وحدها في نفس البيت اذا ما ناظتش والله غير مليحة كل واحد راهو يعاني اذا ماهيش من عجوز تجي من كنة كلشي العكش كاين عرايس يجبدو قلوبهم وميرحموهمش وهذه دايرة رجلها وعلاه واش تكون مرانيش نقولك باه تروحي تجري ليها سيو نهار خرجو وخلوهم وحدهم وشوفوها اذا ماناضتش هذه راهي تسنا اكيد انكم تنطقو باه يجي العيب منكم خلي الوالدة تاعك تهدر معاه بمعرفتها معاه الله يصلح احوال ظنيت للحظة انو خوك مراهوش يتكلم ممكن هو الي ميقرش يجيب ولاد والله اعلم الله يرزقهم

[oumhana]

صباح الخير هذي باينه غير نتي مشفتيهاش المخلوقة عندها دارها معنتها راهي تديرهكذا باش نهار تقولوكلمه تهز روحا وجيبها في دارها c'est tout قالوناس زمان" وريلي بيتي نوريلك نيبي "ربي يهدي ما خلق .

[غزلانْ]

أمثال أخيك كثر
و سبب ما يقومون به من
أعمال هو
الزوجة عاملة
و بالنسبة لك الأفضل لا تتدخلي
و ان تدخلت أمك يكون تدخلها مبني
على مكانتها عند ابنها و ان كان
من من تتحكم فيه امرأته
فهنا لا كلام أو غيره
ينفع فكله يدهب سدى

و لمادا يتزوج ليجد من تخدمه
لا ليخدموه و زوجته

الله يهديها و يهدي أخوك و يقويك و الوالدة