طلب نصيحة ثانية

[مشكلتي]

بسم الله الرحمن الرحيم
انا صاحب هذا الموضوع https://www.djelfa.info/vb/showthread.php?t=1773439
بخصوص البنت التي تدرس عندي التقيت بأبيها بالصدفة وهو قريب الينا كما نقولو من بعيد ولم افاتحه في الموضوع ولكن من حديثه تبين انه مهتم جدا لدراسة ابنته وهو انسان مقلق شوي ولم ارد مناقشته في الفكرة فما بعد حكيت الموضوع لواحد صاحبي مقرب اليا وطلبت اريه قال الي انه اذا تكلمت مع ابيها وبما انه مهتم لدراستها لربما رفضك مباشرة بدون اخذ مشورة البنت وقالي لي انه عن تجربة فاتحها في الموضوع بشكل مباشر ومادخل حتى واحد في النص وفي اطار محترم مع انها بنا فاملية اواعيها وتقدر تفهمني وقالي ان شاء الله تفهمك وتكون عاقلة ثم فيما بعد تحدث مع ابيها اذا التمست منها الموافقة وانا والله متردد كثيرا حاولت اليوم ان افاتحها في الموضوع في اخر الدرس في القسم اطلب منكم النصيحة وغدا انشاء الله اريد مفاتحة الموضوع وطرح الفكرة عليها مباشرة وسؤالها بشكل مباشر انا اريد ان اتي الي بيتكم وطلبك من ابيك
فما رايكم ياجماعة الخير خاصة من لديهم خبرة وكذلك انصحوني بطريقة مناسبة لسؤالها وطرح الفكرة عليها فهل مباشرة اقول لها تقبلين الزواج مني اما ماذا لا فكرة لدي

[ابتسام smile &hope]

خليها تجيب الباك لاتكن اناني
1-رايحة ترفضك وتكره المادة تاعك
2-تقبل وتولي تخمم فيك وبالاك الشيطان يوسوسلك وتولي تهدر معاها كل يوم بعد انتهاء الحصة
استنى شوية وزيد باباها لوكان يرفضك عندو الحق بقاو شهرين الباك وحاجة باينة يحب بنتو تتهلى في قرايتها (يعني ماتخافش يدوهالك)
3-تقدر تبعث يماك ليماها وتقوللها مور العيد نجو ليكم (باش تتهنى)

[محمد جديدي التبسي]

على حسب هذه الفتاة إن رأيتها فتاة رزينة وعاقلة يمكن أن تتقبل كلامك معها
وان كنت أنصحك بإدخال وسيط امرأة سواء أختك أو زميلتك في المؤسسة تكون موثوقة وواعية وزيد تنصحك أحسن منا والله الموفق
إن تعذر عليك ذلك ووجدت صعوبة أرسل والدتك لبيتهم تحكي مع والدتها بالتوفيق

[mounaminou]

lakan andha bac ...ghir ajjal kolech hetta wra lbac ...chkoun alli kadra tkhemmam f zwaj w khotba f période kimma hadi ...w madamha sghira mandonch rayha tetakhtab dorka ...ye3ni esbar w nta mettaman

salam

[رندة نهاد]

من رايي خليها تكمل قرايتها وتهتم بلباك اولا انت وش بيك؟ علاه مزروب هكا؟ اذا راها حابة تقرا راح ترفضك مباشرة انت موش عارف زعما وش معناه الباك وخاصة الي راح يجوزوه اول مرة انا مررت بالفترة وحسيت روحي معلقة بالباك من رايي خليها تنجح وتقدم رسمي لخطبتها هكا تبعد عليها لمشاكل وعلى روحك مازالو تلات اشهر خليها تكملهم برحمة ربي وادا هي من مكتوبك واحد ما يديها ماتخافش ان شاء الله ربي يجمع بينكما في الحلال

[سفير الأيام]

عن تجربة ما تشقيش نفسك وتوضع نفسك في حالة جد حرجة

[0ibtissam]

يا أخي زيد اصبر شويا حتى تعقب الباك ثم اخطبها درك غير ريح تشتت تفكيرها

[nesrinwarda]

