أريد رأيكم بارك الله فيكم...

[zizodev]

مقبل على الزواج والحمد لله مشكلتي هي عملي فانا اعمل بشركة بترولية أجنبية و عملي 4*4 في الجنوب (الصحراء) "أي 4 أسابيع في العمل و 4 أسابيع في عطلة" تزداد قليلا أو تنقص بمعنى مرات نقعد 5 أسابيع في العمل كيما مراات نقعد 5 أسابيع في الدار أو ممكن حتى 3 أسابيع في الداار..

الحمد لله الراتب جيد و يتمناه كل شاب "اللهم أرزق كل شباب المسلمين العمل القار الذي يفرحهم" أأأميين.
لقاتلي ختي وحدة تقرا معاها في كلية الطب بقالها عامين وتكمل , فتاة متخلقة و عاقلة و دارهم كامل قاريين و كلهم بشاهادات دكتوراه او في طريقهم لنيلها و أبوها دكتور في الجامعة"تبارك الله عليهم".
المهم بعد ماشفتها و شافتني إرتحت لها و إرتاحت لي , خبرت يماها " تقبلو الموضوع", لكن بعد إخبار والدهم لم يقبل بحجة أن العمل 4*4 و بعيد عن المنزل.

سِؤالي " هل معه حق..هل غيابي عن المنزل 4 أسابيع يجعله يرفض بدون أن يلتقي بي أو يسأل عني و عن أخلاقي و يضيع على بنتو فرصة تتمناها كل فتاة"

وهل أذهب لمنزلهم و ألتقي به و أعيد المحاولة..أم أقبل بقضاء الله وقدره, وتكون هذه المرة الثانية اللي اتقدم لفتاة و يتم الرفض من ولي امرهم بسبب العمل.

[nihal159]

هذا ليس سبب وجيه للرفض؛ نعرف نبس بزاف في نفس حالتك ومتزوجين عادي؛ أنا نظن؛ أنه من الأفضل لو تتكلم أنت مع باباها؛ توضحلو إيجابيات العمل إنتاعك؛ والمستوى لي قادرة تعيش فيه بنتو.
أنا حاسة بلي ماهوش جوابهم النهائي؛ يعني الرفض ماهوش حاسم؛ زيد حاول وربي معاك.

[طيور الجنان]

في رأيي روح كلم باباها انت اللي تقدر تقنعو.انا نعرف واحد كيفك اخطب وحدة وباباها رفض في الاول ثم وافق لانه الخاطب كرالها قريب من دارهم و هكذا مابقاتش وحدها.ربي يوفقك ان شالله

[سحابة مسافرة]

في رايي انو الاب خاف على بنتو فقط و هذا من حقو .ممكن هو خاف يقولك يديها و من بعد نحصل فيها انا او يفرض عليها العيش مع اهلو و تكون مشاكل ...الخ
انت اذا حاب هاذ البنت روح ليه و تفاهمو و حاول تقنعو

[sarl02]

نعم يعتبر هذا سبب للرفض عند البعض سواء فتيات او عائلات ...سيبون الان ..لازم تجبد روحك واي محاولة اخرى منك تلقي بمكانتك الى الحضيض ...واعرف جيدا كيف تفكر مثل هاته الاسرة التي تقدمت اليها سواء البنت او محيطها من اب او اخوة.....يا اخي اذا اتمسكت بيك البنت هي تقنع اهلها وهي التي تسعى جاهدة لكي لا تضيعك...اما اذا مشات مع راي اباها وضربت النح ولم تهاتفك او ترسل لك اي تعقيب منها على الامر فهنا لازم تنسحب نهائيا وتشوف جهة اخرى وربي اعوضك خير .

[zizodev]

المشاركة الأصلية كتبت بواسطة nihal159

هذا ليس سبب وجيه للرفض؛ نعرف نبس بزاف في نفس حالتك ومتزوجين عادي؛ أنا نظن؛ أنه من الأفضل لو تتكلم أنت مع باباها؛ توضحلو إيجابيات العمل إنتاعك؛ والمستوى لي قادرة تعيش فيه بنتو.
أنا حاسة بلي ماهوش جوابهم النهائي؛ يعني الرفض ماهوش حاسم؛ زيد حاول وربي معاك.

شـــــــكراا أختي الفاضلة على الرد, هذا ما فكرت به و هذا ما سأفعله سأذهب و أتكلم مع باباها و بعدها الخير فيما إختار الله

[zizodev]

المشاركة الأصلية كتبت بواسطة طيور الجنان

في رأيي روح كلم باباها انت اللي تقدر تقنعو.انا نعرف واحد كيفك اخطب وحدة وباباها رفض في الاول ثم وافق لانه الخاطب كرالها قريب من دارهم و هكذا مابقاتش وحدها.ربي يوفقك انشالله

شـــراا على الرد أختي "طيور الجنان", خممتلها مستحيل تقعد مع عائلتي لأنها رايحة تحس بلي خدامة عندهم و تبدا المشاكل..الحل هو كراء بيت بالقرب من عائلتها هذا ما فكرت به و هذا ما يناسب الاشخاص اللي عملهم بعيد عن المنزل..

[zizodev]

المشاركة الأصلية كتبت بواسطة سحابة مسافرة

في رايي انو الاب خاف على بنتو فقط و هذا من حقو .ممكن هو خاف يقولك يديها و من بعد نحصل فيها انا او يفرض عليها العيش مع اهلو و تكون مشاكل ...الخ
انت اذا حاب هاذ البنت روح ليه و تفاهمو و حاول تقنعو

نعم هذا ا سأقوم به إن شاء الله...شكرااا على المشاركة.

