مشكلتي

[مشكلتي]

السلام عليكم و رحمة الله تعالى و بركاته

اخوتي راني في مشكل و راني حاب كل واحد فيكم يعاوني براي او نصيحة و يكون صريح

انا طالب جامعي نقرا سنة اولى اقتصاد .. مشكلتي بدات من عامي اللول نتع الباك اولا انا كنت من المتفوقين و الجميع كان يتوقع لي بمستقبل زاهر و بلي راح نولي حاجة و لكن
المشكل بدا من عامي اللول نتع الباك معجبونيش الاساتذة و التلاميذ و انا كنت مركز مع بعض الامور في النت لهذا نسيت بزاف قرايتي و محطيتش مليح و النتيجة كانت اني مجبتش الباك للاسف .. قلت معليش و عاودتو في العام الثاني قريت بزاف و سهرت و جريت و للاسف مجبتوش ايضا هنا دخلت في حالة نفسية و تعب نفسي و حالة كابة و ياس و كرهت حياتي خصوصا انو صحابي ولاو قع دوزيام و كان اللي حكمو بلايصهم و انا اللي كنت نقرا و الناس تشهد حسيت روحي فشلت المهم مرضت و احيانان كنت وحدي وحدي نتقلق و يحكموني نوبات عصبية يسخيبوني مرضت درولي رقية و رحت للطبيب و قالولهم بلي حالة نفسية برك المهم في الصيف كنت نروح لطبيب نفساني و الحمد لله
المهم في عامي الثالث حسيت روحي كبرت في راسي بزاف و تفكيري وليت اكثر جدية و كي شغل نضجت ممكن بسبب اللي فات عليا .. في عامي الثالث كانت نفسيتي محطمة الحاجة اللي شوي ساعدتني انو دخلت في علاقة مع طفلة كانت تقرا معايا من سنة اولى ثانوي و جوزت الباك معايا عامنا اللول و هي جابتو و بقات جي لليسي مرة على مرة في هاد العام و انا كي كنت هكداك هي بزاف كانت مقلقة في هاديك الفترة و اكتر وحدة بالاك ساندتني و كانت تتواصل معايا و تسقسي عليا و جي ليا كي تجاوزت هاديك الفترة و قررت نعاود الباك و ريحت شوي ولينا نحكو بزاف و تقربنا و بالشوي بالشوي صارحتني بلي كانت تحبني من النهار اللول اللي قرينا فيه و حكاتلي على حوايج بزاف بزاف دارتم في حالي و في الحقيقة انا تاني كنت نحبها مي مقتلها والو بويسك كانت عندها هيبة و كانت اكتر وحدة محترمينها في الكلاصة و صح بنت فاميليا و قاتلي انا حبيتك نتا و انا راني نقلك بوسك نتا مختلف نعرفك كيفاش تخمم و فاهمة شخصيتك مليح
هاد الطفلة و هاد العلاقة عطاتني واحد الثقة جامي كنت راح نتحصل عليها و جبت الباك بسبتها و تسقمت بزاف حالتي
المشكل انو ظرك وجود هاد الطفلة في حياتي حسسني بالمسؤولية انا هاد الطفلة و ربي شاهد راني ناويها و دارنا قع يعرفوها و يما علابالها و كل شي قدام ربي و عبادو و جامي درنا حاجة تغضب ربي اولا لانو نحبها ثانيا لانو عندها هيبة و شخصية تفرض عليا احترامها مالقري تعشقني
المشكل بديت نحس روحي فاشل بديت نحس روحي ماكان والو 22 سنة نقرا في تخصص مافيهش مستقبل راني نشوف في مستقبلي مجهول و تاني صحابي قع حكمو بلايص و دخلو و قراو تحصصات مضمونة و انا اللي كنت الاول زعما ما درت والو .. كي تحتمت عليا كنت راح ندخل في واحد الثكنة نتع عسكر علما انو انا منيش مفتنع بهاد المجال و علابالي ميزية و مافيهش حيات كي جيت داخل هاد الطفلة سمعت زعفت و طارتلها قاتلي هادي ماهيش حيات قع حتى و ادا مكملتش حياتك معايا نتا مش راح تعيش حياتك تبدا جي مرة في العام ولادك و متعقلش عليهم خممت لقيتها صح و تقلقت قطعت الاستدعاء معرفتش واش ندير راني نخمم نعاود الباك و ندير مدرسة عليا بصح خايف منجيبوش و بزاف نبدا من 0 في هاد السن و ساعات نقول نكمل قرايت و خلاص .. ة هاد الطفلة بداو يخطبو فيها و هي قاتلي مستحيل نقبل بواحداخر و علابالي صح و نعرفها مليح مليح و المشكل انو هاد الطفلة راها استاذة و راني خايف مع الوقت و مع الدنيا تكون كاينة حساسية علما انو علاقتنا مش اللي تاثر عليها هاكا امور مي منعرف هادي الدنيا
انا ظرك فقدت الثقة في روحي منيش عارف واش ندير منيش حاس روحي قد المسؤولية منيش قادر نكون كيما راها حابة و نوفرلها الحياة اللي حابتها ليا و ليها و قبل هذا انا راني حاس روحي منيش قادر نوفر لروحي واش كنت حاب و المستقبل اللي كنت حابو .. بديت نفقد الثقة في روحي و نحس روحي والو ...