أصبر حتى تجوز الباك، ثم روح أهدر مع باباها راجل لراجل، ماكاله تفرفش الطفلة و تحشمها

[سوسو95]

نعرف واحد جاز بنفس مشكلتك ولكن كانت نتائج غير مرغوب فيها انصحك بان تخبر ابيها انك تريدها ولكن لايخبر ابنته الا بعد الباك
ارجوا لك التوفيق

[كلنا راحلون]

المشاركة الأصلية كتبت بواسطة مشكلتي

بسم الله الرحمن الرحيم
من حديثه تبين انه مهتم جدا لدراسة ابنته وهو انسان مقلق شوي

اسمحلي مجرد راي حاب بنته تكمل دراسة وآخر حل استفسر من عمها خالها ادا كنت تعرفهم او من اقارك يكون يعرفو


وسمحلي قصتك عايشتها مع صديق لي صغير فسن



الله يسهل

[سيرين 5]

إذا كانت مكتوبك ما تخافش واحد ما يديهالك و إذا داوهالك لا قدر الله معنتها ماشي مكتوبك ؟؟؟
أصبر عليها تجوز الباك علاجال دوك تخربطلها مخها صدقني عن تجربة لما يبانلي خطاب نتقلق بزاف و نبقى نخمم و نطلع و نهبط .... ماشي مليح ليها ما تكونش أناني خليها تجوز الباك تاعها و بعدها أهدر مع باباها ماشي معاها ، علاجال لوكان تهدر معاها يدو عليك نظرة ماشي مليحة ، خاصة القصص لي رانا نسمعو فيهم عن الأساتذة لي عادو يتحرشو بالطالبات و النقاط لي عادت توزع عليهن إلا من رحم ربي....

[شمۋځ أنٹـے »]

انا تقريبا في عمرها لوكان استاذي يقولي راني حاب نخطبك تجيني الشوك مانزيدش نقرا (نبطل) اصبر عليها تجوز الباك منبعد ساهل الحال

[وجدان الخواطر~]

أنا طالبة بكالوريا و أعلم جيدا شعور الفتاة
أنا نقولك خليها تجوز الباك و نورمال روحلها حتى النهار لي كملوا فيه المهم ما تشوشلهاش مخها راهي جاية يامات صعيييبة

[بنت الرّحّل]

04 جمادى الثانية 1436 من الهجرة النبوية

وعليكم السلام ورحمة الله وبركاته
لست أدري لماذا هذا النوع من المشاكل يأخذ نصيبا أوفر هنا وهناك : ( هل أصارحها برغبتي بالزواج ) ( هل أتقدم لها عن طريق وليها وأخاف أن يرفضوني ..) و هل .. وهل ...
أي شيء هذا أيها الرجال؟ أي شيء هذا؟

لا أفهم هل يرضيكم أن تمسك أخواتكم وبناتكم ومن هن تحت ولايتكم في الطريق وتسأل هل تقبل أم لا ؟
كلا !
ليس الأمر كذلك أبدا بل هو نوع من الاستمالة

لست أفهم حقا ..هل هو قدح للكرامة أن تذهب لوالدها مباشرة وهو ( يدبر راسه معاها ) ...سواء كان الرد رفضا أو قبولا
مثل هذه التصرفات هي التي فتحت الأبواب - كلا بل كسرتها وخلعتها ولم تعد هناك أبواب أصلا -
هل تدرك ما كتبت أم لا : (لربما يرفضك مباشرة ..) إذًا أنت تذهب إليها وفرضا أنها قبلت بك
ألا يبقى الاحتمال الأول قائما ؟ لكن مع عواقب قد تكون وخيمة .. أنتم الرجال جميعا تعرفون أن النساء ضعيفات وقلوبهن سريعة الميلان .. ثم هل تعتقد أنها في سن يسمح لها بأخذ قرار مبدئي صحيح !!!


فعلام كل هذا ؟
اذهب إلى أبيها واسأله مباشرة واترك هذه الطرق الملتوية .. فحتى أنت متعب منها ..إن قبلوا بك فحمدا لله
إن لم يقبلوا فكل خير فيما اختاره الله لك !


أتمنى لك التوفيق

[lydiareve]

اتزوجها ماتسعش للبنات غيورات كامل