حالة نفسية

[مشكلتي]

السلام عليكم
مشكلتي بالاك تبان لبعض الناس مشكلة تافهة و ما عندها حتى معنى لكن بالنسبة لي نعتبرها مشكلة كبيرة على خاطر آلامها نفسية حادة جدا .
أنا أخت متزوجة أحب زوجي حبا غير طبيعي لدرجة أني نخاف عليه من الريح إذا يقيسو صدقوني إخوتي أنو إذا تأخر برك شوية على موعد دخوله للبيت نرجع في حالة خوف و هلع ما يعلم بيها غير ربي و يبداوني الوساوس و نبدا نتخيل غير في الأشياء السيئة أسوء مما تتوقعون .
و اليوم قالي حب يروح مع زملاؤو في العمل للبحر و ملي قالي و انا شادة قلبي و خايفة و الوسواس قتلني قلت لوكان يكون البحر هايج مع هو يحب يبعد كيفاش يصرالو .
وهذا بلا ما نحكي على الإحساس الفضيع لي يشدني كي يكون زعفان علي صدقوني نحس الموت قريب تلحقني و ما نقدر لا ناكل و لا نرقد و لا نخدم شغلي حتى نشوفو ضحك و رضى باش ترجعلي الروح
تعرفو خلاص عييت من هذي الأحاسيس و الوساوس لي رايحة تهبلني و رجعت نفكر و نقول لوكان بعيد الشر تصرالو حاجة ماشي مليحة لا قدر الله و نفقدو كيفاش رايحة تكون حياتي من بعدو و نرجع غير ندعي في صلاتي و نقول يارب توفاني قبل منو
و الشي المؤسف أني نعتمد عليه في كلشي ما نعرف ندير والو بلا بيه خارج البيت لوكان نخرج وحدي نضيع و حتى داخل البيت زعمة كي نعرض ضياف بزاف نرجع نبكي ما نقدرلهمش و يغلبني الحال حتى يعاوني هو و يزيد ديما ينصحني كيفاش ندير قدام الضياف يقولي ما تبدايش غير تجري حتى يقولوا ماشي قادرة على شقاها لازم تكملي كلشي قبل الوقت و تقعدي معاهم شوية باش تباني شاطرة .
المهم مشكلتي راهي نفسية و لو اني ما عرفتش نعبر عليها مليح مي خوفي هلى زوجي رجعلي مرض ووسواس رايحة نهبل .

[roza montero]

اختي هذا شعور مليح كي تخافي على زوجك وتخممي فيه احسن من النسا لي مهملين ازواجهم حياو ولا ماتو خرجو ولا رجعو بصح خصك شوية كوراج وثقة جربي كي يخرج ولا كي تخافي عليه قولي راهو في حماية ربي ادعيلو في صلاتك وقبل ما يخرج حصنيه بصح في قلبك ديري الثقة ف ربي
اما قضية تعتمدي عليه معليش برا متقدريش تتحركي وحدك معليش المراة بطبعها خوافة اما تع كي يجوك ضياف تحصلي وتولي تبكي دوري كي الدجاجةلالا متخليهش يولي معاك في شغل الدار يعاونك في حاجةولا زوج معليش بصح كل شي لالا جربي وجدي الدار والماكلة ليه كلي للضياف وشوفي روحك قادرة تقوميهم ولالا يعني لازم كل شي يكون ساجي قبل ما يوصل للدار على الاقل تتعودي على التجهيز قبل بوقت وعندو حق كي قالك متوليش تجري قدامهم كي يجو وجدي كل شي من قبل واقعدي معاهم بثقةهكا تباني مولات دار وشاطرة ربي يحفظلك زوجك من كل شر و يهدي بالك

[dark star]