[baalache]

يستحيل ان تفشل مثل فشلي صديقي فقدت تقريبا كل شيئ لكن استطعت العودة من بعيد وحققت تقريبا كل شيئ بغيت نقولك صديقي ماتحطش السلاح وباش ما تحطش السلاح يلزمك شخصية قوية صديقي ارادة من حديد لا يصدا بالتوفيق

[Zahra 30]

ربي معاك خويا ربي يسقم الحال

[jissi]

انصحك بشيئين دير تكوين واحكم ميتي في يدك وجوز البيرميان الي يخدموا عليك
تجربة خوتي

[exellance]

اذا كانت عندك ارآدة عاود الباك احسن اذا رآك حاب دير استاذ وتبني مستقبل جيد ومتقولش نزيد نضيع عمري ونقرا تخصص آخر ... دير العكس اعتبر الماضي هو لضاع من عمرك وابدأ من جديد لكن الشرط الاساسي انك ترجع ثقتك بنفسك ..مش نتا اول انسان ولا آخر انسان تعاكسو الظروف هذي هيا الحياة للاسف

[الجيلالي 1971]

السلام عليكم
لماذا هذا التشاؤم أخي تحلى بقليل من الصبر
وتوكا على الله ....فليس اخفاقك في نيل شهادة البكالوريا دليل على ضعفك
كرر الإعادة مرة أخرى وسيكون النجاح منم نصيبك ان شاء الله

[طيور الجنان]

اخي الارادة هي كل شيء تحلى بها و انشالله ربي يوفقك عاود الباك و ماتخليش قرايتك الاولى.

[kika85]

بلحق خويا غير في خاطر هاد البنت الي وقفت معاك لازم دير ثقة في روحك وتجتهد خاطر هي ادا شافتك هكدا ضعيف ومتشائم رايحة تكره منك اي واحدة فينا تحب الراجل يكون قوي مشي اي مشكلة صغيرة تهزو وتفشلو بالعكس الدنيا هادي طيحات ونوضات والعيب على الي يطيح وما ينوضش...تقدر خويا تحوس كاش خدمة تخدمها بالموازات مع دراستك علاش لالا بصح لازم تكون ارادتك من حديد...بالتوفيق وربي يكمللكم في الخير..

[karimo.karimo]

rah kolech belmaktoub

[rose de sable s]

ياخي لا تياس الله معك توكل عليه
لا تدري ما سيحدث في مستقبل ممكن كي تتخرج تتوظف
كاين بزاف لي مقروش و راهم اغنياء
لا تقارن نفسك مع احد ممكن انت كن قريت و ربحت باك متعرفتش علي صديقتك هذه
يعني مشكل باك و كي عاودت خلتك تتعرف عليها و تكون مع بعض يعني مشكل اصبح نعمة
حاول تكمل قرايتك و تعود باك وكي تتخرج اخدم اي شئ مهم ان تعمل و تتقدم للفتاه

[* حبّ الله *]

حاول انك تعاود الباك ما دام رأسك مازال سخون ...يعني ما زلت هاز الدروس انتاع ال3 ثانوي ..استغل هاذ الفرصة لأنو من الصعب جدا انك تعاود الباك بعد سنوات ....و العمر عمرو ما كان مقياس للعلم ... و الدروس تفرج ع اليوتيوب دروس الاستاذ نور الدين رياضيات و الاستاذ مولاي عمار و اساتذة موقع الدراسة و ذرك تشوف كيفاه رايح تجيب 14 كي والو ...هذا فقط ما انت بحاجة اليه ...ماشي 17 فقط 14 و بي يوفق خويا