[zizodev]

المشاركة الأصلية كتبت بواسطة نورسين.داية

الرفض لأجل هذه المدة كان من المفروض تثيره الفتاة و ليس والدها .....غريب أمره الصراحة .......

أخي محيطي تقريبا يعكلون بهده الطريقة صحيح ماديا تعيش la belle vie لكن نفسيا تتعب خصوصا المراة حتى لو كنت مهندس يطالك نفس القانون

في واقعي يتزوجونهم لكن من بعد تحدث عدة مشاكل من بينها و أهمها الخيانة الزوجية من الطرفين ......وفقك الله أخي

والله أمر مرير..راجلها يتعب و يجاهد و يوفرلها كل شيئ و مبعد تخون..والله لأمر يندى له الجبين.

[zizodev]

المشاركة الأصلية كتبت بواسطة sarl02

نعم يعتبر هذا سبب للرفض عند البعض سواء فتيات او عائلات ...سيبون الان ..لازم تجبد روحك واي محاولة اخرى منك تلقي بمكانتك الى الحضيض ...واعرف جيدا كيف تفكر مثل هاته الاسرة التي تقدمت اليها سواء البنت او محيطها من اب او اخوة.....يا اخي اذا اتمسكت بيك البنت هي تقنع اهلها وهي التي تسعى جاهدة لكي لا تضيعك...اما اذا مشات مع راي اباها وضربت النح ولم تهاتفك او ترسل لك اي تعقيب منها على الامر فهنا لازم تنسحب نهائيا وتشوف جهة اخرى وربي اعوضك خير .

ياأخي البنت هذي شفتها مرة واحدة لاتوجد علاقة بيننا,لا هاتف ولا فيس بوك, أختي هي اللي شافتهالي, نعم هي مشاة مع رأي باباها و بعد ما ألحت عليها أختي عن سبب الرفض قالت لها نمط العمل وأنها ستكون الحياة صعبة. هي في البداية مكانتش تخمم هاك.

من جهة خممت بلي منرجعش وإن فعلت فقد ألقي بمكانتي إلى الحضيض كما قلت انت أيضا مي الفكرة أنو هو ماشافني متكلمنا مع بعض, و أنا أؤمن أن كل شخص في الحياة يستحق فرصة ثانية.

بوركت أخي.

[صمت الرجوله]

ماتحيرش صاحبي الكثير من العائلات مايقبلوش الزواج من هذا النوع و انا منهم لاني رفضت زواج اختي باعتباري المسؤول عليها من عامل في الصحراء لهذا السبب و الحمد لله زوجتها مؤخرا من عامل بسيط من نفس ولايتي.....يعني مع احترماتي ليك الدنيا ماهيش غير دراهم

[zizodev]

[quote=صمت الرجوله;3994518998]ماتحيرش صاحبي الكثير من العائلات مايقبلوش الزواج من هذا النوع و انا منهم لاني رفضت زواج اختي باعتباري المسؤول عليها من عامل في الصحراء لهذا السبب و الحمد لله زوجتها مؤخرا من عامل بسيط من نفس ولايتي.....يعني مع احترماتي ليك الدنيا ماهيش غير دراهم[/quote

بالطبع اخي الدنيا ماشي غير دراهم المهم راجل و يجيب قوت يومه و الاهم بن فاميليا و انا منيش رح نخوفهم هم لاباس عليهم و الدنيا مكاتيب قبل كل شيئ.

[sarl02]

المشاركة الأصلية كتبت بواسطة zizodev

ياأخي البنت هذي شفتها مرة واحدة لاتوجد علاقة بيننا,لا هاتف ولا فيس بوك, أختي هي اللي شافتهالي, نعم هي مشاة مع رأي باباها و بعد ما ألحت عليها أختي عن سبب الرفض قالت لها نمط العمل وأنها ستكون الحياة صعبة. هي في البداية مكانتش تخمم هاك.

من جهة خممت بلي منرجعش وإن فعلت فقد ألقي بمكانتي إلى الحضيض كما قلت انت أيضا مي الفكرة أنو هو ماشافني متكلمنا مع بعض, و أنا أؤمن أن كل شخص في الحياة يستحق فرصة ثانية.

بوركت أخي.

ايه خلاص مالا راك عرفت واش كاين علاه راك حاب اتانسيستي فالباطل؟؟...وديجا كي مانبا ماشافكش باباها ورفضك في حد ذاتها اهانة من بعيد...المهم انت قدمت عرض فالحلال وتم رفض العرض اغلق الموضوع واحفظ كرامتك وربي اسهلك من جهة ثانية

[RB59711]

سبب الرفض انا اراه وجيه راهي صعيبة باه تتزوج حتى بالنسبة ليك نفسيا في الوضع هذا وخاصة ادا راك معول تخدم مدة طويلة في هذا المجال الكثير من أصدقائي رفضوا لهذا السبب . ادا راك غير تكون في نفسك بهاد الخدمة معليش وما شكيتش كان رايحين يرفضوا اذا فهمتهم أما اذا كانت الخدمة لمدة طويلة ماهيش مليحة لا ليك ولا ليها .ومع ذلك لواحد مش عارف الخير وين راه وكيما كاين لي يرفض كاين لي يقبل تاني .

[عبد الله 22]

السلام عليكم سبب مقنع للرفض يعني تعيش معك على الأكثر 6 أشهر في السنة الزواج سكن واستقرار وأي امرأة تفكر بعقلانية ( ماعد من كان حلها الوحيد ) سيكون الرفض هو القرار السليم الزواج مسؤولية دائمة من الرجل في كل يوم وليس مهمة الوحيدة جلب الأموال وكما تقول قصة لشخص يعمل مثلك أنه في احد الأيام عندما دق باب بيتها قالت بنته الصغيرة لأمها انه قد اتى الرجل الذي يجلب لنا المال