اختي العزيزة .......تقربي من الله وتعلقي به ......زوجك دنيا فانية........الموت جاية جاية ...طولت ولا قصرت ......ومدام الامر تحصيل حاصل علاه تخافي يموت ....واذا مات فرب العباد حي لا يموت.......عيشي حياتك معاه عادي ومرحبا بالمكتوب........وقولي : لن يصيبنا الا ما كتب الله لنا لتطمئني .......وركزي على تعلم دينك والامور التي تفيدك في اخرتك ودنياك ..ولازم تعرفي بلي هذا الشيطان حاب يحزنك ويعذبك بهذه الافكار فادعي الله ان ينجيك من شره ..........ومشكلتك ساهلة خصك غير شوي عقل تستعمليه مع هذه الوساوس.......والنصيحة الاهم ...قوي ايمانك .....واقري عن الايمان بالقضاء والقدر.......ان شاء الله ينفعك.........والدعاء ثم الدعاء ثم الدعاء
رب يحفظك وينجيك من كيد الشيطان ويسعدك انت وزوجك

[ضباب لندن]

انصحك بزيارة اخصائي نفساني هذه المخاوف تبدو غير طبيعية

[الصديق قروف]

لو تعطيني رقم زوجك نوصيه عليك ههههههه
كيما قالو لازم تكوني راضيا واش قدرلنا ربي قوي ايمانك

[اسعى لرضى الله]

كي يخرج قولي اللهم اني استودعك زوجي فاحفظه لي وان شاء الله ميكون غير الخير اخطايكي من الوساوس هدو راهم من الشيطان باش ميخليكش تستمتعي بلحظاتك مع زوجك

حاولي تعيشي بلا خوف وعيشي كل لحظة مليحة وباذن الله ربي يحفظهولك ويطولو في عمرو وتجيبو لولاد وتكبارو مع بعض وتزوجو ولادكم وتشوفو حفادكم ربي مافيه غير الخير متقلقي روحك ماوالو ادعي ربي برك وانتي موقنة

وساعة ساعة صدقي هكا بنية يحفظلك ربي راجلك من كاش سوء لانو الصدقة مليحة وتفاءلي وربي يخليلك راجلك ويخليك ليه ماشاء الله راكي نعم الزوجة

[houssem zizou]

الحمد لله ربي يدومها

و إذا كنت تخافين على زوجك إلى هذا الحد فاعلمي أنه لن يصيبنا إلا ما كتب الله لنا خليها عند ربي و ما تخميش ياسر كما جاء في الحديث (و اعلم ان ما أصابك لم يكن ليخطأك و ما أخطأك لم يكن ليصيبك)

[doba]

ديري ربي في بالك اختي لعزيزة ةكلش بالمكتوب

[cherif1991]

السلام عليكم ورحمة الله وبركاته

[amira1989]

قو ايمانك خليها على ربي متجهليش

[doba]

يجيب ان يكون ايمانك بالله قوي

[رووعة]

وسعي خاطرك

[سر سعادتي..]

قل لن يصيبنا الا ما متب الله لنا.....اختي لازم تحاولي تستقلي عاطفيا يعني حاولي تتحكمي شوي في عواطفك مثلا مارسي هواية مفضلة عندك طالعي كتب اتعلمي حوايج جدد والزمي قراءة القرآن والاستغفار والأذكار...وهذا غير شيطان الله يلعنو يوسوسلك.... ربي يحميلك زوجك ويسخرو ليك ان شاء الله

[وصال سلام]

كل الردود كانت في المستوى وقالو كلش ونقولك هذا من الشيطان لانو يعدنا بالفقر والفحشاء او الباساء

انتي لهي روحك بقضية الدار اغسلي حيوط ديري ميناج اغسلي حوايج امسحي غبرة وماتخليش روحك فارغة شغل هذا فراااغ واذا كملتي هكا راح تنضري بزاااف واذا استدعى الامر استشيري طبيب نفسي يريحك راكي متعلقة بزوجك بدرجة جنونية ربي يبدلهولك بتعلقك برب العبااد ياااااااااااااااااااااااااااااااااااااااااارب

ربي يفرج عليك انا متفهمة وساوسك ومشاعرك وعواطفك اتجاهه لكن تحكمي فيها وماتخلهاش تغلبك ابدا

[AMINA.Z]

المشكل ماش في الحب و الخوف لكن في حدودو لانو قادر يتحول الى هوس

يا اختي الزوج شريك للحياة و ليس كل الحياة

المشكل انك ماش قادرة على شقاك
عندك زوج هاد ما يعنيش تعتمدي عليه في كلش
هاد النقطة اللي لازم تركزي عليها و تحاولي تغيريها

ربي يعينك