ماهي عادات كل منطقة في الجزائر بمناسبة عاشوراء

[riadh2008]

السلام عليكم
ماهي عادات وتقاليد كل منطقة في الجزائر بمناسبة مرور عاشوراء ؟
تحياتي

[سلاف26]

حنا في منطقة المدية نصومو يومين 9 و 10 من محرم و نقولولهم "التاسع و الواسع" و نديرو فطور رشتة بالجاج أو باللحم و كاين لي يدير الكسكس بالمرقة و في هذا اليوم نعشروا على شعرنا "يقص من الشعر قليلا" و نكحلو عينينا "يوضح الكحل في العينين"
و تبقى مجرد عادات و تقاليد تميز كل منطقة عن الأخرى

[اميمة الصديق]

اوكي حنا في قسنطينة نصوموا التاسع والعاشر ولا العاشر والحادش ونديروا لفطور شخشوخة وجاري
ونشريوا لقشقشة الي هي ( كاوكاو وجوز ولوز وبيستاش وحلوة وتمر وكرموس ووووووووووووو) انت وجيبك وفي السهرة نوكلهوم وكاين الي يخبي قسمته وكي تنفحله يوكلهاا شكرا اختي على الموضوع

[الحركاتية]

أما نحن في ولاية خنشلة وليس كلها لها نفس العادات توارثنا عن أجدادنا العادات الآتية :
أولا من أضحية العيد ينزع الجزء الأيمن من القفص الصدري ويجفف ويسمى عندنا الخليع أو القديد وفي ليلة عاشوراء أي يوم التاسع يطبخ مع الكسكس و كل جار أو قريب يأكل من هذا العشاء الخاص ـ تبادل أطعمة ـ فمثلا إن كان لديك عشر جيران يكون على مائدتك عشرة أطباق وعلى موائدهم أيضا
ـ نصوم التاسع والعاشر
ـ نقص جزءا صغيرا من الشعر يقال حتى يطول يصح
ـ نكتحل بالأثمد ( الكحل الطبيعي ) وقد كانت أمهاتنا وجداتنا يصنعنه في بيوتهن بأنواع من العقاقير وحقا ماتت جداتنا و أبصارهن جيدة .
ـ كما تخرج الزكاة في هذا اليوم .
وشكرا أن أتحتم لنا معرفة تقاليد بلادنا الحبيبة

ولكم خالص التحايا

[rachida 26]

السلام عليك
بالنسبة لنا نحن الشاويه في منطقة اريس وظواحيها نصوموا يوم 9 و 10 ويوم التاسع يسموه عاشور ويديروا العشاء بربوشه بالخليع اي اللحم المجفف ويوم عاشوراء يديروا الشرشم وقصوا من شعرهم ويديروا لكحل الي يكونوا هرسوه 7 بنات هداك النهار بعد ويحكموا 2 خيوط يلويوهم على بعظاهم من لونين مختلفين ويديروه كيما السنسله ويزيدوا في درعيهم ويديروا الرخساس واحده كبيره و6 صغار الكبيره ياكلوها والصغار يحطوهم كل واحده وين في الدقيق في الملح في القمح في الشعير في العسل الخليع الدهان كل واحد واش عندوا اما بالنسبة للعشاء يديروا الكسكسي باللحم الجديد وماننساوش يخرجوا الزكاة

[وردة بجاية]

حنا في بجاية......في عاشورا نعشروا الزيت لجمعناه...........يعني كل عشر لترات نخرجو ليترة.........نصوموا ..........و نديرو ثمخلعث ولا لمخلعة......في النهار الأول يعني التاسع.........و اليوم العاشر نديرو سكسو...