الحاجة دارت النية .. قصيدة حول محو الأمية

مولود حداد · 2009-09-23, 16:47

السلام عليكم ورحمة الله

هذه قصيدة كتبتها وألقيتها في حفل لتكريم أمهاتنا المتمدرسات في قسم محو الأمية في بلدية بئرالخادم بالعاصمة. وقد تبدو بعض الأبيات غير متناسقة شكلا لكن بالصوت كل شئ مضبوط والحمد لله.

الحَاجَّة دَارَتْ النِّيَة *** وْقـََالَتْ نَقْرَا بَاللِّي كَايَنْ
أنَا القَعْدَة مَاهِي لِيَا *** الكْنِيسْ وْغْسِيلْ لُومَاعَنْ
صَحْ مَا عَلْمُونِيشْ وَالْدِيَا *** خَاطَرْكَانُو مَايَعَرْفُوشْ مْسَاكَنْ
عَزْمَتْ تَدْخُلْ لْمَحْوْ الأُمِّيَة *** نْتَاعْ الشِّهَابْ بَاشْ تَتْمَكَّنْ

دَخْلَتْ اليُومْ اللَّوَلْ *** وَبْدَاتْ فَالنْسَا تْشُوفْ
فِي رُوحْهَا قَاعْدَة تَسْأَلْ *** رَايْحِينْ يْقَرِّيوْنَا الحُرُوفْ؟
وْهَاذُو مْنِينْ جَاوْ كَامَلْ *** وَعْلَى كْبَرْنَا يْمَشِّيوْنَا فَصْفُوفْ
وَالشِّيخْ مْرَا وَلاَّ رَاجَلْ *** حْنَا الحَشْمَة فِينَا وَالخُوفْ

المُهِمْ بْدَاتْ الحِصَّة *** بَ بُو تَ تِي
عَ رَ لَ صَ *** أُمِّي تَحْلُبُ البَقَرَةِ
وْهِيَ حَاسَّة حَاجَة خَاصَّة *** نْوَاظْرِي وَالشِّيخَة تْقُولْهَا نَظَّارَتِي
قـَالَتَلْهَا مَانِيشْ اللِّي تَتْوَصَّى *** حْنَا قْرِينَا بَكْرِي يَا بَنْتِي

وَاشْنُو عَشْنَا حْيَاة مُرَّة *** وَفْرَنْسَا كِي جَاتْ جَهْلَتْنَا
شْحَالْ خْدَمْنَا فَالثَّورَة *** مْعَ ذُوكْ الرْجَالْ خَاوَتْنَا
نَخَبْزُوا وَنْطَيْبُوا الكَسْرَة *** صَحْ مَاقْرِينَاشْ لَكَنْ خَرَّجْنَا
المُهَنْدَسْ الطْبِيبْ وَالدُكْتُورَة *** بْدْعَاوِينَا الحِرصْ وَسْهَرْنَا

هنا انتهت القصيدة وهذه مقطوفات فقط

أولا: لما الأستاذة تتأخر والعجايز يقعدوا يستناو هذا حوار بين عجوزتين

وَاشْ رَاكِي لاَبَاسْ مْهَنْيَة؟ *** كِي سَمَّاكْ الله يَا مَخْلُوقَة
وِينْ تَسُكْنِي؟ قَالَتَلْهَا وَرْدِيَة *** وْنَسْكُن فَالعَافْيَة فْذِيكْ الزَّنْقَة
إيهْ رَاكِي قُدَّامْ حْبِيبْتِي زَهِيَّة *** حَقَّا وْكِيفَاشْ بَنْتْهَا عَتِيقَة
قَالَتَلْهَا مَا سْمَعْتِيشْ الكَيَّة؟ *** يَاخِي وَلاَّتْ مْتَلْقَة (مطلقة)
خَلاَّهَا بْزُوجْ وَالتَالتَة جَايَّة *** رَاهِي وَشْ نْقُولَّكْ فِي ضِيقَة

الحاجة لمّا تروح للدار وش تقول لوليدها
يَا وْلِيدِي الله يْقَوِّيلَكْ الشَّانْ *** لُوكَانْ تَشْرِيلِي بُوسْتْ كَاسَاتْ
نَسْمَعْ وْنَتْعَلَّمْ مْلِيحْ القُرْآنْ *** وْنَحْفَظْ شْوِيَّة مَنُّو آيَاتْ
بَاشْ نْجِي اللَّولَى فَالاَمْتِحَانْ *** وْنفُوتْ هَذِيكْ يَمَّاتْ حَيَاة
وَيَعْطِيوْنِي سَرْفِيسْ مَزْيَانْ *** وْبَالاَكْ يْزِيدُولِي كَادُووَاتْ (هدايا).

القصيدة صوتية من هنا

الوليـد · 2009-09-24, 01:29

و عليكم السلام و رحمة الله و بركاته :

بارك الله فيك الأخ حمادة77 على الكلمات الرائعة و الالتفاتة الطيبة للأمّهات.

جزاك الله خيرا.

مولود حداد · 2009-09-24, 20:55

السلام عليكم
ومن لنا غير بركة الأمهات اخي وليد
العلم ليس له وقت ولا يحده عمر
بوركت ومشكور

صالح القسنطيني · 2009-09-25, 11:55

بارك الله فيك اخي

و بارك في قلمك

مولود حداد · 2009-09-27, 10:16

السلام عليكم
بوركت يابن مدينة الجن والإنس
موفق

هبة الله الرحمن · 2009-09-27, 13:55

وعليكم السلام ورحمة الله وبركاته

بارك الله فيك على هذه الالتفاتة النبيلة منك ....عرفت كيف تصف لنا اجواء الدراسة لامهاتنا ..مزيدا من الابداع

تحيااااااااتى